Samiyele Wachibili
3 Nkondo yakali aakati kang’anda yaSawulu ang’anda yaDavida yakayinkilila kunembo. Davida wakayinkilila kunembo kuba aamanguzu, pesi ng’anda yaSawulu yakali kumana manguzu.
2 Aachiindi eecho, Davida wakazyala bana balombe kuHebburoni. Wakusaanguna wakali Amunoni, ngwaakazyala aa-Ahinowamu wakuJezriyeli. 3 Wachibili wakali Kkiliyabbu, ngwaakazyala aa-Abbigeli, ooyo wakali mwanakazi waNabbali wakuKkameli. Alubo wachitatu wakali Abbisalomu, ngwaakazyala aaMaakka mwana musimbi waTalimayi, mwaami wakuGeshuri. 4 Wane wakali Adonija mwana waHagiti mpawo wamusanu wakali Shefatiya mwana wa-Abbitali. 5 Wamusanu awumwi wakali Itiriyamu, ngwaakazyala aamwanakazi wakwe Egila. Aaba mbiibana Davida mbaakazyala kuHebburoni.
6 Abbineri wakayinkilila kunembo kuba aamanguzu mung’anda yaSawulu, chiindi nkondo yakali aakati kang’anda yaSawulu ang’anda yaDavida niyakali kwiinkilila kunembo. 7 Sawulu wakali aawumwi mwanakazi* wakali kutegwa Rizipa, mwana musimbi wa-Aya. Mukuya kwachiindi, Ishi-bbosheti wakabuzya Abbineri kuti: “Nkamboonzi nwaakoona aawumwi mwanakazi wandeende?” 8 Abbineri wakanyema loko akaambo kamajwi aa-Ishi-bbosheti mpawo wakati: “Ndili munkala* wakuJuda na me? Ndali kutondeezya luyando lutamani kung’anda yawuso Sawulu akubabbululu bakwe akubeenzinyina kusika sunu alubo teendakakuuzya pe mukuboko kwaDavida, pesi sunu ulikundipa mulandu akaambo kamwanakazi. 9 Leza amupe chisubulo Abbineri alubo ayungizye chisubulo eecho, kuti ndaleka kuchitila Davida mbuli mbaakakonka Jehova kulinguwe: 10 kuti uzoogwisya bwaami mung’anda yaSawulu mpawo ape Davida chuuno chabwaami kuti ayendelezye mu-Israyeli amuJuda, kuzwa kuDani kusika kuBberi-shebba.” 11 Taakwe niliba jwi limwi biyo Ishi-bbosheti ndyaakaamba kuli Abbineri, nkaambo wakali kumuyoowa.
12 Chakufwambaana, Abbineri wakatuma batumwa kuli Davida kati: “Nyika eeyi njiyani?” Wakayungizya kuti: “Pangana aandime chizuminano alubo ndizoochita zyoonse nzindikonzya* kuti ndipe kuti ma-Israyeli boonse babe kubbazu lyako.” 13 Naakamvwa oobo, wakasandula kuti: “Zilikabotu! Ndilapangana aanduwe chizuminano. Chintu chimwi biyo nchindiyanda kulinduwe nchakuti, utabuboni pe busyu bwangu kunze kwakuti weeta Mikkala mwana waSawulu nutazoosike kuzoondibona.” 14 Mpawo Davida wakatuma batumwa kuli Ishi-bbosheti, mwana waSawulu kati: “Ndipe Mikkala mwanakazi wangu ngundakabbadala aandomo zili 100 zyamaFilisiti kuti ndimukwate.” 15 Nkinkaako, Ishi-bbosheti wakalayilila kuti akabwezegwe kumulumaakwe Palatiyeli mwana waLayishi. 16 Pesi mulumaakwe wakali kulila kalikumutobela kusikila naakasika kuBbahurimu. Mpawo Abbineri wakamubuzya kuti: “Bweeda!” Mpawo wakabweeda.
17 Aachiindi eecho, Abbineri wakatuma batumwa kubaalu ba-Israyeli kuti bakaambe kuti: “Kuzwa chiindi, mwakali kuyanda kuti Davida abe mwaami wanu. 18 Lino amubweze ntaamu, nkaambo Jehova wakati kuli Davida: ‘Kwiinda mukuboko kwamubelesi wangu Davida, ndilafutula bantu bangu ma-Israyeli kuzwa mukuboko kwamaFilisiti amukuboko kwabasinkondonyina boonse.’” 19 Mpawo Abbineri wakaambuula aabantu bamusyobo waBbenjamini. Alubo Abbineri wakayinka kuHebburoni kuti akaambuule aaDavida kabali aabalikke, kamubuzya nzibakali bazuminana ma-Israyeli abamung’anda yaBbenjamini boonse.
