Kulonga
8 Mpawo Jehova wakati kuli Mozesi: “Yinka kuli Faro ukamubuzye kuti, ‘Nzezi nzyaamba Jehova: “Leka bantu bangu beende, kuchitila kuti bakandibelekele. 2 Kuti kuswini kubakasya kuti beende, ndilapenzya chilawu chako choonse abachulwa. 3 Bachulwa bayoozula muMulonga waNayile mpawo balazwa banjile mung’anda yako yakoona, aabulo bwako, mumaanda aababelesi bako akubantu bako, mumawoveni aako amuzikandilo zyako zyafulawa. 4 Bachulwa bazookusikila alubo bazoosikila babelesi bako boonse.”’”
5 Jehova wakati kuli Mozesi: “Buzya Aroni kuti, ‘Tandabika kuboko kwako kujisi mufunko aajulu aamilonga, aamigelo yaNayile aamalambwa alubo upe kuti bachulwa baze aanyika ya-Ijipita.’” 6 Aroni wakatandabika kuboko aajulu aamaanzi aamu-Ijipita mpawo bachulwa bakasaanguna kuzwa akuvumba nyika ya-Ijipita. 7 Pesi bapayizi basimasalamusi ambabo bakachita zikozyenie kababelesya masalamusi aabo, bakapa kuti kube bachulwa munyika ya-Ijipita. 8 Mpawo Faro wakayita Mozesi a-Aroni wababuzya kuti: “Amukombelezye Jehova kuti agwisye bachulwa bali aakati kangu akubantu bangu, nkaambo ndiyanda kuleka bantu kuti beende bakape zipayizyo kuli Jehova.” 9 Mpawo Mozesi wakati kuli Faro: “Ndizisiila kuli nduwe kuti undibuzye kuti uyanda kuti ndikakombelezye lili kuti bachulwa bagwisigwe kuli nduwe, kubabelesi bako, kubantu bako amumaanda aako, pesi balasyaala muMulonga waNayile kupela.” 10 Faro wakati: “Juunza.” Mpawo Mozesi wakati: “Zizoochitika mbuli mbuwaamba, kuchitila kuti uzibe kuti taakwe uuli mbuli Jehova Leza wesu pe. 11 Bachulwa bazoozwa kulinduwe, mumaanda aako, kubabelesi bako akubantu bako, balasyaala muli Nayile kupela.”
12 Mozesi a-Aroni bakazwa kuli Faro alubo Mozesi wakakombelezya Jehova kuti agwisye bachulwa mbaakali weetela Faro. 13 Jehova wakachita kweendelana azyakali zyakumbilwa aaMozesi alubo bachulwa bakasaanguna kufwa mumaanda, mumabuwa amundawu yoonse. 14 Bakabalundika mumilwi myiingi alubo nyika eeyo yakasaanguna kununka. 15 Faro naakabona kuti zyaba kabotu, wakayumya moyo alubo taakabaswiilila pe mbuli mbaakaambide Jehova.
16 Jehova wakati kuli Mozesi: “Buzya Aroni kuti, ‘Tandabika mufunko wako, uume lusuko lwanyika mpawo lulaba mansenya munyika yoonse ya-Ijipita.’” 17 Bakachita oobo. Aroni wakatandabika kuboko kwakwe kwakajisi mufunko akuuma lusuko lwanyika mpawo mansenya akazida bantu abanyama. Lusuko loonse lwanyika lwakaba mansenya munyika yoonse ya-Ijipita. 18 Bapayizi basimasalamusi bakeezya kuchita zikozyenie kuti bape kuti kube mansenya kababelesya masalamusi aabo, pesi bakakachilwa. Mansenya akazida bantu abanyama. 19 Nkinkaako, bapayizi basimasalamusi bakati kuli Faro: “Ooyu munwe waLeza.” Pesi Faro wakayinkilila kunembo kuyumya moyo alubo taakabaswiilila pe mbuli mbaakaambide Jehova.
20 Mpawo Jehova wakati kuli Mozesi: “Ubuke kuseeni ukayimikile kunembo lyaFaro. Lino bona! Ulazwa kaya kumulonga. Weelede kumubuzya kuti, ‘Jehova waamba kuti: “Leka bantu bangu beende, kuchitila kuti bakandibelekele. 21 Pesi kuti uleke kuzumizya bantu bangu kuti beende, ndilatuma mazimbwa* kulinduwe, kubabelesi bako, kubantu bako amumaanda aako. Maanda aamu-Ijipita azoozula mazimbwa alubo azoovumba nyika yoonse njibakkala. 22 Mubuzuba oobo, ndizoopambula nyika yaGosheni, ooko kukkala bantu bangu, taakwe mazimbwa aatazoojanike nkuko pe. Kwiinda muli zeezi, uzooziba kuti ime ndiJehova, mundili munyika eeyi. 23 Ndizoopa kuti kube musiyano aakati kabantu bangu abantu bako. Chitondeezyo eechi chilachitika juunza.”’”
24 Jehova wakachita mbuboobo, mazimbwa miingi loko akasaanguna kunjila mung’anda yaFaro amumaanda ababelesi bakwe amunyika yoonse ya-Ijipita. Nyika yakanyonyoonwa amazimbwa. 25 Kumamanino, Faro wakayita Mozesi a-Aroni mpawo wakababuzya kuti: “Amweende mukape chipayizyo kuli Leza wanu munyika njiyeeyi.” 26 Pesi Mozesi wakati: “Tazili kabotu pe kuti tuchite oobo, nkaambo nzitutapayizye kuli Jehova Leza wesu zizoobasesemya ma-Ijipita. Kuti twapa chipayizyo chisesemya ma-Ijipita kabalangide, tabakootuuma aamabwe na? 27 Tulabweza lweendo lwamazuba aatatu kuya munkanda alubo tuyoopa zipayizyo kuli Jehova Leza wesu nkukooko mbuli mbaakatubuzya.”
28 Faro wakati: “Ndilamuleka kuti mweende mukape zipayizyo kuli Jehova Leza wanu munkanda, pesi mutayi kule pe. Amundikombelezezye kuli Leza wanu.” 29 Mozesi wakati: “Ndaabwiinka, ndiyookombelezya Jehova mpawo mazimbwa alazwa juunza kuli Faro, kubabelesi bakwe akubantu bakwe. Pesi Faro weelede kuleka kutweena* kwiinda mukukasya bantu kuti beende bakape zipayizyo kuli Jehova.” 30 Mpawo Mozesi wakazwa kuli Faro waakukombelezya Jehova. 31 Nkinkaako, Jehova wakachita kweendelana azyakaambwa aaMozesi. Mazimbwa akazwa kuli Faro, kubabelesi bakwe akubantu bakwe. Taakwe niliba limwi lyakasyaala. 32 Pesi Faro wakawuyumya lubo moyo wakwe alubo taakabaleka pe bantu kuti beende.