Kulonga
22 “Kuti muntu wabba ng’ombe naakuti mbelele mpawo wayijaya naakuti wayiwuzya, weelede kubbadala ng’ombe zili musanu akaambo kang’ombe eeyo ambelele zine akaambo kambelele eeyo.
2 (“Kuti mubbi wajanika kali kubba mpawo wawumwa mpawo wafwa, sikumuuma takwe mulandu waganzi pe. 3 Pesi kuti zyachitika kalili lyazwa zuba, sikumujaya ulaamulandu waganzi.)
“Weelede kubbadala. Kuti katakwe chintu chakubbadala aacho weelede kuuzigwa kuchitila kuti kubbadalwe zintu nzyaakabba. 4 Kuti munyama ngwaakabba wajanika aakati kazivuubwa zyakwe, kufumbwa kuti ning’ombe, ndidonki naakuti nimbelele, weelede kubbadala banyama babili akaambo kamunyama ngwaakabba.
5 “Kuti umwi muntu wajulila zivuubwa zyakwe kuti zikachele mumuunda wakwe wazilyo naakuti wamisaansa, pesi wazileka kuti zikalide mumuunda wawumwi muntu, weelede kubbadala azintu zibotu zili mumuunda wakwe naakuti amasaansa mabotu aali mumuunda wakwe wamisaansa.
6 “Kuti muntu watalisya mulilo mpawo wayindilila waakutenta ziteyo zyamaamvwa, misunta yazilyo, zilyo zichiimvwi mumuunda naakuti muunda uutanatebulwa, ooyo wawutalisya weelede kubbadala zintu zyapya.
7 “Kuti muntu wapa mweenzinyina mali naakuti zimwi zintu kuti amubambile mpawo zyabbigwa mung’anda yamweenzinyina, mpawo sikubba wajanika, weelede kuzibbadala kazyiindulwidwe tubili. 8 Pesi kuti sikubba taajanika, munaang’anda weelede kweetwa kunembo lyaLeza wakasimpe, kuchitila kuti kubonwe kuti taakabikka kuboko kwakwe na aazintu zyamweenzinyina. 9 Kumilandu yoonse yakuti muntu ulajanika kali aazintu zitali zyakwe kufumbwa kuti ning’ombe, ndidonki, nimbelele, nchigogo naakuti nchiimwi chintu chakasweeka, we kalikwaamba kuti, ‘Nchichangu!’ boonse kabali babili beelede kutola kaambo kabo kunembo lyaLeza wakasimpe. Ooyo Leza ngwataambe kuti ulaamulandu, weelede kubbadala mweenzinyina zyiindulwidwe tubili.
10 “Kuti umwi muntu wapa mweenzinyina donki, ng’ombe, mbelele naakuti chimwi chivuubwa kuti amubambile mpawo chafwa, chalemana naakuti chabingwa kakutakwe muntu uubwene, 11 weelede kukonka kunembo lyaJehova kuti taakabikka kuboko kwakwe aachivuubwa chamweenzinyina. Munaacho weelede kuzizumina. Sikuchibamba tayelede kubbadala pe. 12 Pesi kuti kakuli chivuubwa eecho chakabbigwa, weelede kubbadala munaacho. 13 Kuti kakuli chakalumwa aamunyama wamusokwe, weelede kweeta bukamboni. Tayelede kubbadala chintu chakalumwa aamunyama wamusokwe pe.
14 “Kuti umwi muntu waboleka munyama kumweenzinyina mpawo munyama ooyo walemana naakuti wafwa kawuli kulinguwe, weelede kuubbadala. 15 Pesi kuti zyachitika munaawo kalangide, sikuboleka tayelede kubbadala pe. Kuti kakuli kuti wakabbadala mali kuti abelesye munyama ooyo, mali njaakagwisya njiyo iitabe mbadalo.
16 “Kuti mwaalumi woongelezya nakalindu uutatuminidwe mpawo woona aanguwe, weelede kumusela kuti abe mwanakazi wakwe. 17 Pesi kuti wisi wakaka kumukwatya kulinguwe, mwaalumi ooyo weelede kubbadala mali yeelene aaluselo.
18 “Utasiyi musondi wachanakazi kali muumi pe.
19 “Kufumbwa muntu woona aamunyama weelede kujayigwa.
20 “Kufumbwa muntu uupa chipayizyo kuli bamwi baleza kutali kuli Jehova alikke, weelede kujayigwa.
21 “Mutamujati bubi mweenzu naakuti kumudyaaminina nkaambo andinywe mwakali beenzu munyika ya-Ijipita.
22 “Mutapenzyi mukamufu naakuti mwana uutakwe wisi.* 23 Kuti mwamupenzya mpawo wandililila, kwaamba choonzyo, ndizookumvwa kulila kwakwe; 24 alubo ndizoomunyemena loko ndimujaye aapanga mpawo banakazi banu bazooba bamukabafu alubo bana banu bazoofwidwa aamawisi.
25 “Kuti muntu wangu uufwaba* uukkala aanduwe wakweleta mali kulinduwe, utabi mbuli sikukweletesya uuyanda kuti mali iboole kayili yazyala. Tayelede kwiiboozya kayili yazyala pe.
26 “Kuti wabweza chigogo chamweenzinyokwe kuti chibe chijatisyo akaambo kachikwelete nchwaakamupa, weelede kuchibweedezya kulinguwe zuba kalitanabbila. 27 Nkaambo nchicho achilikke nchalaacho chakuvumba mubili wakwe. Kuti waleka kuchibweedezya uloona biyeni? Aakundililila ndizoomumvwa choonzyo, nkaambo ndili silweetelelo.
28 “Utatuki Leza naakuti silutwe wabantu bakulindinywe.
29 “Utawayi-wayi kundipa zipo kuzwa kubutebuzi bwako bwiingi akuzikandilo zyako zifusuukide.* Weelede kundipa bana bako balombe bakusaanguna. 30 Nzezi nzweelede kuchita kung’ombe akumbelele yako: Mazuba aali musanu alimwi ilakkala aabanyina, pesi mubuzuba bwamusanu aatatu undipe njiyo.
31 “Mweelede kutondeezya kuti mulasalala kulindime. Mutalyi nyama yachintu chakalumwa aamunyama wamusokwe. Mweelede kwiipa bankala.