Samiyele Wachibili
13 Abbisalomu mwana waDavida wakali aamuchizi wakali mubotu loko wakali kutegwa Tamari alubo umwi mwana waDavida uutegwa Amunoni wakali kumuyanda. 2 Amunoni wakakataazikene loko zyakuti wakachiswa akaambo kamuchizi wakwe Tamari, mbukunga wakali nakalindu* alubo kwakali kubaanga taakwe nzyaakali kukonzya kumuchita pe muchizi wakwe. 3 Amunoni wakali aamweenzinyina wakali kutegwa Jehonadabbu, mwana waShimeya mukulana waDavida. Jehonadabbu wakali mwaalumi uuchenjede loko. 4 Jehonadabbu wakati kuli Amunoni: “Iwe numwana wamwaami, nkamboonzi nubuka kukataazikene buzuba abuzuba kuseeni? Ndibuzye.” Amunoni wakamusandula kati: “Ndilikuyanda Tamari muchizi wamwanikaangu Abbisalomu.” 5 Jehonadabbu wakamusandula kati: “Wona aabulo bwako uchitaanga ulichisidwe. Kuti wuso wasika kuzookubona umubuzye kuti, ‘Ndikumbila kuti muchizi wangu Tamari asike azoondipe chakulya. Kuti wajika chakulya chipegwa bachiswa* kandilangide mpawo naandipa, ndilakonzya kuchilya.’”
6 Nkinkaako, Amunoni wakoona, wachitaanga ulikuchiswa mpawo mwaami wakasika kuti azoomubone. Amunoni wakabuzya mwaami kuti: “Ndikumbila kuti muchizi wangu Tamari asike azoondijikile zinkwa zibili zili mbuli moyo kandilangide mpawo andipe ndilye.” 7 Mpawo Davida wakatuma mulayizyo kuli Tamari kung’anda kati: “Yinka kung’anda yamunyaandumi wako Amunoni ukamujikile chakulya.”* 8 Nkinkaako, Tamari wakayinka kung’anda yamunyaandumi wakwe Amunoni, ooko nkwaakalede. Wakabweza fulawa wayikanda kalangide mpawo wakamujikila chinkwa. 9 Wakabweza mpani yakali aachinkwa, wamupa. Pesi Amunoni wakakaka kulya mpawo wakati: “Muntu woonse azwe!” Nkinkaako, bantu boonse bakazwa.
10 Amunoni wakati kuli Tamari: “Yeta chakulya* mung’anda yakoona mpawo undipe ndilye.” Nkinkaako, Tamari wakabweza zinkwa zili mbuli moyo nzyaakali wajika mpawo wakazyeetela munyaandumi wakwe Amunoni mung’anda yakoona. 11 Naakamweetela zinkwa eezi kuti alye, Amunoni wakamujata mpawo wakati: “Kuza woone aandime muchizi wangu.” 12 Pesi wakati kulinguwe: “Utachiti oobu munyaandumi wangu! Utandifwisyi bweeme, nkaambo chintu chili oobu tacheelede kuchitwa pe mu-Israyeli. Utachiti chintu eechi chifwisya bweeme. 13 Ndilanjilaali kuti wandifwisya bweeme? Anduwe bantu bazookubona mbuli mwaalumi uutagwasyi pe mu-Israyeli. Ndikumbila kuti waambuule aamwaami, nkaambo takookaka pe kuti undibweze.” 14 Pesi taakamuswiilila pe, nkinkaako, wakamuzunda, wamufwisya bweeme kwiinda mukumuvumpila. 15 Amunoni wakasaanguna kumuzonda loko zyakuti nzila njaakali kumuzondaayo yakali mpati loko kwiinda nzila njaakali kumuyandaayo. Mpawo Amunoni wakati kulinguwe: “Nyampuka uzwe aawa!” 16 Pesi Tamari wakati kulinguwe: “Tazichiti pe, nkaambo kuti wanditanda unooli wabisya loko kwiinda nzwaandichita.” Nikuba oobo, Amunoni taakamuswiilila pe.
17 Kuzwa waawo, wakayita mubelesi wakwe mpawo wakati: “Gwisya muntu ooyu kunembo lyangu mpawo naazwa, ukkiye mulyango.” 18 (Tamari wakazweete chigogo chibotu,* nkaambo nzizyo nzibakali kuzwaata bana basimbi bamwaami bakali banakalindu.) Nkinkaako, mubelesi wa-Amunoni wakamutola aanze mpawo naakazwa, wakakkiya mulyango. 19 Tamari wakalitila dyota mumutwe alubo wakadelula chigogo chakwe chibotu nchaakazweete mpawo wakeenda kalila, kajisi kumutwe.
