Milimu yaBaapostoli
22 “Nibaalumi, nibeenzuma animatata, amuswiilile ndilisandwide.” 2 Nibakamvwa kuti wakali kwaambuula aambabo muchiHebberu, bakawumuna bati wii, mpawo wakati: 3 “Ndili muJuda wakazyalilwa muTaso yakuKkilikkiya pesi ndakayiisigwa aaGamaliyeli mumuunzi nguyooyu. Ndakayiisigwa kutobela Mulawu wamasianene buzwide akuba musungu mukubelekela Leza mbuli mbumulikuchita andinywe moonse sunu. 4 Ndakali kupenzya Banzila Eeyi kusikila aakubajaya biya, kandisunga baalumi abanakazi akubatola kumajele. 5 Mupayizi mupati abaalu boonse bamunkuta balaazi makani aaya. Magwalo aakutola kubapati bachiJuda bakuDamasikko ndakaajana kulimbabo, alubo ndakali munzila kuti ndikasunge bakali nkukooko kuti ndibeete kuJerusalema kuti bazoosubulwe.
6 “Pesi nindakachili munzila, kandili ndaba aafwiifwi kusika kuDamasikko, zuba kalili aakalangabweeseme, aachiindi nchicheecho, mumuni mupati uuzwa kujulu wakamweka ndawu yoonse mpundakabede, 7 mpawo ndakawidaansi, alubo ndakamvwa jwi lyakati kulindime: ‘Sawulu, Sawulu, undipenzezyaanzi?’ 8 Mpawo ndakati: ‘Nduweni Mwaami?’ Mpawo wakati kulindime: ‘Ndime Jesu wakuNazareta ngulikupenzya.’ 9 Baalumi mbindakali kweendaabo bakawubona mumuni, pesi teebakalimvwa pe jwi lyamuntu wakali kwaambuula aandime. 10 Mpawo ndakati: ‘Ndeelede kuchitaanzi Mwaami?’ Mpawo Mwaami wakati kulindime: ‘Nyampuka unjile muDamasikko mpawo uzoobuzigwa zintu zyoonse nzwaakasalilwa kuchita.’ 11 Pesi mbukunga taakwe chintu nchindakachili kubona pe akaambo kakumweka kupati kwamumuni ooyo, ndakasika kuDamasikko kandijiswi kuboko abantu mbindakali kweendaabo.
12 “Mpawo umwi mwaalumi uutegwa Ananiya, ooyo wakali kuyoowa Leza kweendelana aMulawu, alubo wakalaampuwo mbotu kumaJuda boonse bakali kukkala nkukooko, 13 wakasika kulindime. Wakayimikila munsi lyangu mpawo wakati kulindime: ‘Sawulu mukombima, meso aako aabone lubo!’ Aachiindi nchicheecho, ndakalanga mpawo ndakamubona. 14 Mpawo wakati: ‘Leza wamasianene wakusala kuti uzibe kuyanda kwakwe akuti ubone ooyo uululeme akumvwa jwi lyamulomo wakwe, 15 nkaambo weelede kuba kamboni wakwe kubantu boonse atala azintu nzwaakabona akumvwa. 16 Uchilindaanzi? Nyampuka ubbabbatizigwe alubo ulisalazye kuzibi zyako kwiinda mukwiita zina lyakwe.’
17 “Pesi nindakabweeda kuJerusalema alubo nindakali kukomba mutempele, ndakabona chilengaano, 18 ndakamubona kalikundibuzya kuti: ‘Fwambaana uzwe muJerusalema, nkaambo tabakoobutambula pe bukamboni bwako atala andime.’ 19 Mpawo ndakati: ‘Mwaami, bantu aaba bazizi kabotu kuti, bantu basyoma mulinduwe ndakali kubawaalila mujele akubawuma loko muchikombelo chimwi achimwi. 20 Alubo chiindi ganzi lyakamboni wako Stefani nilyakalikutika, ndakaliimvwi kandilikuzuminana aanzizyo, kandilindide zigogo zyaajulu zyabantu bakali kumujaya.’ 21 Nikuba oobo, wakati kulindime: ‘Yinka, nkaambo ndizookutuma kuzisi zili kule loko.’”
22 Bantu bakali kumuswiilila kusikila naakaamba jwi eeli. Mpawo bakoompolola kabati: “Amumugwisye muntu ooyu aanyika, nkaambo teelede kupona pe!” 23 Akaambo kakuti bakali koompolola loko, kabalikusowa zigogo zyabo zyaajulu akutatuula lusuko mujulu, 24 mweendelezi wamasoja wakalayilila kuti Pawulu atolwe kunkambi yamasoja, abuzisisigwe kalikukwibbuulwa, kuchitila kuti mweendelezi azibe kuti nkamboonzi bantu nibakali kukalalila Pawulu munzila iili boobu. 25 Pesi nibakamusunga kuti bamuume, Pawulu wakabuzya mupati wamasoja wakayimvwi mpawaawo kuti: “Kulazumizigwa na kukwibbuula muRoma katakwe mulandu?”* 26 Mpawo mupati wamasoja naakamvwa oobo, wakayinka kumweendelezi wamasoja mpawo wakati: “Uyanda kuchitaanzi? Mwaalumi ooyu muRoma.” 27 Nkinkaako, mweendelezi wamasoja wakayinka nkwaakabede Pawulu, alubo wakamubuzya kuti: “Ndibuzye, ulimuRoma na?” Wakati: “Iiyi.” 28 Mweendelezi wamasoja wakati kulinguwe: “Ime ndakazyuula aamali nyingi loko zyeelelo zyakuba sichisi.” Pawulu wakati: “Pesi ime ndakazyalwa kandilaazyo.”
29 Nkinkaako, aachiindi nchicheecho, baalumi bakali kuyanda kumubuzisisya kabalikumuuma, bakasosoloka mpawo mweendelezi wamasoja wakayoowa naakaziba kuti Pawulu wakali muRoma akuti wakali wamusunga aancheni.
30 Nkinkaako, mubuzuba bwakatobela, akaambo kakuti wakali kuyanda kuziba kuti nkamboonzi maJuda nibakali kumupa mulandu, wakamwaangununa akulayilila bapati babapayizi abaalu bamuNkuta Mpati yamaJuda kuti babungane. Mpawo wakaselusya Pawulu akumwiimikizya aakati kabo.