Samiyele Wachibili
14 Jowabbu mwana waZeruya wakaziba kuti mwaami wakali aachiyandisyo chakubona Abbisalomu. 2 Nkinkaako, Jowabbu wakatuma muntu kuTekkowa kuti akayite mwanakazi uuchenjede nkukooko mpawo wakamubuzya kuti: “Ndikumbila kuti uchite mbuli kuti ulikulila umwi muntu mpawo uzwaate zigogo zyakulila, utanani mafuta pe. Chita mbuli mwanakazi waba aachiindi chilamfu kalikulila muntu wakafwa. 3 Mpawo wiinke kumwaami ukaakumubuzye zintu eezi.” Kuzwa waawo, Jowabbu wakamubikka majwi munkanwa.
4 Mwanakazi wakuTekkowa wakanjila mwakali mwaami mpawo wakavuntama busyu kabulangide aansi, wati: “Ikaka mwaami, ndigwasye!” 5 Mwaami wakati kulinguwe: “Niinzi chilikukukataazya?” Mwanakazi ooyo wakati: “Ndili mukamufu, mulumaangu wakafwa. 6 Alubo ime ndimubelesi wako, ndakali aabana balombe babili mpawo bana aaba bakalwana musokwe. Taakwe muntu wakaliwo pe kuti abavune, nkinkaako, umwi wakawuma mweenzinyina, wamujaya. 7 Lino mpuli yoonse yandibukila ndimubelesi wako mpawo balikwaamba kuti, ‘Tupe mulombe ooyo wakajaya mweenzinyina kuchitila kuti tumujaye akaambo kakuti wakajaya mweenzinyina, nikuba kuti eezi kazyaamba kunyonyoona sikukona!’ Kuti bachita oobo, balazima kkala lyamamanino ndindasyaalilwaalyo* akupa kuti zina lyamulumaangu lilobe akuti kutabi mwanaakwe uufutuka* aanyika.”
8 Mpawo mwaami wakati kumwanakazi ooyo: “Yinka kumuunzi wako, ndilaalanga-langa makani aaya.” 9 Mwanakazi wakuTekkowa wakati kumwaami: “Ikaka mwaami simalelaangu, mulandu awube aalindime ang’anda yandeende, pesi mwaami atabi aamulandu kuswaanizya achuuno chakwe chabwaami.” 10 Mwaami wakati: “Kuti kwaba umwi muntu uukubuzya amwi majwi, mweete kulindime, tazookukataazyi lubo pe.” 11 Pesi mwanakazi ooyo wakati: “Mwaami ayeeye Jehova Leza wakwe kuchitila kuti sikubweedezya mulandu waganzi atayungizyi amwi mapenzi alubo atamujayi mwanaangu.” Mpawo mwaami wakati kulinguwe: “Kwaamba choonzyo, mbuli Jehova mbali muumi, taakwe kasusu nikaba kamwi kamwanaako katazoowidaansi.” 12 Mwanakazi ooyo wakati: “Ndizumizye lubo ndimubelesi wako ndaambe jwi limwi biyo kumwaami simalelaangu.” Mwaami wakati: “Amba!”
13 Mwanakazi ooyo wakati: “Nkamboonzi nwaayeeya kuchita chintu chili boobu kubantu baLeza? Kuti mwaami kali kwaambuula munzila eeyi, ulikulipa mulandu, nkaambo mwaami talikumweeta pe mwanaakwe wakatandwa. 14 Kwaamba choonzyo, tulafwa alubo tulaba mbuli maanzi aatilwa aanyika aatakonzyi kuyolwa pe. Pesi Leza tabwezi buumi bwamuntu pe alubo ulanga-langa twaambo tupa kuti ooyo uutandidwe atayinkilili kunembo katandidwe aanguwe. 15 Ndasika kuti ndizoobuzye mwaami simalelaangu makani aaya, nkaambo bantu bakandiyoosya. Nkinkaako, ime ndimubelesi wako ndakati, ‘Leka ndikaambuule aamwaami. Amwi mwaami ulazichita nzyatakumbile muzike wakwe. 16 Mwaami ulakonzya kumuswiilila muzike wakwe akumuvuna kuzwa mukuboko kwamuntu uuyanda kutumana ime amwanaangu, kuchitila kuti tutajani lukono Leza ndwaakatupa.’ 17 Mubelesi wako wakati, ‘Majwi aamwaami simalelaangu aape kuti ndaangunuke,’ nkaambo mwaami simalelaangu uli mbuli ngilozi yaLeza wakasimpe kukusiyanisya chibotu achibi. Jehova Leza wako abe aanduwe.”
