Detoronomi
15 “Kumamanino aaminyaka iili musanu ayibili, mweelede kwaangununa bamwi kuzikwelete. 2 Mbobu mbumweelede kuchita: Sikukweletesya woonse weelede kwaangununa simayakilane wakwe kuchikwelete nchalaacho, tayelede kubuzya simayakilane wakwe naakuti mweenzinyina kuti amubbadale nkaambo kuzoowambilizigwa kuti ndwaangunuko kuli Jehova. 3 Ulakonzya kubuzya mweenzu kuti akubbadale pesi toyelede kubuzya muntu wakulindinywe kuti akubbadale chikwelete nchalaacho kulinduwe. 4 Nikuba oobo, aakati kanu takweelede kuba muntu uufwaba pe nkaambo kwaamba choonzyo, Jehova uzoomulongezya munyika njalikumupa Jehova Leza wanu kuti ibe lukono lwanu, 5 kuti mwaswiilila jwi lyaJehova Leza wanu amoyo woonse akubamba mulawu ooyu woonse ngundilikumupa sunu. 6 Nkaambo Jehova Leza wanu uzoomulongezya* mbuli mbaakamusyomezya alubo muzookweletesya zisi zyiingi, pesi inywe tamuzookweleti pe alubo muzooyendelezya zisi zyiingi, pesi inywe tazizoomweendelezyi pe.
7 “Kuti umwi wanu uukkala muli imwi myuunzi yamunyika Jehova Leza wanu njalikumupa wafwaba, mutayumyi myoyo yanu pe naakuti kumwiima* mweenzinyokwe. 8 Nkaambo mweelede kumuvungulwida jaanza mumukweletesye kufumbwa nchabulide naakuti nchatakwaacho. 9 Muchenjelele kuti mutabi aamakanze aaya mabi mumyoyo yanu aakuti, ‘Munyaka wamusanu ayibili, munyaka wakwaangununwa wasika,’ mpawo muleke kumupa nzyabulide mweenzinyokwe uufwaba. Kuti muntu ooyo wakwiilila Jehova akaambo kanduwe, unooli wabisya. 10 Weelede kumupa amoyo woonse. Toyelede kumupa kumoyo kakusiya, nkaambo eezi nzizyo zitazoope kuti Jehova Leza wako akulongezye mumilimu yako yoonse amuzintu zyoonse nzuchita. 11 Nkaambo bantu bafwaba banooliko chiindi choonse munyika eeyo. Nchindili kumulayilila kuti, ‘Mweelede kuvungulula jaanza lyanu amoyo woonse kuli babo batakwe chintu abafwaba munyika yanu.’
12 “Kuti wawuzigilwa umwi wabantu bakulindinywe nkukwaamba mwaalumi naakuti mwanakazi muHebberu mpawo wakubelekela kwaminyaka iili musanu awumwi, weelede kumwaangununa mumunyaka wamusanu ayibili. 13 Kuti wamwaangununa, ateendi katakwe nchalaacho pe. 14 Weelede kumupa amoyo woonse kuzwa kubutanga bwako, kulubuwa lwako lwakupolela, kuzikandilo zyako zyamafuta azyawayini. Weelede kumupa kweendelana ambaakakulongezya Jehova Leza wako. 15 Yeeya kuti wakali muzike munyika ya-Ijipita akuti Jehova Leza wako wakakunununa. Sunu nchindili kukulayilila kuti uchite zintu eezi.
16 “Pesi kuti wakubuzya kuti, ‘Tandiyandi pe kweenda ndikusiye.’ Akaambo kakuti ulakuyanda abamung’anda yako, mbukunga ulakuyanda kukkala aanduwe, 17 weelede kubweza chidonkozyo umudonkole kutwi kakutyaminidwe aakkoma, mpawo ulaba muzike wako kwabuumi bwakwe boonse. Weelede kuchita zikozyenie akumuzike wako musimbi. 18 Utachiboni kachili chintu chiyumu loko kumwaangununa akumulekela kuti ayende, nkaambo kukubelekela nkwaakachita muminyaka iili musanu awumwi, kupetedwe tubili kumulimu uuchitwa aamubelesi uubbadalwa alubo Jehova Leza wako wakakulongezya muzintu zyoonse zyakachitwa.
19 “Weelede kusalazizya Jehova Leza wako bana beenze boonse bakusaanguna bang’ombe, mbelele ampongo zyako. Utabelesyi mwana wakusaanguna wang’ombe yako nikuba kugela mwana wakusaanguna wambelele naakuti mpongo yako. 20 Munyaka amunyaka, iwe abamug’anda yako mweelede kwiilida kunembo lyaJehova Leza wako kundawu njatazoosale Jehova. 21 Pesi kuti munyama ooyo kali aanchasolwaacho—kasunkuta, kali moofu naakuti kali aachimwi chintu nchasolwaacho—utamupi kuti abe chipayizyo kuli Jehova Leza wako. 22 Mweelede kumulida mumyuunzi yanu,* muntu uusofweede awutasofweede balakonzya kulya mbuli mbumulya nyama yamondwe ayansya. 23 Pesi tamweelede kulya ganzi lyawo pe, mweelede kulitila aansi mbuli maanzi.