Matalikilo

42 Jakkobo naakamvwa kuti kwakali zilyo ku-Ijipita, wakabuzya bana bakwe kuti: “Nkamboonzi nimulikulangana kupela?” 2 Wakayungizya kuti: “Ndakamvwa kuti ku-Ijipita kuli zilyo. Amukunukile nkuko mukatuulile zilyo kuchitila kuti tutafwi.” 3 Nkinkaako, bakulana baJosefa bali kkumi bakakunukila ku-Ijipita kuti bakawule zilyo. 4 Pesi Jakkobo taakamuzumizya pe Bbenjamini mwanike waJosefa kuti ayinkaamwi abakulana bakwe nkaambo wakati: “Kulakonzya kuchitika ngoozi iikonzya kumujaya.”

5 Nkinkaako, bana ba-Israyeli bakazaamwi abamwi bakali kuza kuzoowula zilyo, nkaambo nzala yakali yasika kunyika yaKkenani. 6 Josefa nguwe wakali kweendelezya munyika ya-Ijipita alubo nguwe wakali kuuzya zilyo kubantu boonse bamunyika. Nkinkaako, bakulana bakwe bakasika bamufugamina akuvuntama aansi kunembo lyakwe. 7 Josefa naakabona bakulana bakwe wakabuka aakubaziba, pesi wakalisisa kuti batamuzibi pe. Nkinkaako, wakabakalalila kati: “Muzwa kuli?” Mpawo bakati: “Twazwa kunyika yaKkenani kuti tuzoowule zilyo.”

8 Josefa wakabaziba bakulana bakwe pesi bo teebakamuziba pe. 9 Aachiindi eecho, Josefa wakayeeya ziloto nzyaakalotede atala ambabo mpawo wakati kulimbabo: “Mulibasikulanga-langa nyika! Mwaza kuzoolanga-langa nyika yesu mwiitakwabililidwe!”* 10 Bakati kulinguwe: “Peepe, simaleleesu, tubabelesi bako twaza kuzoowula chakulya biyo. 11 Toonse tuli bana bamuntu uumwi. Tulibantu baluleme. Tubabelesi bako tatuli basikulanga-langa nyika pe.” 12 Pesi wakati kulimbabo: “Mulabeja! Mwaza kuzoolanga-langa nyika yesu mwiitakwabililidwe!” 13 Mpawo bakati: “Tubabelesi bako tuzyedwe katuli bana balombe bali 12. Tuli bana bamuntu uumwi munyika yaKkenani. Alubo mwanikeesu wasyaala aandeende pesi umwi tachiwo pe.”

14 Nikuba oobo, Josefa wakati kulimbabo: “Mbuli mbundaamba kale, ‘Mulibasikulanga-langa nyika!’ 15 Ndiyanda kumusunka azeezi: Mbuli Faro mbali muumi, tamukoozwa pe aandawu eeyi kusikila mwanike wanu asike. 16 Amutume umwi akeete mwanike wanu, mpawo inywe musyaale kamusungidwe. Munzila eeyi, ndilabona kuti nzimwaamba nzyachoonzyo na. Kuti kamuli kubeja, mbuli Faro mbali muumi, zyaamba kuti mulibasikulanga-langa.” 17 Kuzwa waawo, wakabasunga, wabajalila kabalaamwi kwamazuba aatatu.

18 Mubuzuba bwachitatu, Josefa wakati kulimbabo: “Amuchite eezi, mupone nkaambo ime ndilamuyoowa Leza. 19 Kuti kamululeme, umwi wanu asyaale kajalilidwe mung’anda mujalilwa bantu, pesi inywe moonse amwiinke mutole zilyo kuchitila kuti mukamaninsye nzala iili mumaanda aanu. 20 Mpawo mweete mwanike wanu kulindime kuchitila kuti kuboneke kuti nzimwaamba nzyachoonzyo mpawo tamukoofwa pe.” Bakachita mbuboobo.

