Samiyele Wachibili
24 Bukali bwaJehova bwakasikila ma-Israyeli lubo chiindi umwi naakoongelezya Davida* kati: “Yinka ukabale Israyeli aJuda.” 2 Mwaami wakabuzya Jowabbu mupati wamasooja ngwaakalaawe kuti: “Yinka kumisyobo yoonse ya-Israyeli, kuzwa kuDani kusika kuBberi-shebba ukabale bantu, kuchitila kuti ndizibe kuti mbangane.” 3 Pesi Jowabbu wakati kumwaami: “Jehova Leza wako, ape kuti bantu bavule kwaziindi zili 100 alubo meso aamwaami simalelaangu aazibone eezi, pesi nkamboonzi mwaami simalelaangu nayanda kuchita chintu chili boobu?”
4 Pesi jwi lyamwaami lyakazunda jwi lyaJowabbu alyabapati bamasooja. Nkinkaako, Jowabbu abapati bamasooja bakazwa kunembo lyamwaami mpawo bakayinka kuyoobala bantu bamu-Israyeli. 5 Bakazubuka Jodani mpawo bakakkempa ku-Arowa kuchilisyo kwamuunzi uuli aakati kakkuti* mpawo bakatozya kuchisi chamusyobo waGadi alubo bakayindilila baya kuJazeri. 6 Kuzwa waawo, bakaya kuGiliyadi akunyika yaTatimu-hodishi mpawo bakayinkilila kunembo kabaya kuDani-jaani alubo bakazyunguluka baya kuSidoni. 7 Mpawo bakayinka kumuunzi uukwabilidwe waTire akumyuunzi yoonse yamaHivi ayamaKkenani, kumamanino bakasika kuBberi-shebba iili kuNegebbu muJuda. 8 Bakazyunguluka nyika yoonse mpawo bakasika kuJerusalema kumamanino aamyeezi iili musanu ayine amazuba aali 20. 9 Jowabbu wakapa mwaami namba yabantu bakabalwa. Ma-Israyeli bakajanika kabali aamapanga bakali basilumamba bali 800 000 mpawo baalumi bamusyobo waJuda bakali 500 000.
10 Pesi Davida wakalisola mumoyo naakabala bantu. Davida wakati kuli Jehova: “Ndabisya loko akaambo kazeezi nzindachita. Lino Jehova lekelela chibi chamubelesi wako, nkaambo ndachita chabufuba-fuba.” 11 Davida naakabuka kuseeni, jwi lyaJehova lyakasika kumupolofita Gadi, sikubona zilengaano waDavida kaliti: 12 “Yinka kuli Davida ukamubuzye kuti, ‘Nzezi nzyaamba Jehova: “Ndilikukupa zintu zitatu kuti usale. Sala chimwi nchuyanda kuti ndikweetele.”’” 13 Nkinkaako, Gadi wakasika kuli Davida mpawo wakamubuzya kuti: “Uyanda kuti kube minyaka iili musanu ayibili yanzala na munyika yako? Naakuti uyanda kuti kulikuchija basinkondonyokwe kabakwaandilila kwamyeezi iitatu na? Naakuti uyanda kuti munyika yako mube bulwazi bubi kwamazuba aatatu na? Lino yeeyesesya, undibuzye kuti ndimusandule biyeni Ooyo wandituma.” 14 Davida wakati kuli Gadi: “Makani aaya alikundikataazya. Atuwide mukuboko kwaJehova, nkaambo luzyalo lwakwe ndupati, pesi utandilekeli kuti ndiwide mukuboko kwamuntu.”
15 Jehova wakapa kuti kube bulwazi bubi loko mu-Israyeli kuzwa kuseeni kusika aachiindi chakabikkidwe, zyakuti bantu bali 70 000 bakafwa, kuzwa kuDani kusika kuBberi-shebba. 16 Ngilozi niyakatandabika kuboko kwayo kuJerusalema kuti inyonyoone muunzi ooyu, Jehova wakalisola* akaambo kapenzi eelyo mpawo wakabuzya ngilozi yakali kuyanda kunyonyoona bantu kuti: “Kwakkwana! Selusya kuboko kwako.” Ngilozi yaJehova yakali aafwiifwi alubuwa lwakupolela lwa-Arawuna muJebbusi.
17 Davida naakabona ngilozi yakali kunyonyoona bantu, wakati kuli Jehova: “Ndime ndabisya alubo ndime ndilaamulandu, pesi mbelele eezi zyachitaanzi? Kuboko kwako akuzide ndime abamung’anda yandeende.”
18 Nkinkaako, Gadi wakasika kuli Davida mubuzuba mbuboobo mpawo wakati: “Tanta wiinke ukayakile Jehova chipayililo mulubuwa lwakupolela lwa-Arawuna muJebbusi.” 19 Nkinkaako, Davida wakatanta weenda kweendelana ambaakaamba Gadi, mbuli Jehova mbaakalayilila. 20 Arawuna naakalanga aansi, wakabona mwaami ababelesi bakwe kabali kuza kulinguwe. Chakufwambaana, Arawuna wakazwa waya kumwaami mpawo wakavuntama kunembo lyamwaami busyu kabulangide aansi. 21 Arawuna wakabuzya kuti: “Nkamboonzi mwaami simalelaangu naaza kulindime ndimubelesi wakwe?” Davida wakasandula kuti: “Ndaza kuzoowula lubuwa lwakupolela kulinduwe kuti ndiyakile Jehova chipayililo, kuchitila kuti bulwazi bwamana bantu bwiimikizigwe.” 22 Pesi Arawuna wakati kuli Davida: “Mwaami simalelaangu alubweze mpawo apayizye kufumbwa nzyabona kuti zilikabotu kulinguwe.* Nzezi ng’ombe zyachipayizyo chitentwa achileyi chakupolesya amajokwe kuti zibe nkuni. 23 Zyoonse eezi O mwaami, Arawuna wazipa mwaami.” Mpawo Arawuna wakati kumwaami: “Jehova Leza wako akufwide luzyalo.”
24 Nikuba oobo, mwaami wakati kuli Arawuna: “Peepe, ndeelede kuluwula biya lubuwa oolu kulinduwe. Tandikoopa Jehova Leza wangu zipayizyo zitentwa nzinditawulide pe.” Nkinkaako, Davida wakawula lubuwa lwakupolela ang’ombe. Wakazyuula aamashekeli* aansiliva aali 50. 25 Davida wakayakila Jehova chipayililo nkukooko mpawo wakapayizya zipayizyo zitentwa azipayizyo zyalumvwanano. Jehova wakaswiilila kukombelezya nkwaakachita Davida akaambo kabantu mpawo bulwazi bwakali bwasikila ma-Israyeli bwakayimikizigwa.