18 Mwaami wakati kumwanakazi ooyo: “Utandisisili kufumbwa nchinditakubuzye.” Mwanakazi ooyo wakati: “Mwaami simalelaangu aambe.” 19 Mwaami wakabuzya kuti: “Jowabbu nguwe na wakubuzya makani woonse aaya?” Mwanakazi ooyo wakasandula kati: “Kwaamba choonzyo, mbuli mbuuli muumi mwaami simalelaangu, mbubo loko mbaamba* mwaami simalelaangu, nkaambo mubelesi wako Jowabbu nguwe wandilayilila oobu akubikka majwi woonse aaya munkanwa lyamubelesi wako. 20 Mubelesi wako Jowabbu wachita zintu eezi kuti achinche nzila mwaami njalikuzibonaayo zintu, pesi simalelaangu uli aabusongo buli mbuli bwangilozi yaLeza wakasimpe alubo ulizizi zintu zyoonse zilikuchitika munyika.”
21 Mpawo mwaami wakati kuli Jowabbu: “Ndamvwa, ndilazichita zintu eezi. Yinka ukamweete Abbisalomu.” 22 Mpawo Jowabbu wakavuntama busyu kabulangide aansi mpawo wakalumbayizya mwaami. Jowabbu wakati: “Sunu, O mwaami simalelaangu, mubelesi wako waziba kuti wafwidwa luzyalo mumeso aako, nkaambo mwaami wachita nzyaakumbila mubelesi wakwe.” 23 Kuzwa waawo, Jowabbu wakanyampuka wayinka kuGeshuri waakweeta Abbisalomu kuJerusalema. 24 Nikuba oobo, mwaami wakati: “Ayinke kung’anda yakwe, atabuboni pe busyu bwangu.” Nkinkaako, Abbisalomu wakayinka kung’anda yakwe alubo taakabubona pe busyu bwamwaami.
25 Lino mu-Israyeli yoonse, taakwe mwaalumi wakali kulumbayizigwa loko akaambo kabubotu bwakwe mbuli Abbisalomu. Kuzwa kundyato kusika kumutwe, taakwe nchaakali kusolwaacho pe. 26 Naakali kugela masusu aamumutwe wakwe, wakali kwaagela kumamanino aamunyaka umwi awumwi, nkaambo akali kumulemena. Masusu aamumutwe wakwe akali kulema mashekeli aali 200,* kweendelana abbwe lyamwaami lyakupima* zintu. 27 Abbisalomu wakali aabana balombe batatu amusimbi uumwi wakali kutegwa Tamari. Tamari wakali mwanakazi mubotu loko.
28 Abbisalomu wakayinkilila kunembo kakkala muJerusalema kwaminyaka iibili iizwide, pesi taakabubona pe busyu bwamwaami. 29 Nkinkaako, Abbisalomu wakayita Jowabbu kuti amutume kumwaami, pesi Jowabbu taakayinka pe. Wakamwiita lubo kachibili, pesi wakakaka kwiinka. 30 Kumamanino, wakati kubabelesi bakwe: “Muunda waJowabbu uli aafwiifwi amuunda wangu alubo ulimide bbali. Amwiinke mukawutente aamulilo.” Nkinkaako, babelesi ba-Abbisalomu bakawutenta aamulilo muunda ooyo. 31 Mpawo Jowabbu wakanyampuka wayinka kung’anda ya-Abbisalomu waakumubuzya kuti: “Nkamboonzi babelesi bako nibatenta muunda wangu amulilo?” 32 Abbisalomu wakasandula Jowabbu kati: “Bona! Ndakatuma bantu kuti bazookubuzye kuti, ‘Kuza ndikutume kumwaami ukaakubuzye kuti: “Nkamboonzi biya nindakazwa kuGeshuri? Kaansinga ndakakkala biyo nkukooko. Lino ndiyanda kubona busyu bwamwaami, kuti kandili aamulandu, mwaami weelede kundijaya.”’”
33 Nkinkaako, Jowabbu wakayinka mwaakabede mwaami waakumubuzya makani aaya. Kuzwa waawo, mwaami wakayita Abbisalomu mpawo wakanjila mwaakabede mwaami wavuntama kunembo lyakwe busyu kabulangide aansi. Mpawo mwaami wakamyonta Abbisalomu.