Detoronomi
11 “Weelede kuyanda Jehova Leza wako alubo chiindi choonse uchite nzyakubuzya kuti uchite alubo ubambe malayilile aakwe, nzila zyakwe zyakubeteka amilawu yakwe. 2 Mulizizi sunu kuti ndili kwaambuula aandinywe, kutali abana banu batazi naakuti batabwene chisubulo chaJehova Leza wanu, bupati bwakwe ajaanza lyakwe lili aamanguzu akuboko kwakwe kutandabikidwe. 3 Teebakazibona pe zitondeezyo zyakwe amilimu yakwe njaakachita mu-Ijipita kuli Faro, mwaami wa-Ijipita akunyika yakwe yoonse; 4 anzyaakachita kumasooja aa-Ijipita, kumabbiza aaFaro akungolo zyankondo, zyakavumbwa aamaanzi aamuLwizi Lusalala chiindi nibakali kumwaandilila, mpawo Jehova wakabanyonyoona chakumaninina.* 5 Teebakazibona pe nzyaakamuchitila munkanda kusika mwazoosika mundawu eeyi, 6 anzyaakachita kuli Datani a-Abbiramu bana ba-Eliyabbu mwana waRubbeni chiindi nyika niyakaasama yabamena kuswaanizya abamumaanda aabo amatente aabo azintu zyoonse zipona nzibakali aazyo kunembo lyama-Israyeli boonse. 7 Mwakalibonena ameso aanu milimu mipati yoonse Jehova njaakachita.
8 “Mweelede kubamba mulawu woonse ngundilikumupa sunu kuchitila kuti musime akuti muzubuke munjile munyika kuti mwiibweze, 9 akuti mupone mazuba miingi munyika Jehova njaakakonkezya kupa masianyookulu abana babo, nyika iikunka malili abuchi.
10 “Nyika njimuyakubweza tayili mbuli nyika ya-Ijipita pe nkumwakazwa, ooko nkumwakali kubyala mbuto akutiliila aamawulu aanu,* mbuli muunda wazisyu. 11 Pesi nyika njimuyakubweza nimwazubuka ninyika yazilundu amakuti.* Ninyika iitetesegwa aamvula iizwa kujulu; 12 ninyika Jehova Leza wanu njabambide, meso aaJehova Leza wanu ali aalinjiyo chiindi choonse, kuzwa kumatalikilo aamunyaka kusika kumamanino aawo.
13 “Alubo kuti mwasungwaalila kuswiilila malayilile aangu ngindili kumulayilila sunu akuyanda Jehova Leza wanu akumubelekela amoyo wanu woonse abuumi bwanu boonse, 14 ndizoopa kuti mvula iwe aanyika yanu aachiindi chayo cheelede, mvula yakusaanguna amvula yamamanino. Muzootebula zilyo mube aawayini mpya amafuta. 15 Ndizoopa kuti masokwe aazivuubwa zyanu amene musokwe alubo muzoolya mukkute. 16 Amuchenjelele kuti myoyo yanu itoongelezegwi kuti muleye mpawo mukombe bamwi baleza akubakotamina. 17 Kuti mwachita oobo, bukali bwaJehova buzoomuvutukila alubo uzoojala majulu kuti mvula itawi alubo nyika tayizoomupi michelo yayo, muzoomana chakufwambaana munyika mbotu njalikumupa Jehova.
18 “Mweelede kubamba majwi aangu aaya mumyoyo yanu amubuumi bwanu, mwaasunge kukuboko kuti abe chiyeekezyo alubo ayelede kuba mbuli chakwaanga kumutwe aankumu zyanu. 19 Amwaayiisye bana banu, mwaambuule atala angawo chiindi nimukkede mung’anda, nimweenda mumugwagwa, nimoona animubuka. 20 Amwaalembe aaminsende* yamaanda aanu aamageedi aanu, 21 kuchitila kuti inywe abana banu mupone mazuba miingi munyika eeyo Jehova njaakakonkezya kupa masianyookulu, kufumbwa kuti majulu kaali aajulu aanyika.
22 “Kuti mwawutobelesesya mulawu ooyu ngundilikumupa akuubamba, nkukwaamba kuyanda Jehova Leza wanu, kweenda munzila zyakwe zyoonse akukakatila kulinguwe, 23 Jehova uzootanda zisi zyoonse kunembo lyanu, muzoozunda zisi zyiingi zili aamanguzu kwiinda ndinywe. 24 Kufumbwa ndawu njimuzoolyata, kuzwa kunkanda kusika kuLebbanoni, kuzwa kuMulonga, nkukwaamba mulonga waYufurati kuyoosika kulwizi luli kububbila,* nkuko kunooli mugaano wanu. 25 Taakwe uutazookonzye kulwana aandinywe, Jehova Leza wanu uzoopa kuti bantu bamunyika yoonse njimuzooyenda bayoowe akufweluka mwida mbuli mbaakamusyomezya.
26 “Amubone, sunu ndilikubikka chilongezyo* alutuko kunembo lyanu. 27 Nchilongezyo kuti mwaswiilila milawu yaJehova Leza wanu njindili kumulayilila sunu, 28 pesi ndutuko kuti teemwaswiilila mulawu waJehova Leza wanu, kuti mwaleya munzila njindili kumulayilila sunu kuti mwiitobele akutobela baleza mbimutazi pe.
29 “Jehova Leza wanu naazoomunjizya munyika njimwaba aafwiifwi kukona, mweelede kwaambilizya* chilongezyo aaChilundu chaGerizimu alutuko aaChilundu cha-Ebbali. 30 Zilundu eezi, tazili mutala aaJodani na kububbila munyika yamaKkenani bakkede mu-Arabba iilangene aaGiligali kumbali aaminsamu mipati yaMore? 31 Nkaambo mulazubuka Jodani kuti munjile akubweza nyika Jehova Leza wanu njalikumupa. Nimwayibweza kuti ibe yanu akukkala mulinjiyo, 32 mweelede kuba aachoonzyo chakuti mwabamba malayilile woonse anzila zyakubeteka nzindilikubikka kunembo lyanu sunu.