Johane Wachibili
1 Ime ndimunene,* ndilikulembela nduwe numwanakazi uusalidwe abana bako mbindiyanda choonzyo, kutali ndime andilikke, pesi abaabo boonse bakaziba kasimpe, 2 akaambo kakasimpe kali mulindiswe alubo kanooli mulindiswe kukabe kutamani. 3 Tunooli aaluzyalo lupati, alweetelelo aluumuno, kuzwa kuli Leza Taata, akuli Jesu Kkristu Mwana waTaata kuswaanizya akasimpe aluyando.
4 Ndilikubotelwa loko, nkaambo ndajana bamwi bana bako kabalikweenda mukasimpe mbuli mbutwakapegwa mulawu kuzwa kuli Taata. 5 Nkinkaako, lino ndilikukukumbila iwe numwanakazi, kuti tuyandane. (Tandilikukulembela mulawu mupya pe, pesi ndilikukulembela mulawu ngutwakalaawo kuzwa kumatalikilo.) 6 Eezi nzizyo nzilwaamba luyando, kuti twiinkilile kunembo kweenda, kweendelana amilawu yakwe. Ooyu nguumulawu, mbuli mbumwakamvwa kuzwa kumatalikilo, kuti mweelede kwiinkilila kunembo kweenda mulinguwo. 7 Nkaambo munyika kwavula basilweeno, batazumini kuti Jesu Kkristu wakaza kali aamubili wanyama. Ooyu ngunguwe silweeno asikukazya Kkristu.
8 Amulichenjelele kuchitila kuti mutasweekelwi aazintu nzitwakabelekela, kuchitila kuti mukajane bulumbu bukkwene. 9 Muntu woonse wiinzilizya mpayelede kugolela alubo uutakkalilili munjiisyo yaKkristu, talaamwi pe aLeza. Ooyo uukkalilila munjiisyo eeyi, ngunguwe uulaamwi aTaata aMwana. 10 Kuti umwi muntu wasika kulindinywe katayiisyi njiisyo eeyi, mutamutambuli pe mumaanda aanu, nikuba kumujuzya. 11 Nkaambo muntu uumujuzya, ngusikuliswaanizya mumilimu yakwe mibi.
12 Nikuba kuti ndilaazintu zyiingi zyakuti ndimulembele, pesi tandiyandi kumulembela kandibelesya pepa a-inki, pesi ndilangilila kuza kulindinywe kuti ndizoowambuule aandinywe katubwenene, kuchitila kuti kukondwa kwanu kuzule.
13 Bana bamukulanaako uusalidwe, balikukujuzya.