Ezra
5 Mpawo mupolofita Hagayi amupolofita Zakkariya muzukulu wa-Ido bakapolofita kumaJuda bakali muJuda amuJerusalema, muzina lyaLeza wa-Israyeli ooyo wakali aambabo. 2 Mpimpawo Zerubbabbeli mwana waShelatiyeli aJeshuwa mwana waJehozadakki nibakasaanguna kuyakulula ng’anda yaLeza yakali muJerusalema alubo bapolofita baLeza bakali aambabo kababagwasya. 3 Aachiindi eecho, Tatenayi mweendelezi wachilawu chili Mutala aaMulonga* aSheta-bbozenayi abeenzinyina bakasika kulimbabo bababuzya kuti: “Ngwani wakamupa mvumo yakuti muyake ng’anda eeyi akuti mumaninsye mayake aaya?” 4 Alubo bakababuzya kuti: “Mbaani baalumi balikubeleka mulimu ooyu?” 5 Pesi liso lyaLeza lyakali aabaalu bamaJuda alubo teebakabalesya pe kuyaka, kusikila mulumbe nwaakatumizigwa kuli Dariyasi alugwalo luli atala ankani eeyi nilwakaboola.
6 Ndolu lugwalo Tatenayi mweendelezi wachilawu chili Mutala aaMulonga aSheta-bbozenayi abeenzinyina, beendelezi baniini bamuchilawu chili Mutala aaMulonga ndubakatumizya Mwaami Dariyasi. 7 Bakamutumizya mulumbe, alubo nzezi nzibakalemba:
“KuMwaami Dariyasi:
“Baaluumuno! 8 Mwaami azibe kuti, twakayinka kuchilikiti* chaJuda, kung’anda yaLeza mupati, ilikuyakwa aamabwe mapati aalikukunkulisigwa* akubikkwa kabotu, alubo masamu alikubikkwa aamiduli. Mulimu ulikubelekwa chabusungu abantu alubo kubeleka changuzu nkubali kuchita kulikupa kuti bayinkilile kunembo. 9 Mpawo twakabuzya baalu babo kuti: ‘Ngwani wakamupa mvumo yakuti muyake ng’anda eeyi akuti mumaninsye mayake aaya?’ 10 Alubo twakabuzya mazina aabo kuchitila kuti tukulembele mazina aabaalumi aabo balikuzulwida.
11 “Njeyi nsandulo njibakatupa: ‘Tuli babelesi baLeza weendelezya julu anyika alubo tulikuyakulula ng’anda yakayakidwe minyaka myiingi yayinda, eeyo mwaami mupati wa-Israyeli njaakayakide akwiimaninsya. 12 Nikuba oobo, akaambo kakuti mandeende bakanyemya Leza wakujulu, wakababikka mukuboko kwaMwaami Nebbukkadineza waBbabbiloni, muKkaludiya, ooyo wakadilisya ng’anda eeyi akubweza bantu wabatola mubuzike kuBbabbiloni. 13 Pesi mumunyaka wakusaanguna wabweendelezi bwaMwaami Kkoreshi waBbabbiloni, Mwaami Kkoreshi wakalayilila kuti ng’anda yaLeza eeyi iyakululwe. 14 Mukuyungizya, Mwaami Kkoreshi wakagwisya zibelesyo zyangolida azyansiliva zyamung’anda yaLeza zyakali mutempele lyamuBbabbiloni, eezyo Nebbukkadineza nzyaakagwisya kutempele lyakali muJerusalema mpawo wazitola kutempele lyakali kuBbabbiloni. Zyakapegwa mwaalumi uutegwa Sheshibbaza* ooyo Kkoreshi ngwaakabikka kuba mweendelezi. 15 Kkoreshi wakati kulinguwe: “Bweza zibelesyo eezi wiinke aazyo kuJerusalema ukazibikke mutempele, nkukwaamba ng’anda yaLeza, iyooyakululwa aandawu mpuyakabede chiindi.” 16 Mpawo Sheshibbaza ooyu wakasika wayaka ntalisyo yang’anda yaLeza iili muJerusalema; kuzwa aachiindi eecho kusikila lino ilikuyakwa, pesi tayinamana pe.’
17 “Lino kuti kazili kabotu kumwaami, akuyanduulisisigwe muchibikkilo chamwaami muBbabbiloni kuchitila kuti kuzibikane kuti nichoonzyo na kuti Mwaami Kkoreshi wakalayilila kuti ng’anda iili muJerusalema iyakululwe; mpawo nzyatasale mwaami atala ankani eeyi zitumizigwe kulindiswe.”