Detoronomi
19 “Jehova Leza wanu naazoonyonyoona bantu bazisi bali aanyika Jehova Leza wanu njalikumupa animwazoobanyanga nyika yabo akukkala mumyuunzi yabo amumaanda aabo, 2 mweelede kusala myuunzi iitatu aakati kanyika Jehova Leza wanu njalikumupa kuti ibe yanu. 3 Mweelede kupambula nyika Jehova Leza wanu njalikumupa ibe muzipanzi zitatu alubo mubambe migwagwa kuchitila kuti mujayi achijile kuli umwi wamyuunzi eeyo.
4 “Nzezi zyeelede kuchitwa kumujayi uunga wachijila nkukooko kuti atajayigwi: Kuti wajaya muntu katakanzide kuchita oobo alubo kakuli taakali kumuzonda pe; 5 mbuli chiindi muntu nayinka aamweenzinyina musokwe kukutebba nkuni, naanyampula kaleba* kuti agonke munsamu mpawo kaleba kasomoka aamwiini kaakuuma mweenzinyina mpawo wafwa, mujayi ooyo weelede kuchijila kuli umwi wamyuunzi eeyi kuti atajayigwi. 6 Kuti taachita oobo, akaambo kakunyema, sikubweedezya chibi chaganzi ulakonzya kwaandilila mujayi ooyo mpawo aamweenzya ulamujaya nkaambo muunzi ooyo ulikule. Nikuba oobo, muntu ooyo nga taali kweelela pe kufwa mbukunga taakali kumuzonda pe mweenzinyina. 7 Nchindili kumulayilila kuti, ‘Amusale myuunzi iitatu.’
8 “Jehova Leza wanu naazookomezya chilawu chanu mbuli mbaakakonkezya kumasianyookulu akumupa nyika yoonse njaakasyomezya kupa masianyookulu, 9 —kufumbwa biyo kuti mwayibamba chakusyomeka milawu yoonse eeyi njindilikumupa sunu kwiinda mukuyanda Jehova Leza wanu akweenda munzila zyakwe chiindi choonse—mweelede kuzooyungizya myuunzi iimbi iitatu kuli yeeyi iitatu. 10 Kuti mwachita oobo, taakwe ganzi litakwe mulandu litazootike munyika Jehova Leza wanu njalikumupa kuti ibe lukono alubo tamuzoobi aamulandu waganzi pe.
11 “Pesi kuti muntu wakali kumuzonda mweenzinyina mpawo wamuyubilila wamuuma mpawo wafwa, muntu ooyo wachijila kuli umwi wamyuunzi eeyi, 12 baalu bamumuunzi nkwazwa beelede kutuma bantu kuti bakamweete nkukooko bazoomubikke mumaanza aasikubweedezya chibi chaganzi mpawo weelede kufwa. 13 Mutamufwidi nsoni pe. Mweelede kugwisya chibi chaganzi litakwe mulandu mu-Israyeli, kuchitila kuti zintu zimweendele kabotu.
14 “Nwaazootambula lukono lwako munyika Jehova Leza wako njalikukupa kuti ibe yako, toyelede kusunzulusya mugaano wasimayakilane wako kuzwa mpubakawubikkide masianyookulu.
15 “Kamboni uumwi tayelede kupa bukamboni bwakuti umwi muntu wakachita chibi naakuti mulandu. Kubukamboni bwabakamboni babili naakuti batatu, kaambo keelede kubetekwa. 16 Kuti kamboni uuli aamakanze mabi wabejelezya mweenzinyina akumupa mulandu, 17 baalumi aabo babili bali kukazyania beelede kwiimikila kunembo lyaJehova, kubapayizi akubabetesi banoobeleka mumazuba aayo. 18 Babetesi beelede kukayanduulisisya kaambo aako, kuti kwajanika kuti muntu wakapede bukamboni oobo wakali kubeja akuti wakabejelezya mweenzinyina, 19 mweelede kumuchitila mbuli mbaakakanzide kuchitila mweenzinyina, alubo mweelede kugwisya bubi aakati kanu. 20 Bantu batazoosyaale bazooyoowa nibazoomvwa makani aaya mpawo tabazoobuchiti lubo pe bubi buli boobu aakati kanu. 21 Mutamufwidi nsoni pe: Mweelede kubbadala buumi abuumi, liso aliso, linyo alinyo, kuboko akuboko, kuulu akuulu.