Detoronomi
13 “Kuti aakati kanu kwaba mupolofita naakuti siziloto waamba zitazoochitike kunembo mpawo wamupa chitondeezyo naakuti waamba zintu zigambya zitazoochitike kunembo, 2 mpawo chitondeezyo eecho naakuti chigambyo eecho chachitika choonzyo mpawo waamba kuti, ‘Atutobele bamwi baleza, baleza mbimutazi pe, atubakombe,’ 3 tamweelede kwaaswilila pe majwi aamupolofita naakuti siziloto ooyo, nkaambo Jehova Leza wanu ulikumusunka kuti azibe kuti mulamuyanda na Jehova Leza wanu amoyo wanu abuumi bwanu boonse. 4 Mweelede kutobela Jehova Leza wanu, mumuyoowe, mubambe milawu yakwe, muswiilile jwi lyakwe; mweelede kukomba nguwe akukakatila kulinguwe. 5 Pesi mupolofita naakuti siziloto ooyo weelede kujayigwa, nkaambo wamusungwaazya kuti mupapile Jehova Leza wanu—ooyo wakamugwisya munyika ya-Ijipita akumunununa mung’anda yabuzike—kuti amugwisye munzila Jehova Leza wanu njaakamulayilila kuti mweende mulinjiyo. Mweelede kugwisya bubi aakati kanu.
6 “Kuti mwana wabanyoko naakuti mwanaako mulombe naakuti mwanaako musimbi naakuti mwanakazi wako nguyanda loko naakuti mweenzinyokwe ngumvwananaawe loko weezya kukoongelezya kumbali kati, ‘Atweende tukakombe bamwi baleza,’ baleza mbutazi pe naakuti masianyookulu mbibakatazi pe, 7 kuzwa kuli baleza babantu boonse bamuzyungulukide, bali aafwiifwi naakuti kule andinywe, kuzwa kumagolelo amwi aanyika kusikila kumagolelo aambi aanyika, 8 utamuzuminini pe nikuba kumuswiilila, utamweeteleli pe naakuti kumufwida luzyalo naakuti kumukwabilila; 9 pesi weelede kumujaya, utamuleki pe. Nduwe weelede kusaanguna kumuuma mabwe kuti afwe nikutazootobele bamwi boonse. 10 Mweelede kumujaya kwiinda mukumuuma aamabwe nkaambo walikuyanda kupa kuti muleye munzila yaJehova Leza wanu ooyo wakamugwisya munyika ya-Ijipita mung’anda yabuzike. 11 Ma-Israyeli boonse bazoomvwa makani aayo mpawo bazooyoowa alubo tabazoofwi bachita chibi chili boobu pe aakati kanu.
12 “Kuti mwamvwa makani muli umwi wamyuunzi njalikumupa Jehova Leza wanu kuti mukkale aakuti, 13 ‘Baalumi batagwasyi bayinka kuyooyena bantu bakkala mumyuunzi yabo kabati: “Atweende tukakombe bamwi baleza,” baleza aabo mbimutazi,’ 14 mweelede kwaalanga-langa makani aayo muyanduulisisye alubo mubuzye-buzye; kuti kwajanika kuti chintu eechi chisesemya chakachitika choonzyo aakati kanu, 15 mweelede kunyonyoona bantu bakkala mumuunzi ooyo apanga. Zintu zyoonse zili mulinguwo kuswaanizya azivuubwa amuzinyonyoone aapanga. 16 Mweelede kubunganizya zintu zyawo ziyandikana zyoonse aakati kalubuwa lwamuunzi, mpawo muunzi ooyo muutente aamulilo, zintu eezyo ziyandikana ziyooba chipo chikkwene kuli Jehova Leza wanu. Muunzi ooyo ulakkala kawuli mulwi wamabwe. Tamweelede kuuyakulula lubo pe. 17 Utabwezi chintu nichiba chimwi cheelede kunyonyoonwa, kuchitila kuti Jehova aleke bukali bwakwe buyaka mpawo amweetelele, amufwide luzyalo akuti amuvuzye mbuli mbaakakonkezya kumasianyookulu. 18 Nkaambo mweelede kuswiilila Jehova Leza wanu kwiinda mukubamba milawu yakwe yoonse njindili kumulayilila sunu, kuti muchite ziluleme mumeso aaJehova Leza wanu.