Kulonga
37 Bbezaleli wakapanga Bbokesi lyamukoka. Lyakali kulampa makkiyubbiti* aabili ahafu, busasa bwalyo bwakali kkiyubbiti iimwi ahafu mpawo kuya mujulu lyakali kulampa kkiyubbiti iimwi ahafu. 2 Wakalizilulula aangolida iisalalisya mukati akunze mpawo wakalibikka mumpimpito wangolida uulizyunguluka. 3 Wakalipangila maring’i aane aangolida alubo wakaanamatika aajulu aamawulu aalyo aane. Maring’i aabili akali kubbazu limwi lyabbokesi mpawo amwi aabili akali kubbazu limbi. 4 Wakapanga tusamu twamukoka akutuzilulula aangolida. 5 Mpawo wakatunjizya mumaring’i aali kumabazu aaBbokesi, kuchitila kuti tube twakulinyampuzya.
6 Wakapanga chivunisyo changolida iisalalisya. Chakali kulampa makkiyubbiti aabili ahafu mpawo busasa bwacho bwakali kkiyubbiti iimwi ahafu. 7 Mpawo wakapanga makkerubbi aabili aangolida kumabazu aabili aachivunisyo kabelesya nsando. 8 Limwi lyakali kubbazu limwi alubo limwi lyakali kubbazu limbi. Wakapanga makkerubbi aaya kumabazu aabili aachivunisyo. 9 Makkerubbi aabili akajulide mababa aawo kaalangide mujulu kaavumbide chivunisyo. Makkerubi aaya akalilangene, pesi masyu aawo akalangide chivunisyo.
10 Wakapanga tebbulu lyamukoka lyakali kulampa makkiyubbiti aabili alubo lyakali aabusasa bwakkiyubbiti iimwi mpawo kuya mujulu lyakali kulampa kkiyubbiti iimwi ahafu. 11 Wakalizilulula aangolida iisalalisya mpawo wakapanga mumpimpito wangolida uulizyunguluka. 12 Wakapanga bbanti lizyunguluka tebbulu lili aabusasa bweelene aajaanza* alubo wakabikka tweengo twangolida tuzyunguluka mumpimpito ooyo. 13 Wakalipangila maring’i aane aangolida mpawo wakaabikka mumakkona aane, oomo mwakanjide mawulu aalyo aane. 14 Maring’i aayo akali aafwiifwi abbanti nkaambo mumo mwakali kuzoonjizigwa tusamu twakunyampuzya tebbulu. 15 Mpawo wakapanga tusamu twamukoka twakali kuzoobelesegwa kukunyampula tebbulu mpawo wakatuzilulula aangolida. 16 Wakabelesya ngolida iisalalisya kupanga madishi aalyo, nkomeki zyalyo, ndido zyalyo anongo zyalyo zyakali kuzoobelesegwa kukutila zipo zinywigwa.
17 Mpawo wakapanga chibikkilo chamalambe changolida iisalalisya kabelesya nsando. Chikkazikilo chacho, chisiko chacho, nkomeki zyacho, mpingu zyacho amaluba aacho, zyakali chintu chimwi chijisini. 18 Chakali aantabi zili musanu ayimwi zyakali kuzwa aachisiko chacho, ntabi zitatu zyakali kuzwa kubbazu limwi mpawo zimwi zitatu zyakali kuzwa kubbazu limbi. 19 Nkomeki zitatu zili mbuli maluba aamu-alumondi ampingu zitobelana aamaluba, zyakali kupanga ntabi zili kubbazu limwi mpawo nkomeki zitatu zili mbuli maluba aamu-alumondi ampingu zitobelana aamaluba, zyakali kupanga ntabi zili kubbazu limbi. Oobu mbuzyakabede ntabi zili musanu ayimwi zyakali kuzwa kuchisiko chachibikkilo chamalambe. 20 Alubo chisiko chachibikkilo chamalambe chakali aankomeki zine zili mbuli maluba aamu-alumondi ampingu zitobelana aamaluba. 21 Mpingu yakusaanguna yakali aansi aantabi zibili zyakusaanguna zizwa aachisiko, yachibili yakali aansi aantabi zibili zitobela alubo yachitatu yakali aansi aantabi zibili zitobela, nkaambo ntabi zili musanu ayimwi zyakali kuzwa aachisiko chachibikkilo chamalambe. 22 Mpingu antabi achibikkilo choonse chamalambe zyakali chintu chimwi chijisini changolida iisalalisya chakapangwa kakubelesegwa nsando. 23 Mpawo wakapanga malambe aacho aali musanu aabili azyakuzimya mulilo zyacho azyakubikkila makala zyacho kabelesya ngolida iisalalisya. 24 Wakachipanga aamwi azibelesyo zyacho zyoonse kabelesya talenta* limwi lyangolida iisalalisya.
25 Wakapanga chipayililo chamukoka chakutentela tununkilizyo. Chakali aamabazu aane aayelene. Chakali kulampa kkiyubbiti iimwi alubo busasa bwacho bwakali kkiyubbiti iimwi mpawo kuya mujulu chakali kulampa makkiyubbiti aabili alubo meja aacho akajisini aacho. 26 Wakachizilulula aangolida iisalalisya aajulu amumabazu aacho woonse ameja aacho alubo wakapanga mumpimpito wangolida uuchizyunguluka. 27 Wakapanga maring’i aangolida munsi aamumpimpito kubbazu limwi alimwi lyamabazu aabili aalangene, oomo mwakali kuzoonjizigwa tusamu twakali kuzoobelesegwa kukuchinyampula. 28 Mpawo wakapanga tusamu twamukoka akutuzilulula aangolida. 29 Alubo wakapanga mafuta aakunanika aasalala atununkilizyo tusalala twakaswaanizidwe kabotu-kabotu.*