Samiyele Wachibili
19 Jowabbu wakabuzigwa kuti: “Mwaami uluuside alubo ulikulila Abbisalomu.” 2 Kuzunda* nkubakachita bantu mubuzuba oobo kwakachincha kwaba kulila kubantu boonse, nkaambo bakamvwa kuti mwaami wakali kulila mwanaakwe. 3 Mubuzuba oobo, bantu bakabweeda kumuunzi kabawumwine mbuli bantu bali aabweeme akaambo kakuti bakachija kunkondo. 4 Mwaami wakalivumba kubusyu mpawo wakayinkilila kunembo kalikulila aajwi pati kati: “Mwanaangu Abbisalomu! Abbisalomu mwanaangu, mwanaangu!”
5 Jowabbu wakanjila mung’anda mwaakabede mwaami mpawo wakati: “Sunu wapa kuti babelesi bako boonse babe aabweeme, aabo bafutula buumi bwako sunu abuumi bwabana bako balombe abwabana bako basimbi abwabanakazi bako abwabamwi banakazi* bako. 6 Uyanda aabo bakuzonda alubo uzonda aabo bakuyanda, nkaambo sunu watondeezya kuti bazulwidi bako ababelesi bako ubabona mbuli bantu batagwasyi. Nkaambo ndilaachoonzyo chakuti, kaansinga ndiswe twafwa toonse sunu, pesi Abbisalomu kali muumi walikunoobotelwa loko. 7 Lino nyampuka uzwe aanze ukasimye babelesi* bako. Nkaambo ndilakonka aaJehova kuti, kuti teewachita oobo, taakwe mwaalumi uutasyaale aanduwe sunu mansiku. Eezi zilayindilila kubija kwiinda mapenzi woonse ngwaakaswaana kuzwa kuli muniini kusika sunu.” 8 Kuzwa waawo, mwaami wakanyampuka waakukkala aageedi lyamuunzi alubo bantu boonse bakabuzigwa kuti: “Mwaami ukkede aageedi.” Bantu boonse bakasika kunembo lyamwaami.
Pesi ma-Israyeli bakali bachija, umwi awumwi waya kumuunzi wakwe. 9 Bantu bamisyobo yoonse bakali kukazyania kabati: “Mwaami wakatufutula kuli basinkondoma alubo wakatuvuna kumaFilisiti, pesi lino wakachija munyika akaambo ka-Abbisalomu. 10 Alubo Abbisalomu ooyo ngutwakananika kuti atweendelezye wakafwa munkondo, nkinkaako, nkamboonzi nimutali kubweza ntaamu kuti mukeete mwaami?”
11 Mwaami Davida wakatuma muntu kuti akabuzye Zadokki a-Abbiyata bapayizi kuti: “Amwaambuule aabaalu baJuda mubabuzye kuti, ‘Nkamboonzi nimuyanda kuba bamamanino kuboozya mwaami kung’anda yakwe, kakuli jwi lyama-Israyeli boonse lyakasika kung’anda yakwe? 12 Muli babbululu bangu, muli zifuwa zyangu anyama yangu.* Nkamboonzi nimuyanda kuba bamamanino kweeta mwaami?’ 13 Alubo mweelede kubuzya Amasa kuti, ‘Ani iwe tuli chifuwa changu anyama yangu na? Leza andisubule alubo ayungizye chisubulo eecho kuti iwe teewaba mupati wamasooja aangu kuzwa sunu mundawu yaJowabbu.’”
14 Nkinkaako, wakapa kuti myoyo yabaalumi boonse baJuda ibe kulinguwe mbuli moyo wamuntu uumwi alubo bakatuma mulayizyo kumwaami wakuti: “Boola iwe ababelesi bako boonse.”
15 Mwaami wakabweeda alubo wakaakusika kuJodani. Bantu bamusyobo waJuda bakasika kuGiligali kuti bazoomutambule mwaami bamusindikile bazubukaawe Jodani. 16 Mpawo Shimeyi mwana waGera, wamusyobo waBbenjamini wakuBbahurimu wakakunuka chakufwambaana abaalumi bamusyobo waJuda kuti akatambule mwaami Davida 17 alubo wakali aabaalumi bali 1 000 bamusyobo waBbenjamini. Anguwe Zibba mubelesi wang’anda yaSawulu abana bakwe balombe bali 15 ababelesi bakwe bali 20, bakakunukila kuMulonga waJodani chakufwambaana mwaami katanasika. 18 Wakazubuka* aandawu yakuzubukila kuti akeete bamung’anda yamwaami akuti akachite zyoonse nzyaakali kuyanda. Pesi mwaami kali waba aafwiifwi kuti azubuke Mulonga waJodani, Shimeyi mwana waGera wakaliwaala kunembo lyamwaami. 19 Mpawo wakati kumwaami: “Utandipi mulandu, simalelaangu alubo utayeeyi chibi nchindakachita ndimubelesi wako mubuzuba mwaami simalelaangu mbwaakazwa muJerusalema. Mwaami simalelaangu atazibikki mumoyo zintu eezi, 20 nkaambo ndimubelesi wako, ndizizi kabotu kuti ndakabisya. Nkinkaako, sunu ndaba wakusaanguna kukunuka kuzwa kubantu boonse bamung’anda yaJosefa kuti ndizootambule mwaami simalelaangu.”
