Lwakusaanguna kuBakkorinte
14 Amweezye amanguzu aanu woonse kuba aaluyando, kumwi kamuli kusungwaalila kuba aazipo zyamuuya, pesi zyali kunoobota loko kaansinga mulapolofita. 2 Nkaambo ooyo waambuula mundimi, waambuula aaLeza kutali abantu pe, nkaambo taakwe uumumvwa pe alubo nga ulikwaambuula nsiswa zisalala kwiinda mumuuya. 3 Nikuba oobo, ooyo uupolofita ulabayaka bamwi akubasungwaazya akubawumbulizya kwiinda mumajwi aakwe. 4 Ooyo waambuula mundimi ulaliyaka lwakwe, pesi ooyo uupolofita uyaka mbungano. 5 Ndiyanda kuti moonse mwaambuule mundimi, pesi zyali kunoobota loko kaansinga mwapolofita. Kwaamba choonzyo, ooyo uupolofita mupati kwiinda ooyo waambuula mundimi, kunze kwakuti ooyo waambuula mundimi watolekela* kuchitila kuti mbungano iyakwe. 6 Bakombima, kuti kuchiindi eechino ndaza kulindinywe kandaambuula mundimi, zimugwasyaanzi biya? Zili mbubo kuti ndaambuule aandinywe kandibelesya majwi ngindakayubunwidwa, naakuti luzibo, naakuti bupolofita naakuti njiisyo.
7 Zilikozyenie azintu zitaponi zilila zili mbuli nyeele naakuti kantimbwa. Kuti teekwaba kusiyana kwamachuni kunyeele naakuti kukantimbwa, lwiimbo lulikulizigwa lulazibwa biyeni? 8 Nkaambo kuti mweembo walila munzila iitamvwisisiki, ngwani uutalibambile kuya kunkondo? 9 Munzila iikozyenie, kuti inywe nimwaambuula mundimi kamubelesya majwi aatamvwisisiki, muntu kujana waziziba na nzimulikwaambuula? Kwaamba choonzyo, munoowambuula aamoya. 10 Kuli milaka myiingi munyika, nikuba oobo, taakwe mulaka uutakwe nchuuwamba. 11 Nkaambo kuti kanditawumvwi pe mulaka, ndilaba mweenzu kumuntu ulikwaambuula mulaka ooyo, anguwe muntu ooyo ulaba mweenzu kulindime. 12 Munzila iikozyenie, mbukunga muli aachiyandisyo chakuba aazipo zyamuuya, amubelekele kuba aazipo zyiingi zitayake mbungano.
13 Nkinkaako, ooyo waambuula mundimi, akombele kuti akonzye kutolekela.* 14 Nkaambo kuti kandili kukomba mundimi, nchipo changu chamuuya chilikubeleka, pesi mizeezo yangu tayilikubeleka pe. 15 Ani mpo kuchitwe biyeni? Ndilakomba achipo chamuuya, pesi ndilakomba lubo amizeezo yangu.* Ndilayimba nyimbo zyakutembawula achipo chamuuya, pesi ndilayimba lubo nyimbo zyakutembawula amizeezo yangu.* 16 Nkaambo kuti watembawula Leza kubelesya chipo chamuuya, muntu biyo ulaakati kanu nga ulaamba biyeni kuti “Ameni,” kumajwi aako aakulumba, mbukunga tazizi pe nzulikwaamba? 17 Kwaamba choonzyo, ulikulumba Leza munzila mbotu loko, pesi umwi muntu tazili kumuyaka pe. 18 Ndilamulumba Leza nkaambo ndaambuula ndimi zyiingi kwiinda ndinywe moonse. 19 Nikuba oobo, mumbungano ulabona ndasala kwaambuula majwi aali musanu aamvwisisika,* kuchitila kuti ndiyiisye bamwi* kwiinda kuti ndaambuule majwi aali 10 000 mundimi.
20 Bakombima, mutabi bana mukumvwisisisya kwanu, pesi amube bana kumakani aabubi, alubo mube bapati mukumvwisisisya kwanu. 21 MuMulawu kulilembedwe kuti: “‘Ndizoowambuula aabantu aaba kandibelesya milaka yabeenzu amajwi aabantu mbibatazi, pesi nikuba kuchiindi eecho, tabakandiswiilili pe,’ mbaamba Jehova.”* 22 Nkinkaako, ndimi teechitondeezyo chabantu basyoma pe, pesi nchabantu batasyomi, alubo bupolofita teebwabantu batasyomi pe, pesi mbwabantu basyoma. 23 Nkinkaako, kuti mbungano yoonse yabungana aandawu iimwi, mpawo moonse mwaambuula mundimi, mpawo kwasika bantu biyo naakuti bantu batasyomi, tabakoowamba kuti mulipengede na? 24 Pesi kuti moonse kamulikupolofita mpawo kwasika muntu uutasyomi naakuti muntu biyo, bantu boonse balamululamika akumulanga-langa. 25 Mpawo nsiswa zili mumoyo wakwe zilaba aantanganana, alubo ulavuntama akukomba Leza kaamba kuti, “Kwaamba choonzyo, Leza mpali aakati kanu.”
26 Ani mpo kuchitwe biyeni bakombima? Nimubunganaamwi, umwi ulaantembawuzyo, umwi ulaanjiisyo, umwi ulaachiyubunuzyo, umwi ulaachipo chakwaambuula mundimi, umwi ulatolekela. Amuchite zintu zyoonse kuti muyakane. 27 Kuti kwaba basikwaambuula mundimi, batayindi pe kubabili naakuti batatu, abachinchaane kukwaambuula alubo umwi weelede kutolekela.* 28 Pesi kuti kakutakwe muntu uutolekela,* abawumune mumbungano mpawo baambuule abalikke alubo baambuule aaLeza. 29 Bapolofita babili naakuti batatu abaambuule mpawo bamwi bamvwisisisye zilikwaambwa. 30 Pesi kuti umwi wayubunwidwa kakkede mpawaawo, ooyo wasaanguna kwaambuula awumune. 31 Nkaambo moonse mulakonzya kupolofita kamuli kuchinchaana, kuchitila kuti boonse bayiye akuti basungwaazigwe. 32 Bapolofita abalijate kuzipo zyakupolofita nzibalaazyo. 33 Nkaambo Leza nguLeza waluumuno kutali wamanyongwe.
Mbuli mbukulikuchitwa mumbungano zyoonse zyabasalali, 34 banakazi abawumune mumbungano nkaambo tabazumizigwi pe kwaambuula. Pesi abalibombye mbuli mbuuwamba Mulawu. 35 Kuti kabayanda kwiiya chimwi chintu, ababuzye balumi babo kung’anda, nkaambo tazikwe bulemu pe kuti mwanakazi aambuule mumbungano.
36 Jwi lyaLeza lyakasaangunina kulindinywe na, naakuti lyakagolela kulindinywe kupela na?
37 Kufumbwa uubonaanga mupolofita naakuti wakapegwa chipo chamuuya, weelede kuzumina kuti zintu nzindilikumulembela, mulawu waMwaami. 38 Pesi muntu uutatambuli makani aaya, takootambulwa pe.* 39 Nkinkaako bakombima, amubeleke changuzu mukupolofita, alubo mutakasyi bantu kwaambuula mundimi. 40 Pesi zintu zyoonse azichitwe bweelede, munzila iibambikene.