Kulonga
39 Bakapanga zigogo zibotu zyakali kuzoobelesegwa mundawu iisalala kababelesya busumyo bwabbuluu, wulu yapepulu abusumyo busalala. Bakasuma zigogo zisalala zya-Aroni, mbuli Jehova mbaakalayilila Mozesi.
2 Wakapanga kabaki kabupayizi kabelesya ngolida, busumyo bwabbuluu, wulu yapepulu, busumyo busalala amulembo mubotu. 3 Wakapwaya ngolida ansando kusikila yapapalata mpawo wakayinengulula akupanga busumyo mbwaakasuminina aamulembo mubotu aamwi abusumyo bwabbuluu, wulu yapepulu abusumyo busalala. 4 Bakakapanga aatupanzi ntubakaswaanizya kumakwiko. 5 Bbanti lyakukasunga lyakasuminidwe aali nkako lyakapangidwe aazintu zikozyenie, nkukwaamba ngolida, busumyo bwabbuluu, wulu yapepulu, busumyo busalala amulembo mubotu, mbuli Jehova mbaakalayilila Mozesi.
6 Mpawo bakabikka mabwe aa-onikisi muzibikkilo zyangolida akwaalemba mazina aabana ba-Israyeli, mbuli mbuchilembwa chidindo. 7 Wakaabikka kumakwiko aakabaki kabupayizi, kuti abe mabwe aachiyubulusyo kubana ba-Israyeli, mbuli Jehova mbaakalayilila Mozesi. 8 Mpawo wakapanga kagogo kakukaango kalikuchita zyakusuminina, mbuli mbaakachita kukabaki kabupayizi. Wakabelesya ngolida, busumyo bwabbuluu, wulu yapepulu, busumyo busalala amulembo mubotu. 9 Nikakapetwa aakati, mabazu aako woonse akaleelene. Kagogo kakukaango nkibakapanga, kakali aabulamfu abusasa bweelene aajanza livungulwidwe.* 10 Bakakabikka minchali iine yamabwe. Munchali wakusaanguna wakali aabbwe lyarubbi, lyatopazi alya-emarawudi. 11 Munchali wachibili wakali aabbwe lyatekkoyisi, lyasafire alyajaspa. 12 Munchali wachitatu wakali aabbwe lyaleshemu, lya-agate alya-ametesiti. 13 Munchali wachine wakali aabbwe lyakkrisoliti, lya-onikisi alyajedi alubo akasekkedwe mutubikkilo twangolida. 14 Mabwe aaya akali kweendelana aamazina aabana ba-Israyeli bali 12. Akalembwa mbuli mbuchilembwa chidindo, izina limwi alimwi kalyiiminina umwi wamisyobo iili 12.
15 Mpawo kagogo kakukaango bakakapangila ncheni zyoosedwe zili mbuli ntambo zyangolida iisalalisya. 16 Bakapanga zibikkilo zyangolida zibili amaring’i aabili aangolida mpawo bakaabikka mumakkona aabili aakagogo kakukaango. 17 Mpawo bakanjizya ntambo zibili zyangolida mumaring’i aabili aangolida aali mumakkona aakagogo kakukaango. 18 Mpawo bakanjizya ntambo zibili nkuzili kumamanino mutubikkilo tubili alubo bakazisunga kumakwiko, kunembo aakabaki kabupayizi. 19 Mpawo bakapanga maring’i aabili aangolida akwaabikka mumakkona aabili aakagogo kakukaango mukali mukati, aajulu aakabaki kabupayizi. 20 Mpawo bakapanga amwi maring’i aabili aangolida baabikka kunembo aakabaki kabupayizi, aajulu aabbanti lyakusunga kabaki kabupayizi. 21 Kumamanino, bakaanga kagogo kakukaango antambo yabbuluu yakali kuzwa mumaring’i aako kiiya mumaring’i aakabaki kabupayizi, kuchitila kuti kagogo kakukaango katazwi pe aandawu yako, aajulu aakabaki kabupayizi abbanti, mbuli Jehova mbaakalayilila Mozesi.
