Baami Wachibili
19 Mwaami Hezekkiya mbaakaamvwa biyo makani aaya, wakadelula zigogo zyakwe wazwaata zigogo zyamasaka mpawo wakanjila mung’anda yaJehova. 2 Kuzwa waawo, wakatuma Eliyakkimu ooyo wakali kuzulwida bamung’anda yamwaami,* aShebbina mulembi, abaalu babapayizi, kabazweete zigogo zyamasaka kuti bayinke kumupolofita Isaya mwana wa-Amozi. 3 Mpawo bakati kulinguwe: “Nzezi nzyaamba Hezekkiya, ‘Buzuba oobuno mbuzuba bwamapenzi, bwakukalalilwa* abwakusampawulwa. Nkaambo bana baamba kutumbukwa, pesi taakwe manguzu aakutumbuka pe. 4 Amwi Jehova Leza wako ulaamvwa majwi woonse aaRabbishakke, ooyo mwaami wa-Asiriya simalelaakwe ngwaatuma kuti asampawule Leza muumi, alubo ulamubeteka akaambo kamajwi Jehova Leza wako ngaamvwa. Nkinkaako, kombela aabo basyeede bakafutuka.’”
5 Babelesi baMwaami Hezekkiya bakanjila mwaakabede Isaya, 6 mpawo Isaya wakati kulimbabo: “Amukabuzye simalelaanu kuti, ‘Nzezi nzyaamba Jehova: “Utayoowi pe akaambo kamajwi ngwaamvwa, majwi ngibandisampawula aangawo babelesi bamwaami wa-Asiriya. 7 Ndilabikka muzeezo mumoyo wakwe, mpawo ulamvwa mulumbe abweede kunyika yakwe. Alubo ndilapa kuti akajayigwe aapanga kunyika yakwe.”’”
8 Rabbishakke naakamvwa kuti mwaami wa-Asiriya wakali waleka kulwana Lakkishi, wakayinka kulinguwe mpawo wakamujana kalikulwana aaLibbina. 9 Lino mwaami wakamvwa kakulikwaambwa atala aMwaami Tihakka wa-Itopiya kuti: “Ngoyu wasika kuti azoolwane aanduwe.” Nkinkaako, wakabatuma lubo batumwa kuli Hezekkiya kati: 10 “Nzezi nzimweelede kubuzya Mwaami Hezekkiya waJuda, ‘Utalekeli Leza wako ooyo ngusyoma kuti akweene kwiinda mukwaamba kuti: “Muunzi waJerusalema taakwe nuutazoobikkwe mukuboko kwamwaami wa-Asiriya pe.” 11 Bona! Wakamvwa baami ba-Asiriya mbubakazinyonyoona zisi zyoonse. Ubonaanga iwe ulafutuka na awukke? 12 Zisi nzibakanyonyoona masianene, baleza bazyo bakazivuna na? Ilikuli Gozani, Harani, Rezefi, abantu baku-Edeni aabo bakali muTeli-asari? 13 Ulikuli mwaami waHamati, amwaami wa-Apadi, amwaami wamuunzi waSefavayimu, amwaami waHena a-Iva?’”
14 Hezekkiya wakabweza magwalo aakali mukuboko kwabatumwa waabala. Mpawo Hezekkiya wakayinka kung’anda yaJehova waakwaayala kunembo lyaJehova. 15 Mpawo Hezekkiya wakasaanguna kukomba kunembo lyaJehova kati: “O Jehova Leza wa-Israyeli, nuukkede aachuuno chabwaami aajulu aamakkerubbi,* nduwe awukke Leza wakasimpe wabwaami boonse bwaanyika. Nduwe nwaakalenga julu anyika. 16 Chenjeka kutwi kwako, O Jehova, umvwe! Jula meso aako, O Jehova, ubone! Mvwa majwi Senakkeribbi ngaatumizya kuti asampawule Leza muumi. 17 Nichoonzyo, O Jehova, kuti baami ba-Asiriya banyonyoona bantu bazisi anyika zyabo. 18 Basowa baleza babo mumulilo, nkaambo teebaleza pe, pesi milimu yamaboko aabantu, mbaaleza bazisamu amabwe. Nzizyo zyapa kuti bakonzye kubanyonyoona. 19 Pesi lino, O Jehova Leza wesu, ikaka tuvune mukuboko kwakwe, kuchitila kuti bwaami boonse bwaanyika buzibe kuti iwe awukke, nduwe Leza, O Jehova.”
