Makani aakalembwa aaMakko
2 Nikuba oobo, nikwakayinda mazuba, wakanjila lubo muKkapenawume alubo jwi lyakamwayika koonse-koonse lyakuti wakali waba aamuunzi. 2 Nkinkaako, bantu biingi bakabungana zyakuti teekwakachilikwe ndawu pe, nikuba kusika kumulyango mpawo wakasaanguna kwaamba jwi kulimbabo. 3 Bakamweetela umwi muntu wakayumide mubili, wakanyampwidwe aabaalumi bane. 4 Pesi bakakachilwa kumusisya mpaakabede Jesu akaambo kankamu yabantu. Nkinkaako, bakavumbula kaluli, balulama mpaakabede Jesu, mpawo bakajula mweenya, akuselusya bulo mpaakalede muntu wakayumide mubili. 5 Jesu naakabona lusyomo lwabo, wakati kumuntu wakayumide mubili: “Mwanaangu, zibi zyako zyalekelelwa.” 6 Kwakali bamwi balembi bakakkede mpawaawo alubo mumyoyo yabo bakali kuyeeya kuti: 7 “Nkamboonzi mwaalumi ooyu nalikwaambuula oobu? Ulikusampula. Ngwani uukonzya kulekelela zibi, kunze kwaLeza alikke?” 8 Pesi aachiindi nchicheecho, Jesu wakaziba mumoyo wakwe kuti nzizyo nzibakali kuyeeya aakati kabo, nkinkaako wakati kulimbabo: “Nkamboonzi nimulikuyeeya zintu eezi mumyoyo yanu? 9 Nchiichili chuuba, kubuzya muntu ooyu uuyumide mubili kuti, ‘Zibi zyako zyalekelelwa’ naakuti kwaamba kuti, ‘Nyampuka, ubweze bulo bwako weende’? 10 Pesi kuti muzibe kuti Mwanaamuntu wakapegwa manguzu aakulekelela zibi aanyika—” wakati kumuntu ooyo wakayumide mubili: 11 “Ndikubuzya kuti, Nyampuka, ubweze bulo bwako, uye kumuunzaako.” 12 Mpawo, wakanyampuka mpawaawo, wabweza bulo bwakwe, weenda kunembo lyabo boonse. Nkinkaako, bantu boonse bakagamba mpawo bakalumbayizya Leza kabati: “Tatunabona zintu zili boobu pe.”
13 Wakayinka lubo kumbali aalwizi mpawo nkamu yoonse yabantu yakali kusika kulinguwe, mpawo wakasaanguna kubayiisya. 14 Naakali kwiinda, wakabona Levi mwana wa-Alifasi, kakkede aang’anda yakutelela mutelo, mpawo wakati kulinguwe: “Ba mutobeli wangu.” Mpawo wakanyampuka mpawaawo, wamutobela. 15 Nikwakayinda chiindi, Jesu wakali kulya* mung’anda yaLevi alubo basimutelo biingi abasizibi bakali kulyaamwi* anguwe abasikwiiya bakwe, nkaambo bantu bakali kumutobela, bakali biingi. 16 Pesi balembi babaFarisi nibakabona kuti wakali kulya abasizibi abasimutelo, bakasaanguna kubuzya basikwiiya bakwe kuti: “Ani nkamboonzi nalya aabasimutelo abasizibi?” 17 Jesu naakamvwa oobo, wakati kulimbabo: “Bantu basimide tabayandi musilisi pe, pesi bachiswa mbabo bayanda musilisi. Ndakazida kuzooyita basizibi, kutali bantu baluleme pe.”
18 Basikwiiya baJohane abaFarisi bakali kulyiimya kulya. Nkinkaako, bakasika mpawo bakati kulinguwe: “Nkamboonzi basikwiiya baJohane ababaFarisi nibalyiimya kulya, kakuli basikwiiya bako tabalyiimyi pe?” 19 Nkinkaako, Jesu wakati kulimbabo: “Beenzinyina basikukwata bali aakaambo na kapa kuti balyiimye kulya, kuti sikukwata kachili aambabo? Kufumbwa kuti sikukwata kachilaamwi ambabo, tabeelede kulyiimya kulya pe. 20 Pesi azoosika mazuba, aawo sikukwata natazoogwisigwe kulimbabo, mpawo bazoolyiimya kulya mubuzuba oobo. 21 Taakwe muntu uusuma chigamba chamulembo mupya aachigogo chaajulu chachiindi. Kuti wachita oobo, mulembo mupya uladonsa chigogo eecho chachiindi mpawo aadelukide alakomena. 22 Alubo taakwe muntu uubikka wayini mpya muzibikkilo zyawayini zyachikumba zyachiindi. Kuti wachita oobo, wayini ilabbalula zibikkilo eezyo mpawo ilatika alubo zibikkilo zilanyonyooka. Pesi wayini mpya, ibikkwa muzibikkilo zyawayini zipya.”
23 Naakali kwiinda mumyuunda yazilyo muSabata, basikwiiya bakwe bakasaanguna kupulula zilyo kabayabweenda. 24 Nkinkaako, baFarisi bakati kulinguwe: “Wakubona! Nkamboonzi nibalikuchita zintu zitazumizigwi aamulawu muSabata?” 25 Pesi wakati kulimbabo: “Ani teemwakabala na nzyaakachita Davida naakabula chakulya anaakaba aanzala abaalumi mbaakalaabo? 26 Teemwakaabala na makani aali atala a-Abbiyata mupayizi mupati, kuti Davida wakanjila mung’anda yaLeza, mpawo wakalya zinkwa zyachitondeezyo zitazumizigwi aamulawu kuti ziligwe awumwi muntu, kunze kwabapayizi kupela alubo zimwi wakazipa baalumi mbaakalaabo?” 27 Mpawo wakati kulimbabo: “Sabata yakaba akaambo kamuntu kutali kuti muntu wakaba akaambo kaSabata. 28 Nkinkaako, Mwanaamuntu Mwaami nikuba waSabata.”