Baami Wachibili
13 Mumunyaka wachi 23 wabweendelezi bwaJehowashi mwana wa-Ahaziya mwaami waJuda, Jehowahazi mwana waJehu wakaba mwaami wa-Israyeli muSamariya, alubo wakeendelezya kwaminyaka iili 17. 2 Wakaliswini kuchita zibi mumeso aaJehova, alubo wakakakatila muchibi Jerobbowamu mwana waNebbati nchaakali wapa kuti Israyeli achite. Taakachileka pe. 3 Nkinkaako, Jehova wakabanyemena loko ma-Israyeli, mpawo wakababikka mukuboko kwaMwaami Hazayeli waSiriya amukuboko kwaBbeni-hadadi mwana waHazayeli mumazuba aabo woonse.
4 Nikwakayinda chiindi, Jehowahazi wakakombelezya Jehova kuti amufwide luzyalo, mpawo Jehova wakamuswiilila, nkaambo wakali wabona mwaami waSiriya mbaakali kudyaaminina ma-Israyeli. 5 Nkinkaako, Jehova wakapa ma-Israyeli muvuni kuti abaangunune mukuboko kwaSiriya, mpawo ma-Israyeli bakakonzya kukkala mumyuunzi yabo mbuli chiindi.* 6 (Nikuba oobo, teebakachisiya pe chibi chang’anda yaJerobbowamu, eecho nchaakali wapa kuti Israyeli achite. Bakaliswini kuchita chibi eecho* alubo chisamu chisalala* chakachiliwo muSamariya.) 7 Jehowahazi wakasyaalilwa aamasooja beenda aamabbiza bali 50, ngolo zili 10 amasooja beenda aamawulu bali 10 000 kupela, nkaambo mwaami waSiriya wakali wabanyonyoona akubalyatuuka mbuli lusuko lubawo aachiindi chakupolwa kwazilyo.
8 Makani aachiindi woonse aali atala aJehowahazi, azintu zyoonse nzyaakachita amilimu yakwe yanguzu, taalembedwe na mubbuku lyamakani aachiindi aaziindi zyabaami ba-Israyeli? 9 Mpawo Jehowahazi wakalazikwaamwi amasianyinakulu alubo bakamuzikka muSamariya. Mwanaakwe Jehowashi wakaba mwaami mundawu yakwe.
10 Mumunyaka wachi 37 wabweendelezi bwaMwaami Jehowashi waJuda, Jehowashi mwana waJehowahazi wakaba mwaami wa-Israyeli muSamariya, alubo wakeendelezya kwaminyaka iili 16. 11 Wakaliswini kuchita zibi mumeso aaJehova, taakazisiya pe zibi zyoonse Jerobbowamu mwana waNebbati nzyaakali wapa kuti Israyeli achite. Wakaliswini kuchita zibi* eezi.
12 Makani aachiindi woonse aali atala aJehowashi, azintu zyoonse nzyaakachita amilimu yakwe yanguzu, ambaakalwana aaMwaami Amaziya waJuda, taalembedwe na mubbuku lyamakani aachiindi aaziindi zyabaami ba-Israyeli? 13 Jehowashi wakalazikwaamwi amasianyinakulu mpawo Jerobbowamu* wakakkala aachuuno chakwe chabwaami. Jehowashi wakazikkwaamwi abaami ba-Israyeli muSamariya.
14 Elisha naakachiswa bulwazi bwakazoopa kuti afwe, Jehowashi mwaami wa-Israyeli wakakunuka kaya kulinguwe mpawo wakamulilila kati: “Ndeende, ndeende! Ngolo ya-Israyeli abasimabbiza bakwe!” 15 Mpawo Elisha wakati kulinguwe: “Bweza daantambwa atwaanta.” Nkinkaako, wakabweza daantambwa atwaanta. 16 Mpawo wakabuzya mwaami wa-Israyeli kuti: “Jata daantambwa lyako.” Mwaami wakalijata, kuzwa waawo, Elisha wakabikka maboko aakwe aajulu aamaboko aamwaami. 17 Wakati: “Jula windo lyakubuzwezuba.” Mpawo wakalijula. Elisha wakati: “Labbula.” Mpawo wakalabbula. Wakati: “Kaanta kaJehova kakuzunda,* kaanta kakuzunda Siriya. Uzoonyonyoona* Siriya ku-Afekki kusikila wiilobye.”
18 Wakayungizya kuti: “Bweza twaanta,” mpawo wakatubweza. Mpawo wakabuzya mwaami wa-Israyeli kuti: “Yasa aansi.” Nkinkaako, wakayasa aansi kwaziindi zitatu mpawo wakaleka. 19 Muntu waLeza wakasimpe wakamunyemena loko mpawo wakati: “Wayelede kuyasa aansi kwaziindi zili musanu naakuti zili musanu akamwi! Walikunooyinyonyoona Siriya kusikila wiilobye, pesi lino Siriya uzooyizunda kwaziindi zitatu kupela.”
20 Mpawo Elisha wakafwa alubo wakazikkwa. Kwakali zigwebenga zyakuMowabbu zinyanga bantu zintu zyakali kusika mu-Israyeli kumasaangunino aamunyaka.* 21 Bamwi baalumi nibakali kuzikka muntu, bakabona zigwebenga zinyanga bantu zintu. Aachiindi nchicheecho, bakamuwaala mukabanda ka-Elisha mpawo bakachija. Muntu ooyo naakaguma mafuwa aa-Elisha, wakaba muumi lubo mpawo wakayimikila.
22 Mwaami Hazayeli waSiriya wakali kudyaaminina Israyeli mumazuba woonse aaJehowahazi. 23 Nikuba oobo, Jehova wakabafwida luzyalo akubeetelela, alubo wakaba aandaba ambabo akaambo kachizuminano chakwe nchaakapangana aa-Abbrahamu, Izakka, aJakkobo. Taakayanda pe kubanyonyoona alubo taakabatanda pe kunembo lyakwe kusika sunu. 24 Mwaami Hazayeli waSiriya naakafwa, mwanaakwe Bbeni-hadadi wakaba mwaami mundawu yakwe. 25 Mpawo Jehowashi mwana waJehowahazi wakayibweza myuunzi kuli Bbeni-hadadi mwana waHazayeli, eeyo Hazayeli njaakali wanyanga Jehowahazi wisi munkondo. Jehowashi wakamuzunda kwaziindi zitatu alubo wakayibweza myuunzi ya-Israyeli.