20 Mpawo Isaya mwana wa-Amozi wakatumizya mulumbe kuli Hezekkiya wakuti: “Nzezi nzyaamba Jehova Leza wa-Israyeli, ‘Ndayimvwa nkombyo yako njwaakomba kulindime atala aMwaami Senakkeribbi wa-Asiriya. 21 Ndeli jwi Jehova ndyaamba atala anguwe:
“Nakalindu* mwana musimbi waZiyoni wakusampawula, wakuseka.
Mwana musimbi waJerusalema wakutikinyina mutwe.
22 Ngwani ooyo ngwaasampawula akwaambila majwi mabi?
Ngwani ngwaabusizya jwi
Akumututulwida meso kuli kulisumpula?
Ngooyo Uusalala wa-Israyeli!
23 Wasampawula Jehova kwiinda mubatumwa bako kuli kwaamba kuti,
‘Angolo zyangu zyankondo zyiingi
Ndizootanta zilundu zilamfu,
Ndawu zili kule loko zyaLebbanoni.
Ndizoogonka minsamu yayo milamfu yamukkedari, aminsamu yayo mibotu yamujunipa.
Ndizoonjila mundawu yayo yakumagolelo, mulusaka lwayo lusyankene.
24 Ndizoosya zikala akunywa maanzi aamuli zimwi zisi.
Ndizooyuminizya tulonga toonse twa-Ijipita* andyato zyangu.’
25 Tunamvwa na? Zyakalikanzidwe* kuzwa chiindi.
Ndakazibamba* mazuba aayinda.
Lino ndilazichita.
Uzoopa kuti myuunzi iikwabilidwe ibe milwi yamagadi.
26 Bantu bakkala mumo bazooba bantu batagwasyi,
Bazooyoowa akufwisigwa bweeme.
Bazooba mbuli zimena zyamusokwe ambuli sokwe tete,
Mbuli sokwe lili aachiluli lyatentwa aaluuwo lwakubuzwezuba.
27 Pesi ndikuzi loko chiindi nukkala, nuzwa, nunjila,
Anundinyemenede,
28 Nkaambo kundinyemena kwako akundivulumina zyasika mumatwi aangu.
Nkinkaako, ndizoobikka kalobyo mumpemo yako amatomu aakati kamilomo yako,
Mpawo ndizookubweedezya aanzila njwaakazaayo.”
29 “‘Alubo eechi nchicho chitazoobe chitondeezyo chako:* Munyaka uuno, uzoolya zilimenena. Mumunyaka wachibili, uzoolya zilyo zizwa kuzisyuukila. Pesi mumunyaka wachitatu, uzoobyala mbuto, utebule alubo uzoolima myuunda yamisaansa akulya michelo yayo. 30 Aabo bamung’anda yaJuda batazoofutuke, nkukwaamba aabo batazoosyaale, bazoosimpa miyanda aansi mpawo bazyale michelo aajulu. 31 Nkaambo aabo batazoosyaale bazoozwa muJerusalema abatazoofutuke bazoozwa muChilundu chaZiyoni. Busungu bwaJehova wamakamu buzoozichita eezi.
32 “‘Nkinkaako, nzezi nzyaamba Jehova atala amwaami wa-Asiriya:
“Tazoonjili pe mumuunzi ooyu
Nikuba kuwaala kaanta nkukooko
Nikuba kuuzida kali aantobo
Nikuba kuuyakila dundulundu* lyakuusinkila.
33 Uzoobweeda aanzila njaakazaayo,
Tazoonjili pe mumuunzi ooyu,” mbaamba Jehova.
34 “Ndizoowulwanina muunzi ooyu akuuvuna akaambo kangu
Alubo akaambo kamubelesi wangu Davida.”’”
35 Mubusiku mbuboobo, ngilozi yaJehova yakayinka yaakujaya baalumi bali 185 000 mukkeempu yama-Asiriya. Bantu nibakabuka kuseeni-seeni, bakabona zidumbu kupela. 36 Nkinkaako, Mwaami Senakkeribbi wa-Asiriya wakanyampuka wabweeda kuNiniva mpawo wakakkala nkukooko. 37 Naakakoteme kalikukomba mung’anda yaleza* wakwe Nisirokki, bana bakwe balombe, Adiramelekki aShareza bakamujaya apanga, mpawo bakachijila kunyika ya-Ararati. Mwanaakwe Esa-hadoni wakaba mwaami mundawu yakwe.