Kulonga
23 “Utamwayi makani aakubeja. Utabelekelaamwi asizibi kwiinda mukuba kamboni uuli aamakanze mabi. 2 Utatobeli bantu biingi mukuchita zibi alubo utapi kuti kaambo kabetekwe munzila iitaluleme kwiinda mukupa bukamboni kuti ubotezye bantu biingi.* 3 Utasaluuli pe nikuli kubetekwa kaambo kamuntu uufwaba.
4 “Kuti waswaana ng’ombe naakuti donki lyasinkondonyokwe kalisweekede, weelede kulitola kulinguwe. 5 Kuti wabona donki lyamuntu uukuzonda kalilimbidwe aazintu nzilinyampwide, utalisiyi pe mpawo wiinde biyo, pesi weelede kumugwasya kwiinda mukulilimbununa.
6 “Utabeteki kaambo kamuntu uufwaba munzila iitali njiyo.
7 “Utanjilili makani aakubejelezya alubo utajayi muntu uutakwe mulandu amuntu uululeme, nkaambo muntu mubi tandikamwaambi kuti uliluleme.
8 “Utatambuli chisinkamulomo nkaambo chiloofwaazya alubo chilakonzya kupa kuti baluleme bachinchulule twaambo.
9 “Utadyaaminini mweenzu. Mulikuzi mbukubede kuba mweenzu* nkaambo mwakali beenzu munyika ya-Ijipita.
10 “Weelede kubyala mbuto akutebula zilyo mumuunda wako kwaminyaka iili musanu awumwi. 11 Pesi mumunyaka wamusanu ayibili, toyelede kuulima pe, weelede kuusiya kupela mpawo bantu bafwaba bali aakati kabantu bako bazoolya zitazoomene mulinguwo mpawo nzibatazoosiye zizooligwa aabanyama bamusokwe. Eezi nzizyo nzweelede kuchita kumuunda wako wamisaansa awama-olifa.
12 “Weelede kuchita milimu yako mumazuba aali musanu awumwi, pesi mubuzuba bwamusanu aabili toyelede kubeleka pe, kuchitila kuti ng’ombe yako adonki lyako zipumune akuti mwana mulombe wamuzike wako wachanakazi amweenzu bafulwe aamoya.
13 “Mweelede kuchita zintu zyoonse nzindamubuzya, mutaambi mazina aabamwi baleza, taayelede kumvwigwa pe kumilomo yanu.
14 “Weelede kundichitila pobwe tutatu mumunyaka. 15 Weelede kuzoosekelela Pobwe lyaChinkwa Chitakwe Bumena. Uzoolya chinkwa chitakwe bumena kwamazuba aali musanu aabili aachiindi chibikkidwe mumweezi wa-Abbibbi* mbuli mbundakakulayilila, nkaambo nchichiindi nwaakazwa mu-Ijipita. Taakwe weelede kuza kunembo lyangu katakwe chintu. 16 Weelede kusekelela Pobwe lyaButebuzi* bwamichelo iisaanguna kubizwa njutabeleke, nwaalima myuunda yako. Weelede kuchita Pobwe lyaKubunganizya* kumamanino aamunyaka nubunganizya zintu nzwaakabeleka mumyuunda yako. 17 Baalumi boonse beelede kuza kunembo lyaJehova Mwaami wakasimpe tutatu amunyaka.
18 “Utapi ganzi lyachipayizyo changu aamwi achintu chili aabumena alubo mafuta aazipayizyo zyangu taayelede kusiigwa busiku boonse kusika kuseeni.
19 “Weelede kweeta michelo mibotu loko iisaanguna kubizwa mumuunda wako kung’anda yaJehova Leza wako.
“Utajiki mwana wampongo mumalili aabanyina.
20 “Ndilikutuma ngilozi kunembo lyanu kuti imukwabilile munzila akuti ikamusisye kundawu njindakamubambila. 21 Amwiiswiilile muchite nziimubuzya. Mutayipapili pe nkaambo tiikoomulekelela milandu yanu nkaambo zina lyangu lili mulinjiyo. 22 Pesi kuti mwaswiilila jwi lyayo akuchita zyoonse nzindimubuzya, ndizoobalwana basinkondonyokwe akukazya bamukazya. 23 Ngilozi yangu ileenda kunembo lyanu alubo izoomusisya kuma-Amori, kumaHeti, kumaPerezi, kumaKkenani, kumaHivi akumaJebbusi alubo ndizoobanyonyoona. 24 Tamweelede kukotamina baleza babo naakuti koongelezegwa kuti mubabelekele alubo tamweelede kutobelezya nzibachita. Pesi mweelede kunyonyoona zibumbwa zyabo mupwayuule mapila aabo aasalala. 25 Mweelede kubelekela Jehova Leza wanu alubo ndizoolongezya chinkwa chanu amaanzi aanu. Ndizoomugwisizya malwazi. 26 Banakazi bamunyika yanu tabazoosowi naakuti kutazyala alubo ndizoopa kuti moongole.
27 “Ndizoopa kuti bantu bamuyoowe kamutanasika alubo ndizoobanyongania bantu boonse mbimutazooswaane. Ndizoopa kuti muzunde basinkondonyokwe boonse akuti bamuchije.* 28 Ndizoopa kuti bamane manguzu* kamutanasika alubo maHivi, maKkenani amaHeti bazoomuchija. 29 Tandikoobatanda mumunyaka uumwi kunembo lyanu, kuchitila kuti nyika itabi tongo akuti banyama bamusokwe batamuvulili pe. 30 Ndizoobatanda kunembo lyanu mbichaani-mbichaani kusikila muvule mpawo mubweze nyika yoonse.
31 “Ndizoomubikkila mugaano kuzwa kuLwizi Lusalala kusika kulwizi lwamaFilisiti akuzwa kunkanda kusika kuMulonga,* nkaambo bantu bakkala munyika eeyo ndizoobabikka mumaboko aanu alubo muzoobatanda kunembo lyanu. 32 Utachiti chizuminano ambabo naakuti abaleza babo. 33 Tabeelede kukkala munyika yanu pe, nkaambo balapa kuti mundibisizye. Kuti mwakomba baleza babo, kwaamba choonzyo, kuzoomubeda kakole.”