Samiyele Wachibili
16 Davida naakali wayinda mbichaani aajulu aachilundu, Zibba mubelesi waMefibbosheti wakasika kuti azoomuswaane kali aamadonki aabili akasungililidwe zyakukkalila aamusana. Madonki aaya akanyampwide zinkwa zili 200, zinkwa zyamasaansa aayanikidwe zili 100, zinkwa zyamichelo yachilimu* zili 100 anongo mpati yawayini. 2 Mwaami wakati kuli Zibba: “Nkamboonzi nwaaza aazintu eezi?” Zibba wakasandula kuti: “Madonki ngakuti bamung’anda yamwaami kabatanta, chinkwa amichelo yachilimu nzyakuti balombe kabalya alubo wayini njakuti aabo batakatale munkanda banywe.” 3 Mwaami wakati: “Mwana* wasimalelaako ulikuli?” Zibba wakati kumwaami: “Uli kuJerusalema, nkaambo waamba kuti, ‘Sunu bamung’anda ya-Israyeli balabweedezya bweendelezi bwandeende kulindime.’” 4 Mwaami wakati kuli Zibba: “Bona! Zintu zyoonse zyaMefibbosheti zyaba zyako lino.” Zibba wakati: “Ndafugama kunembo lyako. Mwaami simalelaangu andifwide luzyalo.”
5 Mwaami Davida wakasika kuBbahurimu mpawo umwi mwaalumi wamumpuli yaSawulu uutegwa Shimeyi, mwana waGera wakazwa nkwaakabede kaya kuli Davida kali kumutukila. 6 Mwaalumi ooyu wakali kumutulula* mabwe Davida, kuswaanizya ababelesi boonse baMwaami Davida abantu boonse abaalumi basinguzu bakali kuchilisyo akuchimweensi chamwaami. 7 Shimeyi wakali kutukila kati, “Zwaawa, zwaawa, iwe numwaalumi uuli aamulandu waganzi! Iwe numuntu uutagwasyi! 8 Jehova wabweedezya mulandu waganzi lyabantu bamung’anda yaSawulu ndwaakatila, ooyo ngwaakanyanga bwaami. Pesi Jehova wabikka bwaami mukuboko kwamwanaako Abbisalomu. Lino mapenzi akusikila, nkaambo uli muntu uuli aamulandu waganzi!”
9 Abbishayi mwana waZeruya wakabuzya mwaami kuti: “Nkamboonzi munkala ooyu uufwide nali kutukila mwaami simalelaangu? Leka ndiinke ndikamudyunkule mutwe.” 10 Pesi mwaami wakati: “Aninywe nibana baZeruya munjilaali? Amumuleke anditukile, nkaambo Jehova nguwe wamubuzya kuti, ‘Tukila Davida!’ Nkinkaako, ngwani uunga ulamubuzya kuti, ‘Nkamboonzi nulikuchita oobo?’” 11 Davida wakati kuli Abbishayi akubabelesi bakwe boonse: “Amubone lino, mwanaangu loko ngundakazyala uyanda kundijaya, nkinkaako, nga ndilalangililaanzi kumwaalumi ooyu wamusyobo waBbenjamini? Amumuleke anditukile, nkaambo Jehova nguwe wamubuzya kuti achite oobo! 12 Amwi Jehova ulaabona mapenzi aangu alubo Jehova ulandichitila zibotu nikuba kuti ndatukilwa sunu.” 13 Mpawo Davida abaalumi mbaakalaabo bakayinkilila kunembo kukunuka amugwagwa mpawo Shimeyi anguwe wakali kweenda kali aachilundu kabalangene, kalikumutukila akumutulula* mabwe akumututila museele mwiingi.
14 Nikwakayinda chiindi, mwaami abantu boonse mbaakalaabo bakazoosika nkubakali kuya kabali bakatala mpawo bakapumuna.
15 Aachiindi eecho, Abbisalomu abaalumi bamu-Israyeli boonse bakasika kuJerusalema alubo Ahitofeli wakali aanguwe. 16 Hushayi mu-Akkiti, mweenzinyina* waDavida naakasika kuli Abbisalomu, wakati kulinguwe: “Awongole mwaami! Awongole mwaami!” 17 Mpawo Abbisalomu wakati kuli Hushayi: “Nduuluyando lutamani na oolu ndutondeezya mweenzinyokwe? Wakalekelaanzi kwiinka aamweenzinyokwe?” 18 Hushayi wakati kuli Abbisalomu: “Ime ndili kubbazu lyayooyo wakasalwa aaJehova abantu abaalumi boonse ba-Israyeli. Ndilakkala aanguwe. 19 Alubo ndiyungizya kuti, Ngwani ngundeelede kubelekela? Teemwanaakwe na? Ndilakubelekela anduwe mbuli mbundakabelekela wuso.”
20 Mpawo Abbisalomu wakati kuli Ahitofeli: “Ndipe maanu. Ndichite biyeni?” 21 Ahitofeli wakati kuli Abbisalomu: “Wona aabamwi banakazi* bawuso mbaakasiya kuti kabalanga ng’anda.* Ma-Israyeli boonse balamvwa kuti waba chintu chinunka nsu kuli wuso alubo aabo bali kubbazu lyako balasimisigwa.” 22 Nkinkaako, bakayakila Abbisalomu tente aajulu aakaluli mpawo Abbisalomu wakoona aabamwi banakazi bawisi kunembo lyama-Israyeli boonse.
23 Mumazuba aayo, lulayo lwa-Ahitofeli lwakali kubonwa mbuli kuti ndijwi lyaLeza* wakasimpe. Oobu mbumbubo Davida a-Abbisalomu mbubakali kululemeka lulayo loonse lwa-Ahitofeli.