Kulonga
12 Jehova wakati kuli Mozesi a-Aroni munyika ya-Ijipita: 2 “Mweezi uuno ulaba mweezi wanu wakusaanguna. Ulaba mweezi wakusaanguna mumyeezi yamunyaka. 3 Buzya mbungano yoonse yama-Israyeli kuti, ‘Mubuzuba bwakkumi bwamweezi uuno, ng’anda imwi ayimwi yeelede kubweza mbelele kweendelana ang’anda yamawisi. Mpuli imwi ayimwi yeelede kubweza mbelele iimwi. 4 Kuti mpuli kayili niini zyakuti mbelele ilakonzya kubakomenena, beelede kwaabana asimayakilane wabo waafwiifwi kweendelana anamba yabantu. Nibali kwaabana, beelede kubona kuti umwi awumwi ulalya zyiingi biyeni. 5 Mbelele eeyo yeelede kuba mugutu mubotu uuli aamunyaka uumwi. Mulakonzya kusala aakati kabana bambelele naakuti bampongo. 6 Mweelede kwiibamba kusikila mubuzuba bwachi 14 bwamweezi uuno alubo mbungano yoonse yama-Israyeli yeelede kwiijaya goko.* 7 Beelede kubweza limwi ganzi mpawo balisanse aaminsende iibili yamulyango aajulu aamulyango wang’anda mubatalide.
8 “‘Beelede kwiilya mubuzuba oobo mansiku. Beelede kwiiyoka mumulilo bayilye aachinkwa chitakwe bumena azisyu zilula. 9 Tamweelede kwiilya kayili mbisi naakuti kayijikidwe aamaanzi. Pesi mweelede kwiiyoka mumulilo amutwe wayo ansumba zyayo azyamukati zyayo. 10 Tamweelede kusiya imwi nyama kusikila kuseeni, pesi kuti imwi yasyaala kusikila kuseeni, mweelede kwiitenta mumulilo. 11 Mweelede kwiilya kamulyaangide mabbanti,* kamuzweete manyatela, kamujisi nkoli zyanu alubo mwiilye chakufwambaana. Ndipasika lyaJehova. 12 Nkaambo ndilayinda munyika ya-Ijipita mubusiku oobuno, ndijaye bana bakusaanguna bamunyika ya-Ijipita kuzwa kubantu kusikila kubanyama alubo ndilabeteka baleza boonse bamu-Ijipita. Ndime Jehova. 13 Ganzi lilaba chitondeezyo mumaanda mumutanoobede. Kuti ndabona ganzi ndilayinda alubo penzi talikoomusikila pe kuti limunyonyoone chiindi ninditawume nyika ya-Ijipita.
14 “‘Buzuba oobu bulaba chiyubulusyo kulindinywe. Mweelede kubusekelela mbuli pobwe lyaJehova kumazyalani aanu woonse. Ooyu weelede kuba mulawu wanu kukabe kutamani. 15 Muzoolya chinkwa chitakwe bumena kwamazuba aali musanu aabili. Mubuzuba bwakusaanguna, takweelede kujanika fulawa iikandidwe iili aabumena mumaanda aanu nkaambo kufumbwa muntu uutalye chintu chili aabumena kuzwa mubuzuba bwakusaanguna kusikila mubuzuba bwamusanu aabili, weelede kujayigwa. 16 Mubuzuba bwakusaanguna, muzoochita muswaangano uusalala mpawo mubuzuba bwamusanu aabili, muzoochita umwi muswaangano uusalala. Taakwe mulimu ngumweelede kuchita mumazuba aayo. Mulimu ngumukonzya kuchita kupela, ngwakulibambila chakulya nchimutalye.
17 “‘Mweelede kubamba buzuba bwaPobwe lyaChinkwa Chitakwe Bumena nkaambo mubuzuba oobo ndizoogwisya makamu aanu kuzwa munyika ya-Ijipita. Alubo mweelede kububamba mumazyalani aanu woonse kusikila kukabe kutamani. 18 Kuzwa mubuzuba bwachi 14 goko kusika mubuzuba bwachi 21 goko bwamweezi wakusaanguna, mweelede kulya chinkwa chitakwe bumena. 19 Taakwe fulawa iikandidwe iili aabumena yeelede kujanika mumaanda aanu kwamazuba aali musanu aabili nkaambo kufumbwa muntu uutalye chintu chili aabumena weelede kujayigwa kazitakwe ndaba pe kuti wakazyalilwa munyika eeyo na naakuti mweenzu. 20 Tamweelede kulya chintu chili aabumena pe. Mweelede kulya chinkwa chitakwe bumena mumaanda aanu.’”
21 Chakufwambaana, Mozesi wakayita baalu bama-Israyeli mpawo wakati kulimbabo: “Amwiinke mukasalile mpuli zyanu banyama bachili baniini* mpawo mwiijaye kuti ibe chipayizyo chaPasika. 22 Mweelede kunika nkama yahisopu muganzi lili mukadishi mpawo mulisansiile aajulu aamilyango yanu akuminsende iibili yamilyango yanu alubo taakwe muntu weelede kuzwa mung’anda kusikila kuseeni. 23 Jehova aazooyinda kuti apenzye ma-Ijipita mpawo wabona ganzi lili aajulu aamilyango yanu akuminsende iibili, Jehova ulayinda kumilyango yanu alubo takazumizyi penzi lyalufu kuti linjile mumaanda aanu.
