Kulonga
18 Jeturo mupayizi wakuMidiyani, wisizyala waMozesi wakazimvwa zyoonse Leza nzyaakachitila Mozesi abantu bakwe ma-Israyeli aJehova mbaakagwisya ma-Israyeli mu-Ijipita. 2 Jeturo, wisizyala waMozesi, wakakkala aaZipora mwanakazi waMozesi ooyo Mozesi ngwaakali watola kulinguwe 3 abana bakwe balombe babili. Umwi wakamuuzika kuti Geshomu* nkaambo Mozesi wakati: “Ndaba mweenzu munyika yabweenzu,” 4 mpawo umwi wakamuuzika kuti Eliyeza* nkaambo wakati: “Leza wamataata mugwasyi wangu, wakandivuna kupanga lyaFaro.”
5 Jeturo wisizyala waMozesi kalaamwi abana baMozesi amwanakazi wakwe bakasika kuli Mozesi munkanda nkwaakakkempede aachilundu chaLeza wakasimpe. 6 Wakatuma jwi kuli Mozesi lyakuti: “Ime ndiJeturo wusozyala, ndilikuza kulinduwe amwanakazi wako abana bako babili.” 7 Mozesi wakayinka kuyootambula wisizyala. Naakasika, wakavuntama akumumyonta. Mpawo bakajuzyana akubuzyania mbubakali kupona, kuzwa waawo, bakanjila mutente.
8 Mozesi wakabuzya wisizyala zintu zyoonse Jehova nzyaakachita kuli Faro aku-Ijipita akaambo kama-Israyeli abuyumu-yumu boonse mbubakaswaana munzila ambaakabavuna Jehova. 9 Jeturo wakabotelwa akaambo kazintu zyoonse zibotu Jehova nzyaakachitila ma-Israyeli naakabavuna mu-Ijipita.* 10 Mpawo Jeturo wakati: “Atembawulwe Jehova ooyo wakamufutula ku-Ijipita akuli Faro alubo wakafutula bantu kubweendelezi bwa-Ijipita. 11 Lino ndaziba kuti Jehova mupati kwiinda baleza boonse akaambo kazintu nzyaakachitila aabo bakali kulisumpula akubajata chalunya bantu bakwe.” 12 Mpawo Jeturo wisizyala waMozesi wakeeta chipo chitentwa azipayizyo kuli Leza. Aroni abaalu boonse bamu-Israyeli bakasika kuti bazoolye aamwi awisizyala waMozesi kunembo lyaLeza wakasimpe.
13 Mubuzuba bwakatobela, Mozesi wakakkala aansi kuti abeteke bantu mbuli mazuba woonse. Mpawo bantu bakali kwiimikila kunembo lyaMozesi kuzwa kuseeni kusika goko. 14 Wisizyala waMozesi naakabona zintu zyoonse nzyaakali kuchitila bantu, wakati: “Niinzi eechi nchulikuchitila bantu? Nkamboonzi nukkede aawulikke bantu boonse kabayimvwi kunembo lyako kuzwa kuseeni kusika goko?” 15 Mozesi wakati kuli wisizyala: “Bantu balikusika kulindime kuti ndibabuzizye makani kuli Leza. 16 Kuti kwabuka kaambo mpawo kasika kulindime, ndilababeteka bantu bali aakaambo aako alubo ndime ndibabuzya zyasalwa aaLeza wakasimpe amilawu yakwe.”
17 Wisizyala waMozesi wakati kulinguwe: “Nzuchita tazili kabotu pe. 18 Kwaamba choonzyo, iwe abantu mbulaabo, mulaminwa nkaambo mulimu ooyu mupati, tukonzyi pe kuuchita aawulikke. 19 Ndipe kutwi ndikubuzye nzweelede kuchita, Leza ulaba aanduwe. Weelede kuba mwiiminini wabantu kuli Leza wakasimpe, utole twaambo twabo kuli Leza wakasimpe. 20 Weelede kubabuzya malayilile amilawu anzila njibeelede kweenda mulinjiyo amulimu ngubeelede kuchita. 21 Sala baalumi bazi kubeteka, bayoowa Leza, basyomeka, batayandi kulijanina zintu chakutasyomeka. Babikke kuti babe basilutwe babantu bali zyuulu, bali myaanda, bali makumi aali musanu abamakumi. 22 Banoobeteka bantu kuti kwabuka kaambo,* pesi twaambo tuyumu toonse banootweeta kulinduwe, pesi tumwi toonse tuniini banootubeteka. Lyuubisizye kwiinda mukubapa imwi milimu kuti bakugwasye. 23 Kuti wachita oobo alubo kuti kazyeendelana aakuyanda kwaLeza, ulakonzya kuuchita mulimu ooyu alubo bantu bazoobweeda kumaanda aabo muluumuno.”
24 Mozesi wakamuswiilila wisizyala alubo wakachita zintu zyoonse nzyaakamubuzya. 25 Wakasala baalumi bazi kubeteka aakati kama-Israyeli boonse mpawo wakababikka kuba basilutwe babantu bali zyuulu, bali myaanda, bali makumi aali musanu abamakumi. 26 Bakali kubeteka bantu nikwakali kubuka twaambo. Kaambo kayumu bakali kukatola kuli Mozesi, pesi twaambo tuniini toonse bakali kutubeteka. 27 Mozesi wakalayana awisizyala mpawo wisizyala wakabweeda kunyika yakulimbabo.