Lwakusaanguna kuBakkorinte
12 Bakombima, kumakani aali atala azipo zyamuuya, tandiyandi pe kuti mutabi aaluzibo. 2 Mulizi kuti nimwakachili bantu bazisi,* mwakali kweenwa akupambulwa kuti mutobele zibumbwa zitaambuuli, alubo mwakali kwiinka kufumbwa nkuzyakali kumutola. 3 Ndiyanda kuti muzibe kuti, taakwe muntu uunga kuti kaambuula kwiinda mumuuya waLeza, waamba kuti: “Jesu ulitukidwe,” alubo taakwe muntu uunga waamba kuti: “Jesu Mwaami,” kunze kwakuti kaambuula kwiinda mumuuya uusalala.
4 Kuli zipo zisiyene-siyene pesi kuli muuya uumwi 5 alubo kuli milimu iisiyene-siyene pesi kuli Mwaami uumwi, 6 alubo kuli nzila zyiingi zyakubeleka, pesi nguLeza uumwi uuchita milimu yoonse eeyi mubantu boonse. 7 Pesi kuyubununwa kwamuuya, kupegwa umwi awumwi akaambo kamakanze aakugwasya bantu. 8 Nkaambo umwi upegwa busongo bwakwaambuula* kwiinda mumuuya, umwi luzibo lwakwaambuula kweendelana amuuya uumwi, 9 umwi upegwa lusyomo kwiinda mumuuya uumwi, umwi zipo zyakuponia kwiinda mumuuya uumwi, 10 umwi kuchita milimu iigambya, umwi kupolofita, umwi kumvwisisisya majwi aakazulwidwa aamuuya, umwi kwaambuula mundimi* zisiyene-siyene, umwi kupandulula ndimi. 11 Pesi milimu yoonse eeyi ichitwa aamuuya uumwi, ooyo uulikwaabila milimu eeyi kuli umwi awumwi kweendelana ambuuyanda.
12 Mbukunga mubili ngumwi pesi ulaazipanzi zyiingi, alubo nikuba kuti zipanzi nzyiingi, pesi mubili ngumwi, mbabede anguwe Kkristu. 13 Nkaambo, kwiinda mumuuya uumwi, toonse twakabbabbatizigwa mumubili uumwi, kufumbwa kuti tuli maJuda naakuti tuli maGrikki, kufumbwa kuti tuli bazike naakuti tuli bantu baangunukide, toonse twakanywisigwa muuya uumwi.
14 Nkaambo kwaamba choonzyo, mubili tawupangidwe aachipanzi chimwi pe, pesi upangidwe aazipanzi zyiingi. 15 Kuti kuulu kwaamba kuti, “Mbukunga tandili kuboko pe, tandili chipanzi chamubili,” eezi tazipi kuti kuleke kuba chipanzi chamubili. 16 Alubo kuti kutwi kwaamba kuti, “Mbukunga tandili liso pe, tandili chipanzi chamubili,” eezi tazipi kuti kuleke kuba chipanzi chamubili. 17 Kaansinga mubili woonse ndiso, wali kunoomvwa aanzi? Kaansinga mubili woonse nkutwi, wali kunoonunkizya aanzi? 18 Pesi Leza wakabamba chipanzi chamubili chimwi achimwi mbuli mbayanda.
19 Kaansinga zipanzi zyamubili zyoonse zilikozyenie, mubili wali kunooba kuli? 20 Nikuba oobo, kuli zipanzi zyiingi, pesi mubili ngumwi. 21 Liso talinoonga lyabuzya kuboko kuti, “Tandikwe ndaba pe anduwe,” alubo mutwe tunoonga wabuzya mawulu kuti, “Tandikwe ndaba pe andinywe.” 22 Nikuba oobo, zipanzi zyamubili zibonekaanga tazikwe manguzu zilayandikana, 23 alubo zipanzi zyamubili nzitulangilaansi, tuzilemeka loko, nkinkaako, zipanzi zyesu zitaboneki kabotu zilemekwa loko, 24 kakuli zipanzi zyesu zibotu taziyandi chintu pe. Nikuba oobo, Leza wakapanga mubili munzila eeyi, akuchipa bulemu bupati chipanzi chilangilwaansi, 25 kuchitila kuti kutabi kwaanzaana mumubili, pesi kuti zipanzi zyamubili zigwasyanie. 26 Kuti chimwi chipanzi chachiswa, zimwi zipanzi zyoonse zilachiswaamwi anchicho, alubo kuti chimwi chipanzi chalemekwa, zimwi zipanzi zyoonse zilabotelwaamwi anchicho.
27 Inywe muli mubili waKkristu alubo umwi awumwi wanu nchipanzi chamubili wakwe. 28 Alubo Leza ubikkide umwi awumwi aandawu yakwe iimweelede mumbungano. Bakusaanguna mbaapostoli, bachibili mbapolofita, bachitatu mbayiisi, mpawo kuze bachita milimu iigambya, mpawo balaazipo zyakuponia, mpawo bachita milimu yakugwasya, mpawo balaamaanu aakuzulwida, mpawo baambuula mundimi. 29 Boonse mbaapostoli na? Boonse mbapolofita na? Boonse mbayiisi na? Boonse bachita milimu iigambya na? 30 Boonse balaazipo zyakuponia na? Boonse baambuula mundimi na? Boonse mbaasikutolekela* na? 31 Pesi amubeleke changuzu* kuti mujane zipo zipati. Nikuba oobo, ndilamutondeezya nzila mpati yiinda zyoonse.