Samiyele Wachibili
9 Mpawo Davida wakati: “Kuli umwi na wamung’anda yaSawulu uusyeede ngundikonzya kutondeezya luyando lutamani akaambo kaJonatani?” 2 Kwakali mubelesi wamung’anda yaSawulu wakali kutegwa Zibba. Bakamwiita kuti aze kuli Davida mpawo mwaami wakamubuzya kuti: “Nduwe Zibba na?” Wakasandula kati: “Iiyi, ndime mubelesi wako.” 3 Mwaami wakayinkilila kunembo kati: “Kuli umwi na wamung’anda yaSawulu uusyeede ngundikonzya kutondeezya luyando lwaLeza lutamani?” Zibba wakasandula mwaami kati: “Kuli mwana mulombe waJonatani. Ulemene mawulu woonse.” 4 Mwaami wakamubuzya kuti: “Ulikuli?” Zibba wakasandula mwaami kati: “Uli kung’anda yaMakkiri, mwana wa-Amiyeli, kuLo-debbari.”
5 Chakufwambaana, mwaami Davida wakatuma batumwa kuti bakamubweze kung’anda yaMakkiri mwana wa-Amiyeli, kuLo-debbari. 6 Mefibbosheti mwana waJonatani, mwana waSawulu naakasika kuli Davida, wakavuntama busyu kabulangide aansi. Mpawo Davida wakati: “Mefibbosheti!” mpawo wakasandula kati: “Ndime aano ndimubelesi wako.” 7 Davida wakati kulinguwe: “Utayoowi pe, nkaambo kwaamba choonzyo, ndilakutondeezya luyando lutamani akaambo kawuso Jonatani alubo ndilakubweedezya nyika yoonse yasianyookulu Sawulu mpawo unoolya aandime* aatebbulu lyangu chiindi choonse.”
8 Naakamvwa oobo, wakavuntama mpawo wakati: “Ndimeni, ndimubelesi wako kuti undiyeeye ndimunkala uufwide?” 9 Mwaami wakayita Zibba, mubelesi waSawulu mpawo wakati kulinguwe: “Zintu zyoonse zyakali zyaSawulu azintu zyoonse zyabamung’anda yakwe, ndazipa muzukulu wasimalelaako. 10 Uzoomulimina, iwe abana bako balombe ababelesi bako alubo uzootebula zilyo kuti usanine bamumpuli yamuzukulu wasimalelaako. Pesi Mefibbosheti muzukulu wasimalelaako, unoolya aandime aatebbulu lyangu chiindi choonse.”
Zibba wakali aabana balombe bali 15 ababelesi bali 20. 11 Zibba wakati kumwaami: “Mubelesi wako ulazichita zyoonse mwaami simalelaangu nzyaalayilila mubelesi wakwe kuti achite.” Nkinkaako, Mefibbosheti wakali kulya aatebbulu lyaDavida* mbuli umwi wabana bamwaami. 12 Anguwe Mefibbosheti wakali aamwana mulombe wakali kutegwa Mikka. Bantu boonse bakali kukkala mung’anda yaZibba bakaba babelesi baMefibbosheti. 13 Mefibbosheti wakali kukkala kuJerusalema, nkaambo wakali kulya aatebbulu lyamwaami chiindi choonse alubo wakalemene mawulu woonse.