22 Mpawo wakapanga jansi lyakabaki kabupayizi litakwe maboko kabelesya busumyo bwabbuluu kupela. 23 Jansi eeli litakwe maboko lyakali aabbanga lyakunjizizya mutwe aakati kalyo, lili mbuli lyakabaki kansimbi kakunkondo alubo lyakali aamupeto uulizyunguluka kuchitila kuti litadeluki. 24 Mpawo kumupeto wajansi litakwe maboko, bakapanga mapomegraneti kababelesya busumyo bwabbuluu, wulu yapepulu abusumyo busalala boosedwe aamwi. 25 Bakapanga tulangu twangolida iisalalisya akutubikka aakati kamapomegraneti kuzyunguluka mupeto wajansi litakwe maboko, aakati kamapomegraneti. 26 Bakatobelanisya kalangu amapomegraneti, bakali kuti aawa kalangu mpawo kutobele pomegraneti kumupeto woonse wajansi litakwe maboko lyakali kubelesegwa kuchita mulimu wabupayizi, mbuli Jehova mbaakalayilila Mozesi.
27 Bakasumina Aroni abana bakwe zigogo zilamfu zyamulembo mubotu wakapangwa aasikupanga milembo 28 angwaani yamulembo mubotu azyakuzwaata kumutwe zibotu zyamulembo mubotu azibbudula zyamulembo mubotu 29 amulembo wakulyaanga muchibuno kababelesya busumyo bubotu boosedwe, busumyo bwabbuluu, wulu yapepulu abusumyo busalala, mbuli Jehova mbaakalayilila Mozesi.
30 Kumamanino, bakapanga kantu kapapalete kang’ayima, nkukwaamba chitondeezyo chisalala chakulipeda changolida iisalalisya mpawo bakachilemba mbuli mbuchilembwa chidindo majwi aakuti: “Busalali mbubwaJehova.” 31 Bakakaanga aantambo iipangidwe aabusumyo bwabbuluu kuchitila kuti bakabikke aangwaani, mbuli Jehova mbaakalayilila Mozesi.
32 Nkinkaako, mulimu woonse waatente lyakukombela, nkukwamba tente lyakuswaanganina wakamana alubo ma-Israyeli bakachita zintu zyoonse Jehova nzyaakalayilila Mozesi. Bakachita mbuboobo.
33 Mpawo bakeeta tente lyakukombela kuli Mozesi, nkukwaamba tente azibelesyo zyalyo zyoonse, tupini twalyo, mafulemu aalyo, mbalo zyalyo, mapila azikkazikizyo zyalyo; 34 zyakuvumbya zyalyo zyazikumba zyabagutu zinikidwe mumusila uusalala, zyakuvumbya zyalyo zyazikumba ziteteete,* kketeni lyakujala; 35 bbokesi lyaBukamboni azisamu zyalyo achivunisyo; 36 tebbulu, zibelesyo zyalyo zyoonse achinkwa chachitondeezyo; 37 chibikkilo chamalambe changolida iisalalisya, malambe aacho aabambidwe mumunchali, zibelesyo zyacho zyoonse amafuta aakumunisya; 38 chipayililo changolida, mafuta aakunanika, tununkilizyo, kketeni lyakumanjililo aatente; 39 chipayililo chakkopa ansefa yacho yakkopa, zisamu zyacho, zibelesyo zyacho zyoonse, bbavu achikkalilo chalyo; 40 makketeni aalubuwa, mapila aalo azikkazikizyo zyawo, kketeni lyakumanjililo aalubuwa, ntambo zyatente ankanka zyalo azibelesyo zyoonse zyamulimu watente lyakukombela, nkukwaamba tente lyakuswaanganina; 41 zigogo zibotu zyakubelesya mundawu iisalala, zigogo zisalala zya-Aroni mupayizi azigogo zyabana bakwe batabeleke kabali bapayizi.
42 Ma-Israyeli bakachita mulimu woonse, mbuli Jehova mbaakalayilila Mozesi. 43 Mozesi naakalanga-langa mulimu wabo, wakabona kuti bakali bawuchita mbuli Jehova mbaakalayilila alubo Mozesi wakabalongezya.*