Baami Wachibili
11 Ataliya banyina ba-Ahaziya, nibakabona kuti mwanaabo wafwa, bakanyampuka bajaya bana boonse bakeelede kukkala aachuuno chabwaami. 2 Nikuba oobo, Jehoshebba mwana musimbi waMwaami Jehoramu, muchizi wa-Ahaziya, wakabweza Jehowashi mwana wa-Ahaziya kalikumubba biya kuzwa aakati kabana bamwaami bakeelede kujayigwa, waakumusisaamwi asikumulela mung’anda yakoona yamukati. Bakakonzya kumusisa kuti atabonwi aa-Ataliya, nkinkaako taakajayigwa pe. 3 Wakakkalaamwi anguwe kwaminyaka iili musanu awumwi kasisidwe mung’anda yaJehova, chiindi Ataliya naakali kweendelezya munyika eeyo.
4 Mumunyaka wamusanu ayibili, Jehoyiyada wakayita basilutwe bamyaanda babalindi maKkariya abalindi bamuunzi wamwaami,* mpawo wakati basike kulinguwe kung’anda yaJehova. Wakapangana chizuminano ambabo, mpawo wakati bakonke kung’anda yaJehova. Kuzwa waawo, wakabatondeezya mwana wamwaami. 5 Wakabalayilila kuti: “Nzezi nzimweelede kuchita: Nkamu yanu iimwi aakati kankamu zitatu inoobeleka muSabata, alubo inoolinda ng’anda yamwaami.* 6 Imwi nkamu inooli kuGeedi lyaNtalisyo, mpawo nkamu yachitatu inooli kugeedi, kusule aabalindi bamuunzi wamwaami. Munoochinchaana kulinda ng’anda. 7 Nkamu zyanu zibili zitanoopumwide muSabata, zyeelede kulinda ng’anda yaJehova kuti zikwabilile mwaami. 8 Mweelede kuzyunguluka mwaami mumabazu woonse, umwi awumwi kajisi zilwanisyo zyakwe mukuboko. Kufumbwa muntu uunjila aakati kamasooja, weelede kujayigwa. Amukkale kamuli aafwiifwi amwaami kufumbwa nkwaya.”*
9 Basilutwe bamyaanda bakachita mbubo loko mbuli mbaakalayilila Jehoyiyada mupayizi. Umwi awumwi wakabweza baalumi mbaakali kuzulwida bakali kubeleka muSabata, kuswaanizya abaabo bakapumwide muSabata, mpawo bakayinka kuli Jehoyiyada mupayizi. 10 Mpawo mupayizi wakapa basilutwe bamyaanda masumu antobo zyalawundi zyakali zyaMwaami Davida, eezyo zyakali mung’anda yaJehova. 11 Balindi bamuunzi wamwaami bakayimikila mundawu zyabo, umwi awumwi kajisi zilwanisyo zyakwe mukuboko, kuzwa kubbazu lyakuchilisyo kwang’anda kusika kubbazu lyakuchimweensi kwang’anda aafwiifwi achipayililo, alubo bamwi kabali aafwiifwi ang’anda, kabazyungulukide mwaami. 12 Mpawo Jehoyiyada wakamweeta aanze mwana wamwaami wamuzwaatika ngwaani yabwaami akumubikka Bukamboni,* mpawo bakamubikka kuti abe mwaami akumunanika. Bakasaanguna kukambilila kabati: “Awongole mwaami!”
13 Ataliya naakamvwa musindo wabantu bakali kuchijaana akoompolola, mpawaawo wakayinka kubantu bakali kung’anda yaJehova. 14 Wakabona mwaami kayimvwi aafwiifwi apila, kweendelana achiyanza chabo. Basilutwe abasikulizya myeembo bakalaamwi amwaami, alubo bantu boonse bamunyika eeyo bakali kusekelela akulizya myeembo. Ataliya naakazibona, wakadelula zigogo zyakwe, mpawo wakakwiila kati: “Bandibukila! Bandibukila!” 15 Pesi Jehoyiyada mupayizi wakalayilila basilutwe bamyaanda, aabo bakali kuzulwida nkamu yamasooja kuti: “Amumugwisye aakati kamasooja, kufumbwa muntu uutamutobele, amumujaye apanga!” Nkaambo mupayizi wakali waamba kuti: “Mutamujayili mung’anda yaJehova pe.” 16 Nkinkaako, bakamujata, mpawo naakasika kundawu mabbiza nkwaanjilila kaaya kung’anda yamwaami,* bakamujaya nkukooko.
17 Mpawo Jehoyiyada wakapanga chizuminano aakati kaJehova amwaami abantu, chakuti balakkala kabali bantu baJehova, alubo wakapanga chizuminano aakati kamwaami abantu. 18 Kuzwa waawo, bantu boonse munyika eeyo bakayinka kung’anda yaBbaala* baakudilisya zipayililo zyakwe akuzinyonyweeda dyo zikozyano zyakwe, alubo bakajaya Matani mupayizi waBbaala kunembo aazipayililo.
Mpawo mupayizi wakasala bamwi bantu kuti babe balangizi bang’anda yaJehova. 19 Mukuyungizya, wakabweza basilutwe bamyaanda, balindi maKkariya, balindi bamuunzi wamwaami, abantu boonse bamunyika eeyo kuti basindikile mwaami kuzwa kung’anda yaJehova, mpawo bakamusisya kung’anda yamwaami* kababelesya nzila yiinda kugeedi lyabalindi bamuunzi wamwaami. Mpawo mwaami wakakkala aachuuno chabwaami. 20 Nkinkaako, bantu boonse munyika eeyo bakasekelela alubo muunzi wakaba muluumuno, nkaambo bakali bajaya Ataliya apanga kung’anda yamwaami.
21 Jehowashi wakali aaminyaka iili musanu ayibili naakaba mwaami.