Lwakusaanguna kuBakkorinte

8 Kumakani aali atala achakulya chipegwa kuzibumbwa: Tulizi kuti toonse tuli aaluzibo. Luzibo lupa kulisumpula pesi luyando lulayaka. 2 Kuti muntu kayeeya kuti kuli chimwi chintu nchazi, tanachiziba pe mbuli mbayelede kuchiziba. 3 Pesi kuti muntu kayanda Leza, Leza ulimuzi muntu ooyo.

4 Kumakani aali atala akulya chakulya chipegwa kuzibumbwa, tulizi kuti chibumbwa taakwe ambuchibede pe munyika akuti kuli Leza uumwi biyo. 5 Nkaambo nikuba kuti mpubali aabo baambwa kuti mbaaleza, kube kujulu naakuti aanyika, mbukunga kuli “baleza” biingi “abaami” biingi, 6 pesi kwaamba choonzyo, kulindiswe kuli Leza uumwi, Taata, ooko kuzwa zintu zyoonse, andiswe mputuli akaambo kakwe. Alubo kuli Mwaami uumwi, Jesu Kkristu, zintu zyoonse mpuzili kwiinda mulinguwe, andiswe mputuli kwiinda mulinguwe.

7 Nikuba oobo, teeboonse pe bali aaluzibo oolu. Pesi bamwi akaambo kakuti bakali kukomba chibumbwa chiindi, kuti balya chakulya chapayizigwa kuchibumbwa, myoyo yabo* iitasimide, nga tayichisalali pe. 8 Pesi chakulya tachipi kuti tuswene aafwiifwi aLeza. Taakwe bubi pe kuti teetwalya alubo taakwe nchizigwasya pe kuti twalya. 9 Pesi amuchenjelele kuti, cheelelo chanu chakulisalila chitabi chilebyo kuli baabo batasimide. 10 Nkaambo kuti umwi muntu wakubona iwe nuuli aaluzibo, kulikulya chakulya mutempele lili aachibumbwa, moyo* wamuntu ooyo uutasimide tukoopa kuti abe aachibindi chakuti asike mpalya chakulya chakapegwa kuzibumbwa na? 11 Nkinkaako, akaambo kaluzibo lwako, wanyonyoona muntu uutasimide, mukombinyokwe ooyo Kkristu ngwaakafwida. 12 Kuti mwabisizya bakombinyokwe munzila eeyi, akuchisya myoyo yabo* iitasimide, nga mulikubisizya Kkristu. 13 Nkinkaako, kuti chakulya kachipa kuti mukombima alebwe, tandichizooyilyi lubo pe nyama, kuchitila kuti nditalebyi mukombima.