Samiyele Wachibili
22 Davida wakaambuula aaJehova majwi aalwiimbo oolu, mubuzuba Jehova naakamuvuna kuzwa mukuboko kwabasinkondonyina boonse amukuboko kwaSawulu. 2 Wakati:
“Jehova ndibbwe lyangu pati andawu yangu yakuyubila alubo nguwe uundivuna.
3 Leza wangu ndibbwe lyangu, oomo mundiyubila,
Nintobo yangu, ndwija* lwangu lwalufutuko,* nindawu yangu yakuyubila iikwabilidwe
Nindawu yangu yakuchijila, mufutuli wangu. Ulandivuna kubantu bandilwana.
4 Ndiita Jehova, ooyo weelela kutembawulwa,
Alubo ulandivuna kuzwa kuli basinkondoma.
5 Mayuwe aalufu akandizyunguluka,
Zambangulwe lyabantu batagwasyi lyakandiyoosya.
6 Ntambo zyaKabanda* zyakandizyunguluka,
Tukole twalufu twakandijata.
7 Nindakakataazikene ndakayita Jehova,
Ndakaliswini kwiita Leza wangu.
Mpawo wakamvwa jwi lyangu kali mutempele lyakwe,
Akukwiilila lugwasyo nkundakachita, kwakasika mumatwi aakwe.
8 Nyika yakasaanguna kuzungaana akunyikinyika ooku akooku,
Ntalisyo zyamajulu zyakazungaana,
Zyakazungaana ooku akooku akaambo kakuti wakali wanyema.
9 Busi bwakawuntumuka kabuzwa mumpemo zyakwe,
Amulilo uunyonyoona wakasika kawuzwa munkanwa lyakwe,
Makala aamulilo akayaka kaazwa kulinguwe.
10 Wakapa kuti majulu awobeke we naakali kuseluka,
Alubo kunsi aamawulu aakwe kwakali mudima uusiya mbi.
11 Wakatanta kkerubbi mpawo wakaza kawuluka.
Wakali kuboneka aajulu aamababa aamuuya.*
12 Wakalivumba aamudima mbuli tente,
Mumaanzi aasiya amumayoba aasiya mbi.
13 Makala aamulilo akayaka kaazwa mumumuni wakali kunembo lyakwe.
14 Mpawo Jehova wakasaanguna kudilima kali kujulu,
Sijulu Lyamajulu wakapa kuti jwi lyakwe limvwike.
15 Wakawaala twaanta twakwe akupa kuti bamwayike,
Wakeeta kalabi akupa kuti banyongane.
16 Kunsi aalwizi kwakaboneka,
Ntalisyo zyanyika zyakayubununwa aabukali bwaJehova,
Akuyoya kupati kuzwa mumpemo zyakwe.
17 Wakatandabika kuboko kwakwe kali kujulu,
Wakandijata, wandinuna mumaanzi malamfu.
18 Wakandivuna kuli sinkondoma uuli aanguzu,
Kuzwa kuli baabo bandizonda, aabo bakali aanguzu kwiinda ndime.
19 Bakandilwana mubuzuba bwamapenzi aangu,
Pesi Jehova wakandigwasya.
20 Wakandigwisya wanditola kundawu iikwabilidwe,*
Wakandivuna, nkaambo ndakali kumubotezya.
21 Jehova ulandipa bulumbu akaambo kabululami bwangu,
Ulandipa bulumbu akaambo kamaboko aangu aatakwe mulandu.*
22 Nkaambo ndakabamba nzila zyaJehova,
Alubo teendakabisya pe kwiinda mukusiya Leza wangu.
23 Nzila zyakwe zyoonse zyakubeteka zili kunembo lyangu,
Tandikooyisiya pe milawu yakwe.
24 Ndizookkala kanditakwe mulandu pe kunembo lyakwe,
Alubo tandizoobisyi pe.
25 Jehova andipe bulumbu kweendelana abululami bwangu,
Kweendelana akusalala kwangu kunembo lyakwe.
26 Kumuntu uusyomeka, anduwe ulasyomeka,
Kumuntu singuzu uutakwe mulandu, anduwe tukwe mulandu,
27 Kumuntu uusalala, anduwe ulasalala,
Pesi kumumpelenge, utondeezya kuti uli musongo.*
28 Nkaambo ulabavuna aabo balibombya,
Pesi meso aako taabalangi pe aabo balisumpula alubo ulabafwiinsya.
29 Nkaambo iwe ulilambe lyangu, O Jehova,
NguJehova uundimunikila nindili mumudima.
30 Kwiinda mulugwasyo lwako, ndilakonzya kulwana zigwebenga,
Kwiinda mumanguzu aaLeza, ndilakonzya kutanta muduli.
31 Nzila yaLeza wakasimpe ilimaninide,
Majwi aaJehova alasalala.
Nintobo kuli baabo boonse bayubila mulinguwe.
32 Nkaambo, ngwani uumbi Leza kunze kwaJehova?
Alubo ndiilili limwi bbwe kunze kwaLeza wesu?
33 Leza wakasimpe ningazi yangu iisimide,
Alubo uzoopa kuti nzila yangu ibe muwele-wele.
34 Upa kuti mawulu aangu abe mbuli aansya,
Akuti ndiimikile aandawu zili aajulu.
35 Uyiisya maboko aangu kuti ndikonzye kulwana nkondo,
Maboko aangu alakonzya kulidyaaminina aansi daantambwa lyakkopa.*
36 Undipa ntobo yangu yalufutuko,
Alubo kulibombya kwako kulandisumpula.*
37 Ulayikomezya nzila yamawulu aangu,
Mawulu aangu takootezemuka pe.*
38 Ndizoobaandilila basinkondoma akubanyonyoona,
Tandizoobooli pe kusikila boonse bamane.
39 Ndizoobamana akubanyonyoona, kuchitila kuti batazoobuki lubo pe,
Bazoowa munsi aamawulu aangu.
40 Uzoondipa manguzu aakuti ndikonzye kulwana,
Uzoopa kuti basinkondoma bawe kunembo lyangu.
42 Balilila lugwasyo, pesi taakwe uubafutula pe,
Nga balilila Jehova, pesi tabasanduli pe.
43 Ndizoobakuya kuti babe mbuli lusuko lwanyika,
Ndizoobalyatuuka mbuli matope aamumigwagwa.
44 Uzoondivuna kubantu bakulindiswe bandiyandwiida mulandu.
Uzoondikwabilila kuti ndibe silutwe wazisi,
Bantu mbinditazi bazoondibelekela.
45 Beenzu bazoosika bafugame kunembo lyangu,
Nzibatazoomvwe atala andime zizoopa kuti bandiswiilile.*
46 Beenzu bazooyoowa,*
Bazoosika kabakankama kuzwa kundawu zyabo zyakuyubila.
47 Jehova muumi! Alitembawulwe Bbwe lyangu!
Asumpulwe Leza, bbwe lyangu lyalufutuko.
48 Leza wakasimpe ubapa chisubulo basinkondoma,
Ubombya bantu kuti babe kunsi aamawulu aangu,
49 Ulandivuna kuli basinkondoma.
Ulandisumpula akundibikka aajulu aabantu bandilwana,
Ulandivuna kumuntu uundilwana.
50 Nzizyo zitape kuti ndikulumbe aakati kazisi, O Jehova,
Ndizooyimba kanditembawula zina lyako:*
51 Uchitila mwaami wakwe milimu mipati yalufutuko,*
Umutondeezya luyando lutamani munanike wakwe,
Davida abana bakwe kukabe kutamani.”