Kulonga
19 Mumweezi wachitatu kuzwa ma-Israyeli nibakazwa munyika ya-Ijipita, bakasika munkanda yaSinayi mubuzuba oobo. 2 Bakalonga kuzwa kuRefidimu basika munkanda yaSinayi, mpawo bakakkempa munkanda eeyo. Ma-Israyeli bakakkempa nkukooko kunembo lyachilundu.
3 Mozesi wakatanta wayinka kuli Leza wakasimpe, mpawo Jehova wakamwiita muchilundu, wamubuzya kuti: “Nzezi nzweelede kubuzya ng’anda yaJakkobo akwaambila ma-Israyeli, 4 ‘Mwakalibonena nzindakachitila ma-Ijipita, kuti ndimubweze amababa aamagumbe ndimweete kulindime. 5 Kuti mwaliswiilila jwi lyangu muzintu zyoonse akubamba chizuminano changu, kwaamba choonzyo, mulaba bantu bangu mbindiyandisya aakati kabantu boonse, nkaambo nyika yoonse njiyangu. 6 Mulaba bwaami bwabapayizi achisi chisalala kulindime.’ Aaya ngiimajwi ngweelede kubuzya ma-Israyeli.”
7 Nkinkaako, Mozesi wakayinka waakwiita baalu babantu wababuzya majwi woonse Jehova ngaakamulayilila. 8 Mpawo bantu boonse bakasandula aajwi limwi kabati: “Zyoonse nzyaamba Jehova tulazichita.” Mpawo Mozesi wakatola nsandulo yabantu kuli Jehova. 9 Jehova wakati kuli Mozesi: “Ndilaseluka kulinduwe mujoba lisiya, kuti bantu bamvwe nindaambuula aanduwe, kuchitila kuti bakusyome anduwe chiindi choonse.” Mozesi wakabuzya Jehova nzibakaamba bantu.
10 Mpawo Jehova wakati kuli Mozesi: “Yinka kubantu ukabasalazye sunu ajuunza alubo beelede kuwacha zigogo zyabo. 11 Beelede kulibambila buzuba bwachitatu, nkaambo mubuzuba bwachitatu Jehova uzooseluka aaChilundu chaSinayi bantu boonse kabalangide. 12 Weelede kubikkila bantu migaano iizyunguluka chilundu choonse mpawo ubabuzye kuti, ‘Mutatanti aachilundu pe naakuti kuguma mugaano wacho. Kufumbwa muntu uuguma chilundu, ulajayigwa kupela. 13 Takagumwi aakuboko pe, pesi ulawumwa aamabwe naakuti kuyaswa.* Kufumbwa kuti munyama naakuti muntu takoopona pe.’ Pesi nilwalizigwa lwija lwamugutu, bantu balakonzya kuza kuchilundu.”
14 Mozesi wakaseluka muchilundu wayinka kubantu mpawo wakasaanguna kubasalazya alubo bakawacha zigogo zyabo. 15 Wakati kubantu: “Amulibambile buzuba bwachitatu. Tamweelede koonana pe.”*
16 Mubuzuba bwachitatu kuseeni, kwakaba kudilima atulabi ajoba demu akulila kupati kwamweembo muchilundu mpawo bantu boonse bakali mukkeempu bakasaanguna kuzazama. 17 Mozesi wakagwisya bantu mukkeempu kuti bakaswaanane aaLeza wakasimpe mpawo bakayimikila munsi aachilundu. 18 Chilundu choonse chaSinayi chakali kusuka busi nkaambo Jehova wakaseluka mulinchicho kali mumulilo alubo busi bwakali kuuntumuka kabuya kujulu alubo chilundu choonse chakali kuzuzuma changuzu. 19 Kulila kwamweembo nikwakali kuya buyungizya, Mozesi wakaambuula mpawo ijwi lyaLeza wakasimpe lyakamusandula.
20 Nkinkaako, Jehova wakaseluka aajulu aaChilundu chaSinayi. Jehova wakayita Mozesi kuti aye aajulu aachilundu mpawo Mozesi wakatanta. 21 Jehova wakabuzya Mozesi kuti: “Seluka ukabuzye bantu kuti bateezyi pe kusotoka migaano kuti bazoobone Jehova, nkaambo biingi babo nga balafwa. 22 Bapayizi bakkala kabasika aafwiifwi aJehova abalisalazye kuchitila kuti Jehova atabajayi pe.” 23 Mpawo Mozesi wakati kuli Jehova: “Bantu tabakootanta kale pe aaChilundu chaSinayi, nkaambo wakatuchenjezya nwaakati, ‘Bikka migaano iizyunguluka chilundu uchisalazye.’” 24 Nikuba oobo, Jehova wakati kulinguwe: “Yinka, seluka mpawo uboole lubo a-Aroni, pesi mutazumizyi bapayizi abantu kuti basotoke migaano kuti baze kuli Jehova kuti atabajayi.” 25 Nkinkaako, Mozesi wakaseluka waakubuzya bantu.