Obbadiya
1 Chilengaano cha-Obbadiya.*
Nzezi nzyaamba Mwaami Singuzuzyoonse Jehova atala a-Edomu:
“Twamvwa mulumbe kuzwa kuli Jehova,
Mutumwa watumwa kuzisi kuti akaambe kuti:
‘Amunyampuke, atulibambile kuyoomulwana.’”
2 “Bona, ndakuchesya aakati kazisi;
Wasampulwa loko.
3 Kulisumpula kwamoyo wako kwakweena,
Iwe nuukkala mumpako yabbwe pati,
Nuukkala mujulu, nuwaamba kuti mumoyo wako,
‘Ngwani uutandiselusye aansi aanyika?’
4 Nikuba kuti ndawu yako yakukkala yaba kujulu* mbuli gumbe,
Naakuti wabikka chitendele chako aakati kanyenyeezi,
Ndilakuselusya kuzwa nkukooko,” mbaamba Jehova.
5 “Kuti bantu babba bakusikila, zigwebenga zyakusikila mansiku,
(Walikunonyonyoonwa loko!)*
Teebalikunoobba eezyo nzibayanda kupela na?
Naakuti, kuti basikuchela masaansa bakusikila,
Teebalikunoosiya aamwi na musule?
6 Isawu wayanduulwa kaka!
Lubono lwakwe lusisidwe lwayanduulwa!
7 Bakutandila kumugaano.
Beenzinyokwe boonse* bakweena.
Baalumi bakkede muluumuno anduwe bakuzunda.
Aabo balya aanduwe chinkwa bazookuteya kanyandi.
Pesi tuzooziboni pe.
8 Mubuzuba oobo,” mbaamba Jehova,
“Tandikabanyonyooni na basongo bamu-Edomu
Abasimaanu bamuzilundu zyamuchilawu cha-Isawu?
9 Amasooja aako azooyoowa, iwe Temani,
Nkaambo umwi awumwi uli muzilundu zyamuchilawu cha-Isawu uzoonyonyoonwa kundawu yakujayilwa.
10 Akaambo kakuti wakalwana mwanikaako Jakkobo,
Bweeme buzookuvumba
Alubo uzoonyonyooka chakumaninina.
11 Mubuzuba nwaakayimvwi kumbali akulanga biyo,
Mubuzuba beenzu nibakabweza masooja aakwe akwaatola mubuzike,
Aawo bantu bakuli zimwi zisi nibakanjila mugeedi lyakwe akuumina Jerusalema chisale,*
Wakachita mbuli umwi wabo.
12 Toyelede kubotelwa pe akaambo kabuzuba bwamwanikaako bwakuswaana mapenzi,
Toyelede kusekelela pe akaambo kabantu baJuda mubuzuba bwakunyonyooka kwabo,
Alubo toyelede kwaambuula chakulisumpula pe mubuzuba bwamapenzi aabo.
13 Toyelede kunjila pe mugeedi lyabantu bangu mubuzuba bwamapenzi aabo,
Toyelede kubotelwa pe akaambo kakupengaana kwakwe mubuzuba bwakwe bwamapenzi
Alubo toyelede kubikka maboko aako aabunoti bwakwe mubuzuba bwamapenzi aakwe.
14 Toyelede kwiimikila aaswaanana nzila kuti ujaye bantu bakwe bachija,
Alubo bantu bakwe bafutuka, toyelede kubatola kuli basinkondonyina mubuzuba bwamapenzi.
15 Nkaambo buzuba bwakuti Jehova alwane zisi zyoonse bulaafwiifwi,
Mbuwachita, mbutazoochitilwe anduwe.
Nzwaakabachitila bamwi zizookuboolela aamutwe wako.
16 Nkaambo mbuli mbwaakanywa kuchilundu changu chisalala,
Zisi zyoonse zinoonywa chiindi choonse.
Zizoonywa zimaninsye,
Alubo ziyooba mbuli kuti teezyakaliwo pe.
17 Pesi aabo bakachija banooli aaChilundu chaZiyoni
Alubo chizoosalala,
Bamung’anda yaJakkobo bazoobweza zintu zyabo.
18 Ng’anda yaJakkobo izooba mulilo,
Ng’anda yaJosefa izoovwilima,
Ang’anda ya-Isawu izooba mbuli makuba.
Bazoobatenta akubalotya,
Taakwe wamung’anda ya-Isawu utazoofutuke,
Nkaambo Jehova lwakwe nguwe waamba.
19 Bazoobweza Negebbu achilawu chazilundu cha-Isawu,
AShefela anyika yamaFilisiti.
Bazoobweza ndawu ya-Efremu andawu yaSamariya,
Alubo Bbenjamini uzoobweza Giliyadi.
20 Bazike bamumuunzi ooyu uuli aamiduli yakukwabilila,
Ma-Israyeli, bazoobweza nyika yamaKkenani kusikila kuZarefati.
Bazike bakuJerusalema bakali kuSefaradi, bazoobweza myuunzi yaNegebbu.
21 Bafutuli bayootanta kuChilundu chaZiyoni
Kuti babeteke chilawu chazilundu cha-Isawu,
Alubo bwaami buzooba bwaJehova.”