Samiyele Wachibili
6 Davida wakaabunganizya lubo masooja woonse aakali aamanguzu mu-Israyeli. Baalumi aabo bakali 30 000. 2 Mpawo Davida abaalumi boonse mbaakalaabo bakaya kuBbaale-juda, kuti bakeete Bbokesi lyaLeza wakasimpe, bantu ndibabelesya kukwiita zina lyaJehova wamakamu, ooyo uukkala aajulu aamakkerubbi.* 3 Nikuba oobo, bakabikka Bbokesi lyaLeza wakasimpe mungolo mpya kuti balinyampule kuzwa kung’anda ya-Abbinadabbu yakali aakalundu. Uza a-Ahiyo bana ba-Abbinadabbu mbabo bakali kweenzya ngolo eeyo mpya.
4 Nkinkaako, bakanyampula Bbokesi lyaLeza wakasimpe kuzwa kung’anda ya-Abbinadabbu yakali aakalundu mpawo Ahiyo wakali kuzulwida kunembo aaBbokesi. 5 Davida abantu boonse bamung’anda ya-Israyeli, bakali kusekelela kunembo lyaJehova kababelesya zibelesyo zisiyene-siyene zipangidwe aamujunipa, tuntimbwa, zibelesyo zyantambo zyakwiimbya, nsakalala, tusimbi twabungwele-ngwele ansimbi zyuumanisigwaamwi. 6 Pesi nibakasika kulubuwa lwakupolela lwaNakkoni, Uza wakatandabika kuboko kwakwe kuBbokesi lyaLeza wakasimpe walijata, nkaambo ng’ombe zyakachiliwisye. 7 Aachiindi nchicheecho, bukali bwaJehova bwakasikila Uza mpawo Leza wakasimpe wakamuuma mpawaawo akaambo kakutalemeka Leza alubo wakafwida mpawaawo kumbali aaBbokesi lyaLeza wakasimpe. 8 Pesi Davida wakanyema, nkaambo bukali bwaJehova bwakali bwasikila Uza alubo ndawu eeyo yaambwa kuti Perezi-uza* kusika sunu. 9 Nkinkaako, Davida wakasaanguna kumuyoowa Jehova mubuzuba oobo mpawo wakati: “Bbokesi lyaJehova nga lilasika biyeni kulindime?” 10 Davida taakali kuyanda pe kutola Bbokesi lyaJehova nkwaakali kukkala muMuunzi waDavida, pesi wakati litolwe kung’anda ya-Obbedi-edomu wakuGati.
11 Bbokesi lyaJehova lyakayinkilila kunembo kalili kung’anda ya-Obbedi-edomu wakuGati kwamyeezi iitatu alubo Jehova wakayinkilila kunembo kulongezya* Obbedi-edomu abamung’anda yakwe boonse. 12 Mwaami Davida wakabuzigwa kuti: “Jehova walongezya ng’anda ya-Obbedi-edomu azintu zyoonse nzyalaazyo akaambo kaBbokesi lyaLeza wakasimpe.” Nkinkaako, Davida wakayinka kukweeta Bbokesi lyaLeza wakasimpe kung’anda ya-Obbedi-edomu kuti azaalyo muMuunzi waDavida kalikubotelwa. 13 Basikunyampula Bbokesi lyaJehova nibakeenda ntaamu zili musanu ayimwi, Davida wakapayizya pule wang’ombe amunyama uuneneede.
14 Davida wakali kuzyana kalikuzyunguluka amanguzu aakwe woonse kunembo lyaJehova. Aachiindi eecho, Davida wakazweete kabaki kabupayizi* kamulembo mubotu. 15 Davida abantu boonse bamung’anda ya-Israyeli bakali koompolola akukondwa akulizya mweembo nibakali kweeta Bbokesi lyaJehova. 16 Pesi Bbokesi lyaJehova nilyakasika muMuunzi waDavida, Mikkala mwana waSawulu wakayuna aawindo mpawo wakabona Mwaami Davida kalikusotoka akuzyana, kazyunguluka kunembo lyaJehova mpawo wakasaanguna kumusampawula mumoyo wakwe. 17 Nkinkaako, bakabweza Bbokesi lyaJehova balibikka aandawu yalyo mutente Davida ndyaakaliyakilide. Mpawo Davida wakapa zipayizyo zitentwa azipayizyo zyalumvwanano kunembo lyaJehova. 18 Davida naakamaninsya kupa zipayizyo zitentwa azipayizyo zyalumvwanano, wakalongezya bantu muzina lyaJehova wamakamu. 19 Mukuyungizya, wakapa bantu boonse, nkamu yoonse yama-Israyeli, mwaalumi umwi awumwi amwanakazi umwi awumwi, chinkwa chalawundi chili aampako aakati, chinkwa chipangidwe aamakunka, chinkwa chipangidwe aamasaansa aakayanikwa. Kuzwa waawo, bantu boonse bakeenda, umwi awumwi kung’anda yakwe.
20 Davida naakasika kuzoolongezya bamung’anda yakwe, Mikkala mwana waSawulu wakazwa aanze kuti azoomutambule. Mpawo wakati: “Mwaami wa-Israyeli walyuubula bulemu, chiindi nalivumbula kunembo lyabazike bachanakazi bababelesi bakwe sunu, mbuli mbalivumbula muntu uutakwe maanu!” 21 Mpawo Davida wakati kuli Mikkala: “Ime ndali kusekelela biyo kunembo lyaJehova, ooyo wakasala ndime kutali wuso abamung’anda yakwe boonse awakandisala kuti ndibe muzulwidi wabantu baJehova, ma-Israyeli. Nkinkaako, ndinoosekelela kunembo lyaJehova 22 alubo ndizoolibombya kwiinda mbundachita akulichesya mumeso aangu, pesi ndizoopegwa bulemu abazike bachanakazi mbuwaamba.” 23 Nkinkaako, Mikkala mwana waSawulu wakafwa katakwe bana pe.