Samiyele Wachibili
1 Sawulu naakafwa, Davida wakakkala kuZikkilagi kwamazuba aabili chiindi naakaboola kuzwa kukuzunda* ma-Amalekki. 2 Mubuzuba bwachitatu, kwakasika umwi mwaalumi wakazwa kukkeempu yaSawulu, kazweete zigogo zidelukide alubo kali aalusuko mumutwe. Naakasika kuli Davida, wakawidaansi mpawo wakavuntama.
3 Davida wakamubuzya kuti: “Wazwa kuli?” Wakasandula kati: “Ndachija kukkeempu yama-Israyeli.” 4 Mpawo Davida wakamubuzya kuti: “Niinzi chachitika? Ndikumbila undibuzye.” Wakamusandula kuti: “Bantu bachija kunkondo alubo biingi bafwa, naba Sawulu amwanaakwe Jonatani bafwa.” 5 Mpawo Davida wakabuzya mulombe ooyo wakamweetela mulumbe kuti: “Waziziba biyeni kuti Sawulu amwanaakwe Jonatani bafwa?” 6 Mulombe ooyo wakasandula kati: “Kandili aaChilundu chaGilibbowa, ndakabona Sawulu kajisilidi aasumu lyakwe alubo basikweenzya ngolo abasimabbiza bakali baba aafwiifwi anguwe. 7 Naakacheba, wakandibona wandiita mpawo ndakati, ‘Ndime aano!’ 8 Wakabuzya kuti, ‘Nduweni?’ Ndakamusandula kuti, ‘Ndili mu-Amalekki.’ 9 Mpawo wakati, ‘Inche kaka, swena aafwiifwi undijaye, nkaambo ndili mumachise mapati, nikuba kuti ndichili muumi.’ 10 Nkinkaako, ndakaswena aafwiifwi anguwe mpawo ndakamujaya, nkaambo ndakalizi kuti takoopona pe, mbukunga wakali wawidaansi kali walichisa. Ndakabweza ngwaani yabwaami yakali mumutwe wakwe achakuzwaata mumaboko chakali aakuboko kwakwe. Lino nzezi ndazyeeta kulinduwe simalelaangu.”
11 Naakamvwa oobo, Davida wakajata zigogo zyakwe, wazidelula alubo baalumi boonse mbaakalaabo ambabo bakachita oobo. 12 Bakoomoka, balila akulyiimya kulya kusika goko akaambo kaSawulu amwanaakwe Jonatani abantu baJehova ang’anda ya-Israyeli, nkaambo bakali bajayigwa aapanga.
13 Davida wakabuzya mulombe wakamweetela mulumbe kuti: “Uzwa kuli?” Wakati: “Ndili mwana wamweenzu, mu-Amalekki.” 14 Mpawo Davida wakati kulinguwe: “Nkamboonzi nwaakatayoowa kutandabika kuboko kwako kuti ujaye munanike waJehova?” 15 Kuzwa waawo, Davida wakayita umwi mulombe mpawo wakamubuzya kuti: “Kuza aafwiifwi umujaye.” Nkinkaako, wakamuyasa mpawo wakafwa. 16 Katanajayigwa, Davida wakati kulinguwe: “Walijazya awulikke,* nkaambo waamba aamulomo wako kuti, ‘Ime biya ndime ndakajaya munanike waJehova.’”
17 Mpawo Davida wakayimba lwiimbo lwakulila Sawulu amwanaakwe Jonatani 18 alubo wakati bantu bamuJuda beelede kuyiisigwa lwiimbo oolu lwakulila lutegwa “Daantambwa,” lulembedwe mubbuku lyaJashari:
19 “Baalumi balemekwa, O Israyeli, bajayigwa alubo balandabala aandawu zyako zili aajulu.
Basinguzu bawa!
20 Mutazyaambi pe kuGati,
Mutazyaambilizyi pe mumigwagwa ya-Ashikkeloni,
Nkaambo bana basimbi bamaFilisiti ulabona babotelwa,
Abana basimbi babaalumi batapalwidwe ulabona basekelela.
21 Nimalundu aakuGilibbowa,
Kutabi lume* naakuti mvula aalindinywe,
Niiba myuunda iizyala zipo zisalala,
Nkaambo nkukooko, ntobo yabasinguzu yakasofwaazigwa,
Ntobo yaSawulu tayichinanikidwe aamafuta pe.
22 Daantambwa lyaJonatani,
Teelyakakachilwa pe kutila ganzi lyabasinkondonyina akuyasa mafuta aabasinguzu,
Apanga lyaSawulu teelyakali kuboola kalitazundide pe.
23 Sawulu aJonatani bakali kuyandwa alubo bakali kuyandikana kabachipona,
Amulufu teebakaanzaanisigwa pe.
Bakali aaluno kwiinda magumbe,
Bakali aanguzu kwiinda balavu.
24 Inywe nibasimbi ba-Israyeli, amulile Sawulu,
Ooyo wakamuzwaatika zigogo zisalala zyamulembo mubotu,
Ooyo wakabikka tuntu twangolida twakubotya aazigogo zyanu.
25 Basinguzu bawa munkondo!
Jonatani wajayigwa alubo walandabala aandawu zyako zili aajulu!
26 Ndilikataazikene akaambo kanduwe mweenzuma, Jonatani,
Ndakali kukuyanda loko.
Luyando ndwaakanditondeezya lwakali kugambya loko kwiinda luyando lwabanakazi.
27 Basinguzu bawa
Alubo zilwanisyo zyankondo zyanyonyooka!”