Levitikko

11 Mpawo Jehova wakabuzya Mozesi a-Aroni kuti: 2 “Amubuzye ma-Israyeli kuti, ‘Mbaba banyama bapona aanyika* mbimukonzya kulya: 3 Munyama woonse ulaansumba zyaanzeene zitajisini alubo uuselula ulakonzya kuligwa.

4 “‘Pesi tamweelede kulya banyama aaba baselula alubo bali aansumba zyaanzeene: nkamela ilaselula, pesi tayikwe nsumba zyaanzeene pe ilisofweede kulindinywe. 5 Anguwe chibila nkaambo ulaselula, pesi takwe nsumba zyaanzeene pe. Ulisofweede kulindinywe. 6 Akasulwe nkaambo kalaselula, pesi takakwe nsumba zyaanzeene pe. Kalisofweede kulindinywe. 7 Angulube nkaambo ilaansumba zyaanzeene zitajisini pe, pesi tayiseluli pe. Ilisofweede kulindinywe. 8 Tamweelede kulya nyama yabo nikuba kujata chidumbu chabo. Balisofweede kulindinywe.

9 “‘Nzezi nzimweelede kulya kuzintu zyoonse zili mumaanzi: Zintu zyoonse zili mumaanzi zili aatuyambyo amakwa, kazitakwe ndaba kuti muulwizi naakuti muumilonga, mulakonzya kuzilya. 10 Pesi zintu zyoonse zyamulwizi azyamumulonga zitakwe tuyambyo amakwa aakati kazilenge zyoonse zyeenda kazili zyiingi, azilenge zimwi zyoonse zyamumaanzi, nchintu chisesemya kulindinywe. 11 Kwaamba choonzyo, zyeelede kumusesemya, tamweelede kulya nyama yazyo alubo zidumbu zyazyo mweelede kuzisesemwa. 12 Zintu zyoonse zyamumaanzi zitakwe tuyambyo amakwa, nchintu chisesemya kulindinywe.

13 “‘Nzezi zilenge zyuuluka nzimweelede kusesemwa; tazyeelede kuligwa pe nkaambo zilasesemya: gumbe, chuungwe, kkubi lisiya, 14 nsika iisalala amisyobo yoonse yansika iisiya, 15 misyobo yoonse yabachikwangala, 16 mpoo, polo, muyuni uukkala mumbali aamaanzi, misyobo yoonse yabaluunga, 17 kapolo, kkungubu, polo ulaamatwi malamfu, 18 dada lilaansingo ndamfu, dada lilaamulomo mulamfu, kkubi, 19 syulamoobe, misyobo yoonse yabasiakabenge, ng’anga-yabayuni* akampembezya.* 20 Zilenge zyoonse zyeenda kazili zyiingi zilaamababa, zyeenda aamawulu aane, nchintu chisesemya kulindinywe.

21 “‘Kuzilenge zyoonse zilaamababa zyeenda kazili zyiingi zyeenda aamawulu aane, mulakonzya kulya eezyo kupela zili aamawulu malamfu aakusule aakusotosya. 22 Eezi mulakonzya kuzilya: misyobo iisiyene-siyene yansozi zilonga-longa, nsozi zimwi ziligwa, banzeenya amaduuntila. 23 Tumwi tuuka toonse tuli aamababa tweenda katuli twiingi tuli aamawulu aane, nchintu chisesemya kulindinywe. 24 Eezi zilakonzya kupa kuti musofwaale. Muntu woonse uuguma zidumbu zyazyo unoosofweede kusika goko. 25 Kufumbwa muntu uubweza zidumbu zyazyo, weelede kuwacha zigogo zyakwe, unoosofweede kusika goko.

26 “‘Kufumbwa munyama uulaansumba zyaanzeene, pesi zitaanzeene loko alubo uutaseluli, ulisofweede kulindinywe. Kufumbwa uumujata ulasofwaala. 27 Aakati kabanyama boonse beenda aamawulu aane, boonse beenda aandyato zili aamaala, balisofweede kulindinywe. Kufumbwa uujata zidumbu zyabo unoosofweede kusika goko. 28 Ooyo uubweza zidumbu zyabo, weelede kuwacha zigogo zyakwe alubo unoosofweede kusika goko. Balisofweede kulindinywe.

