Samiyele Wachibili
23 Ngaya majwi aaDavida aakumamanino:
“Majwi aaDavida mwana waJese,
Amajwi aamwaalumi wakasumpulwa,
Munanike waLeza waJakkobo,
Mwiimbi uuyandwa wanyimbo zya-Israyeli.*
2 Muuya waJehova wakaambuula kwiinda mulindime,
Jwi lyakwe lyakali aalulimi lwangu.
3 Leza wa-Israyeli wakaambuula,
Bbwe lya-Israyeli lyakati kulindime:
‘Kuti muntu weendelezya bantu kaluleme,
Keendelezya munzila iitondeezya kuti uyoowa Leza,
4 Kuli mbuli mumuni wakuseeni zuba nilizwa,
Mbuli kuseeni nikutakwe mayoba,
Kuli mbuli mumuni uubawo mvula niyamana kuwa,
Kuchitila kuti sokwe limene aanyika.’
5 Ng’anda yangu teembiibede na kunembo lyaLeza?
Nkaambo wakapangana aandime chizuminano chitamani,
Chizuminano eechi chibambidwe kabotu alubo chizoozuzikizigwa.
Nkaambo chaamba kuti ndizoofutulwa chakumaninina akuti ndizoobotelwa loko,
Eezi teenzizyo na zipa kuti ng’anda yangu izwidilile?
6 Pesi bantu boonse batagwasyi bawaalilwa kule mbuli ziteyo zyamaamvwa,
Nkaambo tazikonzyi kubwezegwa aamaboko.
7 Kuti muntu kayanda kuzijata,
Weelede kuba aachibelesyo chansimbi aluti lwasumu,
Alubo zyeelede kutentwa aamulilo kundawu yazyo, zyoonse zilote.”
8 Aaya ngiimazina aabasilumamba baDavida basinguzu: Joshebbu-bbeshebbeti muTekkomoni, mupati wabasilumamba basinguzu batatu. Wakabelesya sumu lyakwe kuti ajaye bantu bali 800 aachiindi chimwi. 9 Wakali kumutobela, ngu-Eliyezari mwana waDodo, mwana wa-Ahohi. Wakali aakati kabasilumamba basinguzu batatu bakali aaDavida chiindi nibakasampawula maFilisiti. Bakali babungana nkukooko kuti babalwane alubo chiindi baalumi ba-Israyeli nibakachija, 10 wakazyata mpawo wakayinkilila kunembo kujaya maFilisiti kusikila kuboko kwakwe kwakatala akuyuma akaambo kakujata panga. Nkinkaako, Jehova wakapa kuti kube luzundo* lupati mubuzuba oobo alubo bantu bakaboola mpawo bakamutobela kuti bakabweze zintu zyabantu bakali bajayigwa.
11 Wakali kumutobela, wakali Shama mwana wa-Age muHarari. MaFilisiti bakabunganaamwi kuLehi, ooko kwakali muunda wakazwide nyangu alubo bantu bakachija akaambo kamaFilisiti. 12 Pesi wakayimikila aakati kamuunda, wawukwabilila alubo wakayinkilila kunembo kujaya maFilisiti zyakuti Jehova wakapa kuti kube luzundo* lupati.
13 Aakati kabazulwidi bali 30, batatu bakakunuka kabaya kuli Davida kumpako yaku-Adulamu aachiindi chakutebula alubo nkamu yamasooja aamaFilisiti yakakkempede muKkuti lyaRefayimu.* 14 Aachiindi eecho, Davida wakali mundawu yakuyubila mpawo amwi masooja aamaFilisiti akali kuBbetelehema. 15 Mpawo Davida wakaamba nzyaakali kulombozya kati: “Kaansinga ndajana maanzi aakunywa aazwa muchikala chili aageedi lyakuBbetelehema!” 16 Kuzwa waawo, basilumamba basinguzu batatu bakanjila aanguzu mukkeempu yamaFilisiti mpawo bakateka maanzi muchikala chakali aageedi lyakuBbetelehema alubo bakeetela Davida. Pesi wakakaka kwaanywa mpawo wakaatila aansi kunembo lyaJehova. 17 Wakati: “Tandikoonga ndachita oobo pe, O Jehova! Nga ndilanywa ganzi lyabaalumi babikka buumi bwabo mungoozi na?” Nkinkaako, wakakaka kwaanywa. Eezi nziizintu zyakachitwa aabasilumamba bakwe basinguzu batatu.
18 Abbishayi mwanike waJowabbu, mwana waZeruya wakali mupati wabamwi basilumamba basinguzu batatu. Wakabelesya sumu lyakwe kuti ajaye bantu bali 300 alubo wakali aampuwo yakali mbuli yababaya batatu bakusaanguna. 19 Nikuba kuti wakali kulemekwa loko aakati kabaabo batatu mbaakali kuzulwida akuti nguwe wakali mupati wabo, pesi taakalikwe chuuno chipati mbuli chababaya batatu bakusaanguna.
20 Bbenaya mwana waJehoyiyada wakali mwaalumi wakali aachibindi* alubo wakachita milimu mipati kuKkabbuzeeli. Wakajaya bana balombe babili ba-Ariyeli wakuMowabbu, wakanjila mudindi mubuzuba nikwakali chaanda* mpawo wakajaya mulavu. 21 Alubo wakajaya mwaalumi waku-Ijipita wakali bbabbani. Nikuba kuti mu-Ijipita ooyo wakajisi sumu mukuboko, pesi we wakamwiinkila kajisi nkoli mpawo wakanyanga mu-Ijipita ooyo sumu lyakali mukuboko kwakwe wamujaya aasumu lyakwe. 22 Eezi nziizintu zyakachitwa aaBbenaya mwana waJehoyiyada alubo wakali aampuwo yakali mbuli yabasilumamba basinguzu batatu bakusaanguna. 23 Nikuba kuti wakali kulemekwa loko kwiinda bali 30, pesi taakalikwe chuuno chipati mbuli chababaya batatu bakusaanguna. Nikuba oobo, Davida wakamusala kuti abe mupati wabalindi bakwe.
24 Asaheli mwanike waJowabbu wakali aakati kabali 30: Elihanani mwana waDodo wakuBbetelehema, 25 Shama wakuHarodi, Elikka wakuHarodi, 26 Helezi muPaliti, Ira mwana wa-Ikkeshi muTekkowa, 27 Abbi-yezari waku-Anatoti, Mebbunayi muHusha, 28 Zalimoni mu-Ahohi, Maharayi wakuNetofa, 29 Helebbu mwana waBbaana wakuNetofa, Itayi mwana waRibbayi wakuGibbeya wamusyobo waBbenjamini, 30 Bbenaya wakuPiratoni, Hidayi wakutulonga twakuGaashi, 31 Abbi-alubboni mu-Aribbati, Azimaveti wakuBbahurimu, 32 Eliyabba wakuShaalibbimu, bana baJasheni, Jonatani, 33 Shama muHarari, Ahiyamu mwana waShara muHarari, 34 Elifeleti mwana wa-Ahasibbayi mwana wamuMaakkati, Eliyamu mwana wa-Ahitofeli wakuGilo, 35 Heziro wakuKkameli, Paarayi mu-Arabbu, 36 Igalu mwana waNatani wakuZobba, Bbani wamusyobo waGadi, 37 Zelekki mu-Amoni, Naharayi muBberoti sikunyampula zilwanisyo waJowabbu mwana waZeruya, 38 Ira mu-Itira, Garebbu mu-Itira 39 a-Uriya muHeti. Boonse bakali 37.