21 Mpawo bakasaanguna kubuzyania kuti: “Kwaamba choonzyo, tulikusubulwa akaambo kamwanikeesu, nkaambo twakaabona mapenzi aakwe* naakali kutukombelezya kuti tumufwide luzyalo, pesi teetwakaswiilila pe. Nchaatusikila mapenzi aaya.” 22 Mpawo Rubbeni wakabasandula kuti: “Teendakamubuzya na kuti, ‘Mutamuchitili chintu chibi mwana,’ pesi teemwakaswiilila pe? Lino ganzi lyakwe lyaza aalindiswe.” 23 Pesi teebakazi pe kuti Josefa wakalizimvwide nzibakali kwaambuula nkaambo naakali kwaambuulaabo, kwakali sikutolekela. 24 Nkinkaako, wakazwa mpubakabede mpawo wakasaanguna kulila. Naakabweeda wakaambuulaabo lubo, wabweza Simiyoni aakati kabo mpawo wamusunga boonse kabalangide. 25 Mpawo Josefa wakalayilila kuti masaka aabo azuzigwe chakulya alubo wakabweedezya mali yawumwi awumwi musaka lyakwe mpawo bakapegwa chakulya chamulweendo. Eezi nzizyo nzibakachitilwa.

26 Nkinkaako, bakabweza zilyo zyabo, bazibikka aamadonki aabo mpawo bakazwa mpawaawo. 27 Umwi wabo naakajula saka lyakwe kuti ape donki lyakwe chakulya mundawu yakupumwida, wakabona mali yakwe aamulomo wasaka lyakwe. 28 Mpawo wakabuzya bananyina kuti: “Mali yangu yaboozegwa, njeyi musaka lyangu!” Bakazwa moyo, bakankama mpawo bakalangana akwaamba kuti: “Niinzi eechi Leza nchaatuchitila?”

29 Nibakasika kuli Jakkobo wisi munyika yaKkenani, bakamubuzya zintu zyoonse zyakali zyabachitikila, kabati: 30 “Mwaalumi weendelezya nyika eeyo watukalalila alubo watutamikizya kuti tuli basikulanga-langa nyika. 31 Pesi twamubuzya kuti, ‘Tuli bantu baluleme. Tatuli basikulanga-langa nyika pe. 32 Tuzyedwe katuli bana balombe bali 12 kuli ndeende. Umwi tachiwo pe mpawo keela kasyaala aandeende munyika yaKkenani.’ 33 Pesi mwaalumi weendelezya nyika eeyo watubuzya kuti, ‘Tulabona kuti muliluleme kuti mwachita eechi: Umwi wanu asyaale aandime mpawo mubweze chakulya mwiinke mukamaninsye nzala mumaanda aanu. 34 Mpawo mundeetele keela kanu kuchitila kuti ndizibe kuti tamuli basikulanga-langa nyika pe, pesi muli bantu baluleme. Mpawo ndilamuboozya mwananyokwe alubo mulakonzya kuula nzimuyanda munyika eeyi.’”

35 Nibakali kupimpa masaka aabo, umwi awumwi wabo wakajana chikwama chamali musaka lyakwe. Baalumi aaba awisi nibakabona zikwama zyamali, bakayoowa. 36 Mpawo Jakkobo wisi wakati kulimbabo: “Mwandimanina bana! Josefa tachiwo aSimiyoni tachiwo mpawo lino muyanda kubweza Bbenjamini! Mapenzi aaya woonse alangene aandime!” 37 Pesi Rubbeni wakati kuli wisi: “Kuti teendamuboozya, ujaye bana bangu babili. Mweete abe mumaboko aangu mpawo ndilamuboozya kulinduwe.” 38 Nikuba oobo, wakati: “Mwanaangu takooyinka aandinywe pe nkaambo mukulanaakwe wakafwa alubo lino usyeede aalikke. Kuti mulweendo lwanu kukachitike ngoozi mpawo mwanaangu afwe, kwaamba choonzyo muzoopa kuti ndinjile muKabanda* amvwi zyangu kanduuside.”