Detoronomi
29 Aaya ngiimajwi aachizuminano Jehova nchaakalayilila Mozesi kuti apangane aama-Israyeli munyika yaMowabbu kuyungizya kuchizuminano nchaakapangana aambabo kuHorebbu.
2 Mozesi wakayita ma-Israyeli boonse mpawo wakababuzya kuti: “Mwakabona zintu zyoonse Jehova nzyaakachita kunembo lyanu munyika ya-Ijipita kuli Faro, kubabelesi bakwe boonse akunyika yakwe yoonse, 3 mbeta mpati nzimwakabona* aameso aanu, zitondeezyo zipati azigambyo. 4 Pesi Jehova taakamupa moyo uumvwisisisya, meso aabona amatwi aamvwa kusikila sunu. 5 Nindakali kumuzulwida kwaminyaka iili 40 munkanda, zigogo zyanu teezyakazakala pe aamibili yanu alubo manyatela aanu taakazakala pe kumawulu aanu. 6 Teemwakalya chinkwa alubo teemwakanywa wayini nichiba chimwi chintu chikola, kuchitila kuti muzibe kuti ndime Jehova Leza wanu. 7 Mwakazoosika kundawu eeyi, mpawo Sihoni mwaami waHeshibboni a-Ogi mwaami waBbashani bakasika kuti bazootulwane pesi twakabazunda. 8 Twakabweza nyika yabo akwiipa musyobo waRubbeni, waGadi ahafu yamusyobo waManase kuti ibe lukono lwabo. 9 Nkinkaako, amubambe majwi aachizuminano eechi mwaaswiilile, kuchitila kuti zintu zyoonse nzimuchita zizwidilile.
10 Sunu moonse muliimvwi kunembo lyaJehova Leza wanu, basilutwe bamisyobo yanu, baalu banu, balupati-pati banu, baalumi boonse bamu-Israyeli, 11 bana banu, banakazi banu amweenzu uukkede mukkeempu uumutebbela nkuni akumutekela maanzi. 12 Muliwaano kuchitila kuti munjile muchizuminano chaJehova Leza wanu amuchikonke chakwe, eecho Jehova Leza wanu nchalikupangana aandinywe sunu, 13 kuchitila kuti sunu amwaambe kuti muli bantu bakwe akuti abe Leza wanu mbuli mbaakamusyomezya ambaakakonkezya kumasianyookulu, kuli Abbrahamu, Izakka aJakkobo.
14 Tandili kupangana aandinywe kupela chizuminano eechi achikonke eechi, 15 pesi ndili kuchipangana aabaabo bayimvwi aano andiswe sunu kunembo lyaJehova Leza wesu abaabo batalaamwi andiswe sunu. 16 Nkaambo mulizi kabotu mbutwakakkede munyika ya-Ijipita ambutwakayinda aakati kazisi zisiyene-siyene mulweendo lwesu. 17 Mwakali kubona zintu zyabo zisesemya azibumbwa zyabo zinyanyaasya* zyazisamu, zyamabwe, zyansiliva azyangolida zyakali aakati kabo. 18 Sunu amuchenjelele kuti aakati kanu kutabi mwaalumi naakuti mwanakazi, mpuli naakuti musyobo uuba aamoyo uuleya kuzwa kuli Jehova Leza wesu kuti akakombe baleza bazisi eezyo, kuti kutabi muyanda aakati kanu uuzyala muchelo uujaya amululwe.
19 Kuti umwi muntu wamvwa majwi aachikonke eechi, mpawo walisumpula mumoyo wakwe kali kwaamba kuti, ‘Ndinooli aaluumuno nikuba kuti ndeenda munzila ziyandwa aamoyo wangu,’ kali kunyonyoona zintu zyoonse zili munzila yakwe,* 20 Jehova takamulekeleli pe. Pesi bukali bupati bwaJehova buzoomuvutukila muntu ooyo, kwaamba choonzyo lutuko loonse lulembedwe mubbuku eeli luzoomusikila alubo Jehova uzoozima zina lyakwe aansi aamajulu. 21 Jehova uzoomugwisya aakati kamisyobo yoonse ya-Israyeli kuti amupe chisubulo kweendelana alutuko loonse lwachizuminano lulembedwe mubbuku eeli lyaMulawu.
22 Zyalani litobela lyabana banu amweenzu uuzwa kunyika iili kule nibazoobona zipenzyo zyamunyika amalwazi Jehova nganooli weeta aalinjiyo— 23 salufa amunyo akupya, kuchitila kuti nyika yabo yoonse itabyalwi, itamezeki nikuba kusyuuka, inyonyooke mbuli Sodoma aGomora, Adima aZebboyimu nzyaakanyonyoona Jehova mukunyema kwakwe amubukali bwakwe— 24 bo azisi zyoonse bazoowamba kuti, ‘Nkamboonzi Jehova naakachita zintu eezi kunyika eeyi? Niinzi chakapa kuti kube bukali bupati oobu buyoosya?’ 25 Mpawo bazoowamba kuti, ‘Akaambo kakuti bakasiya chizuminano chaJehova Leza wamasianyinakulu nchaakapangana aambabo naakabagwisya munyika ya-Ijipita. 26 Pesi bakayinka baakukomba bamwi baleza akubakotamina, baleza mbibakatazi* pe alubo mbaakabakasya kuti babakombe. 27 Mpawo bukali bwaJehova buyaka bwakasikila nyika eeyo kwiinda mukwiiyetela lutuko loonse lulembedwe mubbuku eeli. 28 Nkinkaako, Jehova wakabanyukula munyika yabo kanyemede, kabijilidwe alubo kalutide kapati mpawo wakabalonzezya kunyika iimbi, ooko nkubabede sunu.’
29 Zintu zisisidwe nzizyaJehova Leza wesu, pesi zintu ziyubunwidwe nzizyesu abana besu kukabe kutamani, kuchitila kuti tubambe majwi woonse aaMulawu ooyu.