24 “Inywe abana banu mweelede kubamba pobwe eeli kukabe kutamani. 25 Nimwasika kunyika Jehova njatazoomupe mbuli mbaakaamba, mweelede kubamba pobwe eeli. 26 Alubo kuti bana banu bamubuzya kuti, ‘Nkamboonzi nimubamba pobwe eeli?’ 27 Mweelede kubabuzya kuti, ‘Nchipayizyo chaJehova chaPasika, ooyo wakayinda mumaanda aama-Israyeli mu-Ijipita chiindi naakapenzya ma-Ijipita akufutula maanda eesu.’”
Mpawo bantu bakafugama akuvuntama. 28 Ma-Israyeli bakayinka baakuchita zintu Jehova nzyaakalayilila Mozesi a-Aroni. Bakachita mbuboobo.
29 Aakati kamansiku, Jehova wakawuma bana bakusaanguna boonse munyika ya-Ijipita, kuzwa kumwana wakusaanguna waFaro wakakkede aachuuno chabwaami kusikila kumwana wakusaanguna wamusungwa wakali mujele abana bakusaanguna boonse babanyama. 30 Faro wakabuka mubusiku mbuboobo aamwi abazike bakwe boonse abamwi ma-Ijipita boonse, kwakali kulila kupati kuma-Ijipita nkaambo taakwe ng’anda niiba iimwi yakatalikwe muntu uufwide. 31 Mubusiku oobo, Faro wakayita Mozesi a-Aroni mpawo wakababuzya kuti: “Amweende, amuzwe aakati kabantu bangu inywe ama-Israyeli. Amwiinke mukabelekele Jehova mbuli mbumwakaamba. 32 Amubweze mbelele zyanu ampongo zyanu ang’ombe zyanu, pesi mweelede kundilongezya andime.”
33 Ma-Ijipita bakasaanguna kukombelezya bantu kuti bafwambaane kuzwa kabababuzya kuti, “nkaambo toonse tuli mbuli bantu bafwide.” 34 Bantu bakabweza fulawa yabo iikandidwe iitakwe bumena azikandilo zyafulawa akuziputila muzigogo zyabo mpawo bakazipikula. 35 Ma-Israyeli bakachita nzibakalayililwa aMozesi. Bakakumbila ma-Ijipita kuti babape zintu zyansiliva azyangolida azigogo. 36 Jehova wakapa kuti ma-Ijipita babafwide luzyalo. Bakabapa zintu nzibakali kukumbila alubo bakabweza bunoti bwama-Ijipita.
37 Mpawo ma-Israyeli bakazwa kuRamesesi batozya kuSukkoti. Kwakali baalumi bali 600 000 bakali kweenda aamawulu katutabali bana pe. 38 Nkamu mpati yabantu basiyene-siyene* yakayinkaamwi ambabo alubo kwakali zivuubwa zyiingi ziswaanizya mbelele, mpongo ang’ombe. 39 Bakasaanguna kujika zinkwa zyalawundi zitakwe bumena kababelesya fulawa iikandidwe njibakazwaayo ku-Ijipita. Fulawa yabo teeyakalikwe bumena pe nkaambo bakatandwa mu-Ijipita zyakuti bakakachilwa kulibambila chakulya chamulweendo.
40 Minyaka njibakakkala ma-Israyeli, aabo bakakkala mu-Ijipita, yakali 430. 41 Mubuzuba niyakamana minyaka iili 430, makamu woonse aaJehova akazwa munyika ya-Ijipita. 42 Oobu mbusiku mbubeelede kusekelela kugwisigwa nkubakachitwa aaJehova munyika ya-Ijipita. Ma-Israyeli boonse beelede kubamba busiku oobu mumazyalani aabo woonse kuti bape bulemu kuli Jehova.
43 Jehova wakati kuli Mozesi a-Aroni, “Ngoyu mulawu waPasika: Taakwe mweenzu weelede kulya chakulya chaPasika. 44 Pesi kuti umwi kali aamuzike wachaalumi ngwaakawula aamali, weelede kumupalula. Kuti wachita oobo, ulakonzya kulya. 45 Muntu uuzwa kuliimwi nyika amubelesi tabeelede kulya chakulya eecho. 46 Mweelede kuchilida mung’anda iimwi. Taakwe nyama yeelede kuzwa mung’anda eeyo alubo tamweelede kutyola chifuwa. 47 Mbungano yoonse yama-Israyeli yeelede kusekelela pobwe eeli. 48 Kuti kukkede aamweenzu alubo kayanda kusekelela Pobwe lyaPasika lyaJehova, mwaalumi woonse wamung’anda yakwe weelede kupalulwa. Kuti wachita oobo, ulakonzya kusika kuti azoolisekelele. Alubo ulaba mbuli munaanyika eeyo. Pesi mwaalumi uutapalwidwe tayelede kuchilya pe. 49 Mulawu uubeleka kubantu bamunyika eeyo nguwo uutabeleke kubeenzu bakkala aakati kanu.”
50 Ma-Israyeli boonse bakachita zintu Jehova nzyaakalayilila Mozesi a-Aroni, bakachita mbuboobo. 51 Mubuzuba oobo, Jehova wakagwisya ma-Israyeli aamwi amakamu aabo kuzwa munyika ya-Ijipita.