Milimu yaBaapostoli
25 Nkinkaako, Festo naakasika muchilikiti, wakasaanguna kweendelezya alubo nikwakayinda mazuba aatatu, wakazwa kuKkesariya mpawo wakatanta kaya kuJerusalema. 2 Bapati babapayizi abaalumi bamaJuda balemekwa, bakabuzya Festo twaambo ntubakali kutamikizya Pawulu. Mpawo bakasaanguna kukombelezya Festo 3 kuti abachitile nzibayanda kwiinda mukwiita Pawulu kuti aze kuJerusalema. Pesi bakakanzide kuti bamubwatilile munzila mpawo bamujaye. 4 Nikuba oobo, Festo wakati Pawulu wakeelede kukkala kuKkesariya, akuti we lwakwe wakali kuyanda kubweeda muchiindi chifwiifwi nkukooko. 5 Nkinkaako wakati: “Aabo bali mubweendelezi aakati kanu, abakunuke aamwi andime mpawo bakaambe twaambo ntubalaato atala amwaalumi ooyu, kuti kakuli kuli chintu nchaakabisya choonzyo.”
6 Nkinkaako, naakakkala aambabo kwamazuba aatayindi kuli aali musanu aatatu naakuti aali kkumi, wakakunuka waya kuKkesariya. Alubo mubuzuba bwakatobela, wakakkala aachuuno chakwe chakubetekela, mpawo wakalayilila kuti Pawulu ayetwe. 7 Naakanjila, maJuda bakasikide kabazwa kuJerusalema bakamubunganina mpawo bakamutamikizya milandu myiingi alubo mipati njibakatali kukonzya pe kutondeezya kuti njachoonzyo.
8 Pesi Pawulu wakalisandwida kati: “Taakwe chibi nchindakachita pe kweendelana aMulawu wamaJuda, tempele, naakuti aKkesari.” 9 Akaambo kakuti Festo wakali kuyanda kuti maJuda bamuyande, wakabuzya Pawulu kuti: “Ulayanda na kuya kuJerusalema kuti ukabetekwe atala atwaambo ootu kunembo lyangu?” 10 Pesi Pawulu wakati: “Ndiimvwi kunembo lyachuuno chakubetekelwa chaKkesari, aawo mpundeelede kubetekelwa. Taakwe chibi nchindakabisizya maJuda, mbuli mbuyabuzibona anduwe. 11 Kuti kakuli ndakabisya choonzyo alubo kuti kakuli ndakachita chintu cheelede kupa kuti ndijayigwe, tandilikukombelela kuti nditajayigwi pe. Pesi kuti kakutakwe bukamboni kutwaambo ntubalikunditamikizya baalumi aaba, taakwe muntu ulaacheelelo chakunditola kulimbabo kuti ababotezye. Kaambo kangu ndikatola kuli Kkesari!” 12 Mpawo Festo naakamaninsya kwaambuula ankamu yabasikumupa malayilile, wakabuzya Pawulu kuti: “Mbukunga wati uyanda kutola kaambo kako kuli Kkesari, ulayinka kuli Kkesari.”
13 Nikwakayinda mazuba, mwaami Agripa aBbenisi, bakaswaya Festo kuKkesariya. 14 Mbukunga bakali kuyookkala kwamazuba, Festo wakabuzya mwaami atala akaambo kaPawulu kati:
“Kuli mwaalumi wakasiigwa kali musungwa aFelekisi. 15 Nindakali kuJerusalema, bapati babapayizi abaalu bamaJuda bakandibuzya makani atala amwaalumi ooyo kabandikumbila kuti ndimubeteke akuti ndimujanine mulandu. 16 Pesi ndakababuzya kuti mulawu wamaRoma tawuzumini pe kuti sikutamikizigwa atolwe kuli basikumupa mulandu kuti ababotezye. Pesi sikutamikizigwa weelede kulangana aabantu balikumupa mulandu mpawo apegwe mweenya wakulisandwida kutwaambo ntubali kumutamikizya. 17 Nibakasika teendakanonoka pe, pesi mubuzuba bwakatobela ndakakkala aachuuno changu chakubetekela mpawo ndakalayilila kuti mwaalumi ooyo ayetwe. 18 Basikumutamikizya nibakayimikila, taakwe milandu njibakaamba kuzintu zibi nzindakali kuyeeyela kuti mwaalumi ooyo wakazichita. 19 Pesi bakali kukazyania biyo atala anzila njibamukombaayo leza wabo* alubo bakali kukazyania atala awumwi mwaalumi wakafwa uutegwa Jesu, pesi Pawulu ngwaakali kwaamba kuti muumi. 20 Mbukunga teendakazi pe kuti ndakeelede kuchita biyeni atala anzibakali kukazyania, ndakabuzya mwaalumi ooyo kuti wakali kuyanda na kwiinka kuJerusalema, kuchitila kuti kaambo kakwe kakabetekelwe nkukooko. 21 Pesi Pawulu naakakumbila kuti akkale kasungidwe kalikulindila nzyatasale Mwaami Mupati,* ndakalayilila kuti akkale mumoomo kusikila ndizoomutumizye kuli Kkesari.”
22 Mpawo Agripa wakati kuli Festo: “Ndiyanda kulimvwida nzyataambe mwaalumi ooyo.” Mpawo Festo wakati: “Uzoomumvwa juunza.” 23 Nkinkaako mubuzuba bwakatobela, Agripa aBbenisi bakasika kabalikulisumpula loko, mpawo bakanjila munkuta kabalaamwi abeendelezi bamasoja abaalumi bamumuunzi balaampuwo. Festo wakalayilila kuti Pawulu ayitwe mpawo wakasika. 24 Mpawo Festo wakati: “Mwaami Agripa, andinywe moonse nimulaamwi andiswe, mwaalumi ooyu ngumubwene, ngunguwe maJuda boonse bakookuno abakuJerusalema ngubakandikombelezya akoompolola kabati teelede kupona pe. 25 Pesi ndakabona kuti taakwe chintu nchaakachita chinga chilapa kuti ayelele kujayigwa. Nkinkaako, mwaalumi ooyu naakakumbila kuti atole kaambo kakwe kuMwaami Mupati, ndakasala kumutumizya. 26 Pesi tandikwe chakulemba pe atala amwaalumi ooyu kuMwaami wangu. Nkinkaako, ndamweeta kunembo lyanu, kapati kulinduwe Mwaami Agripa, kuchitila kuti kaambo kakwe nikalangwa-langwa, ndijane zyakulemba. 27 Nkaambo ndabona kazitali kabotu pe kuti nditumizye musungwa kanditaambide twaambo ntubalikumutamikizya.”