20 Abbineri naakasika kuli Davida kuHebburoni kali aabaalumi bali 20, Davida wakachitila Abbineri pobwe, abaalumi mbaakalaabo. 21 Mpawo Abbineri wakati kuli Davida: “Leka ndiinke ndikabunganizye ma-Israyeli boonse kulinduwe mwaami simalelaangu, kuchitila kuti bapangane chizuminano anduwe mpawo iwe uzooba mwaami wazintu zyoonse nzuyanda.”* Nkinkaako, Davida wakamuleka Abbineri kuti ayende mpawo wakeenda muluumuno.
22 Aachiindi eecho, babelesi baDavida aJowabbu bakaboola kuzwa kunkondo. Bakeeta zintu zyiingi nzibakanyanga bantu. Abbineri taakachilaamwi pe aDavida muHebburoni, nkaambo Davida wakali wati ayinke muluumuno. 23 Jowabbu amasooja woonse ngaakalaawo nibakasika, Jowabbu wakabuzigwa kuti: “Abbineri mwana waNeri walisikide kumwaami mpawo mwaami wamuleka kuti ayinke mpawo weenda muluumuno.” 24 Nkinkaako, Jowabbu wakayinka kumwaami mpawo wakamubuzya kuti: “Wachitaanzi? Abbineri walisikide kulinduwe, nkamboonzi nwaamuzumizya kuti ayinke? Bona, lino wafutuka. 25 Ulimuzi biya Abbineri mwana waNeri! Wazida kuzookweena akuti azibe koonse nkuya azyoonse nzuchita.”
26 Nkinkaako, Jowabbu wakazwa mpaakabede Davida alubo wakatuma batumwa kuti batobele Abbineri mpawo bakaakumuboozezya kuchikala chakuSira, pesi Davida taakwe nchaakazi pe atala amakani aaya. 27 Abbineri naakasika kuHebburoni, Jowabbu wakamwiita kumbali wanjilaawe aageedi kuti baambuule kabali aabalikke. Nikuba oobo, nibakali nkukooko, wakamuyasa mwida mpawo wakafwa. Wakachita oobo akaambo kakuti wakali wajaya mwanikaakwe Asaheli.* 28 Nikwakayinda chiindi, Davida naakazoowamvwa makani aaya, wakati: “Ime abwaami bwangu tatukwe mulandu pe naaba aaniini kunembo lyaJehova akaambo kamulandu waganzi lya-Abbineri mwana waNeri. 29 Mulandu ooyo awube aamutwe waJowabbu akubantu boonse bamung’anda yawisi. Mung’anda yaJowabbu mutabuliki mwaalumi uuli aabulwazi bwakuzwa zintu zili mbuli busina kuchizo chakwe chakuzyazya, naakuti sichipele naakuti mwaalumi uubeleka mulimu wakupanga busumyo* naakuti mwaalumi uujayigwa aapanga naakuti uubula chakulya!” 30 Jowabbu amwanikaakwe Abbishayi bakajaya Abbineri, nkaambo wakali wajaya Asaheli mwanikaabo munkondo kuGibbiyoni.
31 Mpawo Davida wakabuzya Jowabbu abantu boonse mbaakalaabo kuti: “Amudelule zigogo zyanu mpawo mulyaange zigogo zyamasaka, mulile Abbineri.” Mwaami Davida lwakwe biya wakali kutobela musule aabantu bakanyampwide chidumbu. 32 Kuzwa waawo, bakamuzikka Abbineri kuHebburoni. Mwaami wakalila loko naakali aakabanda ka-Abbineri mpawo bantu boonse ambabo bakalila. 33 Alubo mwaami wakayimba lwiimbo lwakulila Abbineri kati:
“Abbineri nga ulafwa mbuli mbafwa na mufuba-fuba?
34 Maboko aako taakasungidwe pe,
Alubo mawulu aako taakasungidwe aansimbi.*
Wakafwa mbuli muntu wakajayigwa aazigwebenga.”*
Mpawo bantu boonse bakamulila lubo.
35 Nikwakayinda chiindi, bantu boonse bakasika kuzoopa Davida chinkwa chakumuumbulizya* nilyakachili sikati, pesi Davida wakakonka kati: “Leza andisubule alubo ayungizye chisubulo eecho kuti ndilabile chinkwa naakuti kufumbwa chintu zuba kalitanabbila!” 36 Bantu boonse bakazibona zyakachitika alubo zyakababotezya. Bantu boonse bakabotelwa anzyaakachita mwaami mbuli mbubakali kubotelwa azimwi zintu zyoonse mwaami nzyaakali kuchita. 37 Mubuzuba oobo, bantu boonse ama-Israyeli boonse bakaziba kuti mwaami teenguwe pe wakali wapa kuti Abbineri mwana waNeri ajayigwe. 38 Mpawo mwaami wakati kubabelesi bakwe: “Tamuzi na kuti muntu wafwa sunu muzulwidi alubo muntu uulemekwa mu-Israyeli? 39 Sunu tandikwe manguzu pe nikuba kuti ndakananikwa kuti ndibe mwaami alubo baalumi aaba, bana baZeruya bali aalunya lupati. Jehova abweedezye chibi kuli sikubisya kweendelana achibi chakwe.”