Amosi
5 “Amumvwe jwi eeli ndindilikwaamba kulindinywe kalili lwiimbo lwakulila, inywe ning’anda ya-Israyeli:
2 ‘Nakalindu, Israyeli, wawa,
Tachikonzyi lubo pe kubuka.
Wasiigwa aanyika yakwe,
Taakwe uutamubusye pe.’
3 “Nkaambo nzezi nzyaamba Mwaami Singuzuzyoonse Jehova:
‘Muunzi uutuma masooja aali chuulu kunkondo uzoosyaala aamasooja aali myaanda,
Alubo muunzi uutuma masooja aali myaanda uzoosyaala aamasooja aali kkumi aang’anda ya-Israyeli.’
4 “Nkaambo nzezi nzyaamba Jehova kung’anda ya-Israyeli:
‘Amundiyanduule kuti mwiinkilile kunembo kamupona.
5 Mutayanduuli Bbeteli pe,
Mutayinki kuGiligali nikuba kwiinda kuBberi-shebba,
Nkaambo kwaamba choonzyo, Giligali uzootolwa mubuzike,
Alubo Bbeteli uzooloba.*
6 Amuyanduule Jehova kuti mwiinkilile kunembo kamupona,
Kuchitila kuti atavutukili ng’anda yaJosefa mbuli mulilo,
Akunyonyoona Bbeteli zyakuti taakwe muntu uuyizima.
7 Nzila iiluleme njimubetekaayo, mwayichincha kuti ibe mululwe,
Alubo bululami mubusowela aanyika.
8 Ooyo wakapanga kabunga kanyenyeezi zyaKkima* akabunga kanyenyeezi zyaKkesili,*
Ooyo uuchincha mudima kuti ube kuseeni,
Ooyo uupa kuti sikati kusiye mbuli mansiku,
Ooyo wiita maanzi aamulwizi
Kuti aatile aajulu aanyika,
Jehova ndiizina lyakwe.
9 Uzoopa kuti lunyonyooko lusikile bantu basimide,
Akunyonyoona ndawu zyakukwabilila.
10 Bazonda aabo balulamika bamwi kumageedi aamuunzi,
Alubo basesemwa aabaabo baambuula kasimpe.
11 Akaambo kakuti mulayilila bafwaba kuti babbadale mutelo wamuunda
Akuti mubweza zilyo zyabo kuti zibe mutelo,
Tamuzooyinkilili kunembo pe kamukkala mumaanda ngimwakayaka aamabwe aabezedwe
Nikuba kunywa wayini iizwa mumyuunda yamisaansa mibotu njimwakalima.
12 Nkaambo ndiliizi mbiili myiingi milandu yanu
Ambuzili zipati zibi zyanu
—Mupenzya baluleme,
Mubweza zisinkamulomo,
Alubo tamukwe ndaba pe azyeelelo zyabafwaba kugeedi lyamuunzi.
13 Nkinkaako, aabo bali aamaanu bazoowumuna aachiindi eecho,
Nkaambo chinooli chiindi chamapenzi.
14 Amuyanduule zibotu kutali zibi,
Kuchitila kuti mwiinkilile kunembo kamupona.
Mpawo Jehova Leza wamakamu ulaba aandinywe,
Mbuli mbumwaamba kuti ulaandinywe.
15 Amuzonde zibi, muyande zibotu,
Amuchite ziluleme kugeedi lyamuunzi.
Amwi Jehova Leza wamakamu
Ulakonzya kubafwida luzyalo aabo basyeede baJosefa.’
16 “Nkinkaako, nzezi nzyaamba Jehova Leza wamakamu, Jehova wati:
‘Mumabuwa woonse munooli koomoka,
Amumigwagwa yoonse bazoowamba kuti, “Baamayoo, baamayoo!”
Bazooyita balimi kuti balile
Abaabo babbadalwa kuti balile kuti bazoowomoke.’
17 ‘Mumyuunda yoonse yamisaansa munooli koomoka,
Nkaambo ndizooyinda aakati kanu,’ mbaamba Jehova.
18 ‘Bali aapenzi aabo balilila kuti buzuba bwaJehova busike!
Ani mpo buzuba bwaJehova bunooli biyeni kulindinywe?
Bunooli mudima kutali mumuni.
19 Bunooli mbuli muntu uuchija mulavu mpawo waakuswaana munyama uutegwa bbeya,
Mpawo nanjila mung’anda yakwe, wajatilila aamuduli mpawo nzoka yamuluma.
20 Buzuba bwaJehova tabunooli mudima na, kutali mumuni,
Tabunoosiyi na, kutali kusalala?
21 Ndilaazonda mapobwe aanu, alandisesemya,
Tandibuyandi pe bweema bwamiswaangano yanu iiyandikana.
22 Nikuba kuti mwandipa zipo zitentwa bukkwene azimwi zipo,
Tazikoondibotezya kale pe,
Tandikoobotelwa aazipayizyo zyanu zyalumvwanano zyabanyama baneneede.
23 Mutandisabili pe anyimbo zyanu,
Alubo tandiyandi pe kumvwa nyimbo zyanu nzimulizya aazibelesyo zyanu zyakwiimbya zili aantambo.
24 Amubeteke munzila iiluleme mbuli maanzi mbaakunka*
Alubo bululami abukunke* mbuli kalonga katayuminini.
25 Kuli nimwakandeetela zipayizyo na azimwi zipo
Kwaminyaka iili 40 nimwakali munkanda, inywe ning’anda ya-Israyeli?
26 Lino mweelede kugwisya Sakkuti mwaami wanu aKkayiwani,*
Zikozyano zyanu, nyenyeezi yaleza wanu, ooyo ngumwakalipangila,
27 Ndizoomutola mubuzike, kule biya kunembo aaDamasikko,’ mbaamba ooyo uuli aazina litegwa Jehova Leza wamakamu.”