Lugwalo lwaJakkobo
5 Amuswiilile inywe nimunotede, amulile akoomoka akaambo kamapenzi aatazoomusikile. 2 Bunoti bwanu bwabola, alubo zyakuzwaata zyanu zyaligwa aazyuuka. 3 Ngolida ansiliva yanu zyaligwa aangula, alubo ngula yazyo izooba kamboni uumupa mulandu mpawo izoolya nyama yanu. Nzimwakabunganizya zizooba mbuli mulilo mumazuba aakumamanino. 4 Amubone! Mbadalo njimwakaleka kufozya babelesi bakatebula mumyuunda yanu iliswini kulila, alubo kulilila lugwasyo kwabasikutebula kwasika mumatwi aaJehova* wamakamu. 5 Mulibukkede alubo mulikulikondelezya aanyika. Mwapa kuti myoyo yanu ineneye mubuzuba bwakujayigwa. 6 Mwabapa mulandu bamwi, mwamujaya muntu uululeme. Ani talikumukazya na?
7 Nkinkaako bakombima, amube aamoyo mulamfu kusikila kuchiindi chakubawo kwaMwaami. Mulimi uliinkilila kunembo kulindila muchelo uuyandikana waanyika amoyo mulamfu, kusikila iwe mvula yakusaanguna ayamamanino. 8 Andinywe amutondeezye moyo mulamfu, amusimye myoyo yanu, nkaambo chiindi chakubawo kwaMwaami chaswena aafwiifwi.
9 Bakombima, mutang’ung’uni pe kuli umwi awumwi wanu, kuchitila kuti mutabetekwi pe. Amubone! Mubetesi uliimvwi aamilyango. 10 Bakombima, amutobelezye chikozyano chabapolofita bakaambuula muzina lyaJehova,* aabo bakapenzegwa alubo bakatondeezya moyo mulamfu. 11 Amubone! Tubabona kuti balabotelwa* aabo bakalisimya. Mwakamvwa atala akulisimya kwaJobu alubo mwakabona nzyaakamuchitila Jehova* kumamanino, kuti Jehova* ulaaluyando* lupati alweetelelo.
12 Kwiinda zyoonse, bakombima, amuleke kukonka aajulu naakuti anyika naakuti achimwi chikonke. Pesi “Iiyi” wanu abe iiyi, alubo “Peepe” wanu abe peepe, kuchitila kuti mutabetekwi pe.
13 Kuli uuli mubuyumu-yumu na aakati kanu? Ayinkilile kunembo kukomba. Kuli uuboteledwe na? Ayimbe ntembawuzyo. 14 Kuli uuchiswa na aakati kanu? Ayite baalu bambungano, alubo abamukombele, bamunanike mafuta muzina lyaJehova.* 15 Mpawo nkombyo yalusyomo ilapa kuti ooyo uuchiswa* apone, alubo Jehova* ulamubusya. Mukuyungizya, kuti kakuli wakachita zibi, ulalekelelwa.
16 Nkinkaako, amulyaambilile zibi zyanu aantanganana kuli umwi awumwi alubo amukombelane, kuchitila kuti muponesegwe. Nkombyo yakukombelezya yamuntu uululeme ilaamanguzu loko.* 17 Elija wakali muntu mbuli ndiswe, pesi naakakomba amoyo woonse kuti mvula itawi, mvula teeyakawa pe aanyika kwaminyaka iitatu amyeezi iili musanu awumwi. 18 Mpawo wakakomba lubo, mpawo mvula yakawa alubo nyika yakazyala michelo.
19 Nibakombima, kuti umwi aakati kanu wapambulwa kuzwa mukasimpe mpawo umwi wamuboozya lubo, 20 amuzibe kuti, kufumbwa muntu uuboozya sikubisya kunzila yakwe yakubisya, uzoomufutula kuzwa kulufu alubo uzoovumba zibi zyiingi loko.