21 Aachiindi eecho, Abbishayi mwana waZeruya wakati: “Shimeyi tayelede kujayigwa na akaambo kazeezi, mbukunga wakatukila munanike waJehova?” 22 Pesi Davida wakati: “Aninywe nibana baZeruya munjilaali, zyakuti nga mulakazyania aanzindiyanda sunu? Kuli muntu weelede kujayigwa na sunu mu-Israyeli? Mubonaanga tandizi na kuti sunu ndili mwaami mu-Israyeli?” 23 Kuzwa waawo, mwaami wakati kuli Shimeyi: “Tukoofwa pe.” Mpawo mwaami wakakonka kulinguwe.
24 Anguwe Mefibbosheti muzukulu waSawulu wakakunuka kuti azootambule mwaami. Taakasamba pe mawulu nikuba kugela malezu nikuba kuwacha zigogo zyakwe kuzwa mubuzuba mwaami naakazwa, kusika mubuzuba naakaboola muluumuno. 25 Naakasika* kuJerusalema kuti azootambule mwaami, mwaami wakati kulinguwe: “Mefibbosheti, nkamboonzi nwaakatayinka aandime?” 26 Wakasandula kuti: “Mwaami simalelaangu, mubelesi wangu wakandeena, nkaambo ime ndimubelesi wako ndakaamba kuti, ‘Ndibikkile chakukkalila aadonki lyangu kuchitila kuti nditante mpawo ndiinke aamwaami,’ mbukunga mubelesi wako ulilemene. 27 Pesi wakabejelezya mubelesi wako kulinduwe mwaami simalelaangu. Nikuba oobo, mwaami simalelaangu uli mbuli ngilozi yaLeza, nkinkaako, chita kufumbwa nzubona kuti zilikabotu. 28 Bantu boonse bamung’anda yandeende bakali kukonzya kujayigwa aamwaami simalelaangu, pesi iwe wakabikka mubelesi wako aakati kabaabo balida aatebbulu lyako. Niinzi chimwi nchindikonzya kulilila kumwaami wangu?”
29 Nikuba oobo, mwaami wakati kulinguwe: “Nkamboonzi nuchaambuula atala ankani eeyi, ndasala kuti iwe aZibba mwaabane muunda.” 30 Mefibbosheti wakati kumwaami: “Awubweze woonse, mbukunga mwaami simalelaangu waboola kung’anda yakwe muluumuno.”
31 Bbazilayi wakuGiliyadi wakakunuka kazwa kuRogelimu kaya kuJodani kuti asindikile mwaami kuJodani. 32 Bbazilayi wakali wachembaala loko. Wakali aaminyaka iili 80 alubo wakali kupa mwaami chakulya naakali kukkala kuMahanayimu, nkaambo wakali mwaalumi uunotede loko. 33 Mwaami wakati kuli Bbazilayi: “Atuzubukaamwi, ndiyookupa chakulya kuJerusalema.” 34 Pesi Bbazilayi wakati kumwaami: “Ani ndasyaalilwa aamazuba* aangana kandichipona, zyakuti nga ndilayinka aamwaami kuJerusalema? 35 Lino ndaba aaminyaka iili 80, ndichikonzya na kusiyanisya chibotu achibi? Ime ndimubelesi wako ndichikonzya na kusiyanisya chakulya nchindilabila anchindinywa? Ndichikonzya na kumvwa jwi lyabayimbi bachaalumi abachanakazi? Nkamboonzi mubelesi wako nayelede kuba uumbi mukuli kulinduwe mwaami simalelaangu? 36 Zilikabotu kuti mubelesi wako asisye mwaami kuJodani. Nkamboonzi mwaami nayanda kundilumba munzila iili boobu? 37 Ndileke ndibweede ndimubelesi wako akuti ndikafwide kumuunzi kulindiswe, aafwiifwi akwakazikkilwa ndeende abaama. Pesi ngoyu mubelesi wako Kkimihamu. Azubuke aamwaami simalelaangu mpawo ukamuchitile nzubona kuti zilikabotu.”
38 Mwaami wakati: “Ndilazubukaawe Kkimihamu alubo ndilamuchitila kufumbwa nzubona kuti zilikabotu. Kufumbwa nzukumbila kuti ndikuchitile, ndilakuchitila. 39 Bantu boonse bakasaanguna kuzubuka Mulonga waJodani alubo mwaami kali waamba kuzubuka, mwaami wakamyonta Bbazilayi, wamulongezya* mpawo Bbazilayi wakabweeda kumuunzi. 40 Mwaami naakazubukila kuGiligali, Kkimihamu wakazubuka aanguwe. Bantu boonse bamusyobo waJuda ahafu yama-Israyeli bakazubusya mwaami mutaleeliya.
41 Baalumi boonse ba-Israyeli bakayinka kumwaami mpawo bakati kulinguwe: “Nkamboonzi babbululu besu, baalumi bamusyobo waJuda nibakakubba akukweeta iwe abamung’anda yako mutala aaMulonga waJodani abaalumi boonse baDavida?” 42 Baalumi boonse bamusyobo waJuda bakasandula baalumi ba-Israyeli kuti: “Twakachita oobo akaambo kakuti mwaami ngubbululu wesu. Nkamboonzi nimwanyema atala amakani aaya? Kuli chintu chamwaami nchitwakalya na? Naakuti kuli chipo nchitwakapegwa na?”
43 Nibakamvwa oobo, baalumi ba-Israyeli bakasandula baalumi bamusyobo waJuda kabati: “Iswe tuli misyobo iili kkumi, nkinkaako, tuli aacheelelo chipati chakuchita oobo kuli Davida kwiinda ndinywe. Nkamboonzi nimwakatatulemeka? Teendiswe na nitwakeelede kuba bakusaanguna kuboozya mwaami?” Pesi jwi lyabaalumi bamusyobo waJuda lyakazunda* lyabaalumi ba-Israyeli.