20 Kuzwa waawo, munyaandumi wakwe Abbisalomu wakamubuzya kuti: “Ngu-Amunoni na munyaandumi wako wali aanduwe? Wumuna muchizi wangu, kabi munyaandumi wako ooyu. Utakataazikani pe atala ankani eeyi.” Tamari wakakkala aalikke kung’anda yamunyaandumi wakwe Abbisalomu. 21 Mwaami Davida naakamvwa makani aaya, wakanyema loko. Pesi taakayanda pe kuchisya moyo wamwanaakwe Amunoni, nkaambo wakali kumuyanda mbukunga wakali mwanaakwe wakusaanguna. 22 Abbisalomu taakwe nchaakaamba pe kuli Amunoni, chibe chibi naakuti chibotu, nkaambo Abbisalomu wakamuzonda Amunoni akaambo kakuti wakali wamufwisya bweeme muchizi wakwe Tamari.
23 Nikwakayinda minyaka iibili iizwide, basikugela mbelele ba-Abbisalomu bakali kuBbaala-hazori aafwiifwi aku-Efremu mpawo Abbisalomu wakatamba bana balombe bamwaami boonse. 24 Abbisalomu wakanjila mwaakabede mwaami mpawo wakati: “Mubelesi wako ulikugela mbelele zyakwe. Ndikumbila kuti mwaami ababelesi bakwe bayinke aandime.” 25 Pesi mwaami wakati kulinguwe: “Peepe, mwanaangu. Kuti toonse twayinka aanduwe, tulaba mukuli kulinduwe.” Nikuba kuti wakaliswini kumukombelezya, taakazumina pe kwiinka, pesi wakamulongezya.* 26 Abbisalomu wakati: “Kuti iwe kutali kwiinka, zumizya mukulanaangu Amunoni kuti ayinke aandiswe.” Pesi mwaami wakamusandula kati: “Nkamboonzi nuyanda kweenda aanguwe?” 27 Pesi Abbisalomu wakakombelezya mwaami zyakuti wakazumizya Amunoni abana balombe bamwaami boonse kuti beendaawe.
28 Mpawo Abbisalomu wakalayilila babelesi bakwe kuti: “Amukkale kamumulangide Amunoni. Moyo wakwe nwaabotelwa akaambo kawayini, ime ndilamubuzya kuti, ‘Amumujaye Amunoni!’ Mpawo mweelede kumujaya. Mutayoowi pe, ndime ndilikumulayilila. Amusime mube aachibindi.” 29 Babelesi ba-Abbisalomu bakachita zyoonse nzibakalayililwa aa-Abbisalomu kuti bachite kuli Amunoni. Mpawo bamwi bana bamwaami boonse bakanyampuka, umwi awumwi wakatanta myuulu* yakwe, wachija. 30 Nibakachili munzila, kwakasika mulumbe kuli Davida wakuti: “Abbisalomu wajaya bana balombe bamwaami boonse, taakwe naaba uumwi wafutuka.” 31 Naakamvwa oobo, mwaami wakanyampuka wadelula zigogo zyakwe mpawo wakalandabala aansi. Babelesi bakwe boonse bakayimvwi kumbali lyakwe ambabo bakadelula zigogo zyabo.
32 Nikuba oobo, Jehonadabbu mwana waShimeya mukulana waDavida wakati: “Simalelaangu atayeeyi kuti bana balombe boonse bamwaami bajayigwa, nkaambo ngu-Amunoni alikke wafwa. Abbisalomu nguwe walayilila kuti ajayigwe, nkaambo wakakanza kuchita oobo kuzwa mubuzuba Amunoni naakamufwisya bweeme muchizi wakwe Tamari. 33 Mwaami simalelaangu atawuswiilili* pe mulumbe wakuti, ‘Bana balombe boonse bamwaami bafwa,’ nkaambo ngu-Amunoni alikke wafwa.”
34 Nizyakali kuchitika eezi, Abbisalomu wakachija. Nikwakayinda chiindi, mulindi wakabusya mutwe mpawo wakabona bantu biingi bakali kuzwida kumugwagwa wakali kusule lyakwe aafwiifwi achilundu. 35 Mpawo Jehonadabbu wakabuzya mwaami kuti: “Bona! Bana bako baboola. Zyachitika mbuli mbaamba mubelesi wako.” 36 Naakamaninsya kwaambuula, bana bamwaami bakasika kabali kulila loko. Anguwe mwaami ababelesi bakwe boonse bakalila loko. 37 Pesi Abbisalomu wakachijila kuli Talimayi mwana wa-Amihudi, mwaami wakuGeshuri. Davida wakalila mwanaakwe kwamazuba miingi. 38 Abbisalomu naakachija, wakaya kuGeshuri mpawo wakakkala nkukooko kwaminyaka iitatu.
39 Kumamanino, Mwaami Davida wakaba aachiyandisyo chakuya kuli Abbisalomu, nkaambo taakachili kukataazikana loko pe* akaambo kakufwa kwa-Amunoni.