Chiyubunuzyo chaJohane
6 Mpawo ndakabona aawo Mwanaambelele naakabbadununa chimwi chazijazyo zili musanu azibili, alubo ndakamvwa chimwi chazilenge zyuumi zine kachiti ajwi pati lili mbuli kudilima kwamvula: “Kuza!” 2 Mpawo nindakalanga, ndakabona bbiza lituba alubo ooyo wakakkede aalindilyo wakajisi daantambwa, alubo wakapegwa ngowani yabwaami* alubo wakayinka kaya buzunda akumaninsizya kuzunda kwakwe.
3 Naakabbadununa chijazyo chachibili, ndakamvwa chilenge chuumi chachibili kachiti: “Kuza!” 4 Mpawo limwi bbiza lisalala mbuli mulilo lyakazwa, alubo ooyo wakakkede aalindilyo wakapegwa manguzu aakuti agwisye luumuno aanyika, kuchitila kuti bantu bajayane, alubo wakapegwa panga pati.
5 Naakabbadununa chijazyo chachitatu, ndakamvwa chilenge chuumi chachitatu kachiti: “Kuza!” Mpawo nindakalanga, ndakabona bbiza lisiya, alubo ooyo wakakkede aalindilyo wakajisi chikkelo mukuboko kwakwe. 6 Ndakamvwa chintu chakali kumvwikka mbuli jwi aakati kazilenge zyuumi zine kachiti: “Lita lyawiiti lilawulwa adinari* limwi alubo malita aatatu aabbali alawulwa adinari limwi alubo mutanyonyooni mafuta aama-olifa awayini.”
7 Naakabbadununa chijazyo chachine, ndakamvwa jwi lyachilenge chuumi chachine kaliti: “Kuza!” 8 Mpawo nindakalanga, ndakabona bbiza litubulukide alubo ooyo wakakkede aalindilyo wakali aazina lyakuti Lufu. Alubo Kabanda kakali kumutobela aafwiifwi.* Alubo zyakapegwa manguzu aakuti zyeendelezye chipanzi chachine chanyika, kuti zijaye kazibelesya panga damfu, nzala, chilwazi chijaya, abanyama baanyika.
9 Naakabbadununa chijazyo chamusanu, kunsi aachipayililo, ndakabona buumi bwabaabo bakajayigwa akaambo kajwi lyaLeza alubo akaambo kabukamboni mbubakapede. 10 Bakoompolola ajwi pati kabati: “Kusikila lili, Mwaami Singuzuzyoonse, uusalala alubo uusyomeka, kutababeteki pe akubasubula akaambo kaganzi lyesu aabo bakkala aanyika?” 11 Alubo umwi awumwi wabo wakapegwa chigogo chilamfu chituba, mpawo bakabuzigwa kuti bapumune kwachiindi chifwiifwi, kusikila ukkwane mweelwe wabazikenyina abakombinyina, aabo bakali baba aafwiifwi kuti bajayigwe mbuli mbabo.
12 Alubo ndakabona naakabbadununa chijazyo chamusanu awumwi, kwakaba muzuzumo wanyika mupati, alubo zuba lyakasiya mbuli chisaka chipangidwe aaboya* alubo mweezi woonse wakasalala mbuli ganzi, 13 alubo nyenyeezi zyakujulu zyakalokela aanyika mbuli mbuziloka nkuyu mbisi mumukuyu nwaazungaanisigwa aaguwo pati. 14 Alubo julu lyakazwa mbuli mbulipeteka bbuku lyakupeta, alubo zilundu zyoonse atusuwa toonse zyakagwisigwa aandawu yazyo. 15 Mpawo baami banyika, balupati-pati, beendelezi bamasoja, bantu banotede, bantu basimide, bazike boonse, abantu boonse baangunukide, bakayuba mumpako amumabwe aamuzilundu. 16 Alubo baliswini kubuzya zilundu amabwe kuti: “Amutulimbe alubo mutusise kuzwa kumeso kwaYooyo uukkede aachuuno chabwaami akubukali bwaMwanaambelele, 17 nkaambo buzuba bupati bwabukali bwabo bwasika, alubo ngwani uukonzya kwiimikila?”