29 “‘Aaba mbiibanyama bayavula aanyika basofweede kulindinywe: silufulwe, mbeba, misyobo yoonse yabadyolo, 30 chigululwe, kkwaba, mpalamabwe,* bbulumulonga achamuntambwe. 31 Banyama aaba bayavula aanyika balisofweede kulindinywe. Muntu woonse uuguma chidumbu chabo unoosofweede kusika goko.

32 “‘Kufumbwa chintu mpaawida munyama ooyo naafwa, chilasofwaala, kazitakwe ndaba pe kuti nchibelesyo chachisamu, nchigogo, nchikumba naakuti ndisaka. Kufumbwa chibelesyo chibelesegwa, cheelede kunikwa mumaanzi alubo chinoosofweede kusika goko mpawo chilasalala. 33 Kuti wawida aachibelesyo chabulongo, mweelede kuchipwachuula alubo kufumbwa chintu chali mukati, chilasofwaala. 34 Kufumbwa chakulya chinga chanjilwa maanzi aazwa muchibelesyo eecho, chilasofwaala alubo kufumbwa chakunywa chazwa muchibelesyo eecho tachisalali pe. 35 Kufumbwa aachintu mpubawida banyama aabo bafwide, chilasofwaala. Kazitakwe ndaba kuti ni-oveni naakuti nchitofu, cheelede kupwachuulwa. Chilisofweede alubo chilakkala kachisofweede kulindinywe. 36 Kasawu achikala chamaanzi nzizyo zitanoosalale kupela, pesi kufumbwa muntu uuguma chidumbu chabo ulasofwaala. 37 Kuti zidumbu zyabo zyawida aambuto iiyanda kubyalwa iinoosalala. 38 Pesi kuti maanzi atilwa aambuto eeyo mpawo chipanzi chamunyama ooyo uufwide chawida aalinjiyo, ilasofwaala.

39 “‘Kuti munyama uuligwa wafwa, kufumbwa muntu uuguma chidumbu chakwe unoosofweede kusika goko. 40 Kufumbwa muntu uulya nyama yamunyama ooyo uufwide, weelede kuwacha zigogo zyakwe alubo unoosofweede kusika goko. Kufumbwa muntu uubweza chidumbu chamunyama ooyo uufwide, weelede kuwacha zigogo zyakwe alubo unoosofweede kusika goko. 41 Tuuka tweenda katuli twiingi aanyika nchintu chisesemya. Tatweelede kuligwa pe. 42 Tamweelede kulya kufumbwa tuuka tweenda aabula, kufumbwa tuuka tweenda aamawulu aane, naakuti kufumbwa tuuka tweenda katuli twiingi aanyika tuli aamawulu miingi, nkaambo nchisesemyo. 43 Mutalipi kuba chintu chisesemya kwiinda mukulya kufumbwa zyuuka zyeenda kazili zyiingi alubo mutalisofwaazyi mpawo muleke kusalala akaambo kanzizyo. 44 Nkaambo ndime Jehova Leza wanu alubo mweelede kulisalazya musalale, nkaambo ime ndilasalala. Nkinkaako, tamweelede kulisofwaazya akaambo kakufumbwa zyuuka zyeenda kazili zyiingi aanyika. 45 Nkaambo ndime Jehova uulikumuzulwida kuzwa munyika ya-Ijipita, kuti nditondeezye kuti ndime Leza kulindinywe alubo mweelede kusalala, nkaambo ime ndilasalala.

46 “‘Ooyu nguumulawu uuli atala abanyama, zilenge zyoonse zyuuluka, zilenge zyoonse zipona zyeenda mumaanzi azilenge zyoonse zyeenda kazili zyiingi aanyika, 47 kuchitila kuti kube musiyano aakati kazeezyo zisofweede azisalala alubo aakati kazilenge zyuumi zyeelede kuligwa azeezyo ziteelede kuligwa.’”