Detoronomi
3 Mpawo twakanyona, twatanta katubelesya nzila yaBbashani. Mpawo Ogi mwaami waBbashani wakasika abantu bakwe boonse kuti bazootulwane ku-Edireyi. 2 Nkinkaako, Jehova wakati kulindime, ‘Utamuyoowi pe nkaambo ndiyoomubikka mukuboko kwako aamwi abantu bakwe anyika yakwe alubo uyoomuchita mbuli mbuwakachita Sihoni mwaami wama-Amori, ooyo wakali kukkala kuHeshibboni.’ 3 Nkinkaako, Jehova Leza wesu wakabikka Mwaami Ogi waBbashani abantu bakwe boonse mukuboko kwesu alubo twakayinkilila kunembo kubajaya kusikila bantu bakwe boonse bamana. 4 Twakayizunda myuunzi yakwe yoonse. Twakabweza myuunzi yabo yoonse, myuunzi iili 60, chilawu choonse cha-Agobbi, bwaami bwa-Ogi muBbashani. 5 Myuunzi eeyi yoonse yakayakilidwe aamiduli milamfu kayili aamageedi aminkulwa,* alubo kwakali tuunzi twiingi loko twakatayakilidwe. 6 Nikuba oobo, twakayinyonyoona kuswaanizya abaalumi, banakazi, abana, mbuli mbutwakachita kuMwaami Sihoni waHeshibboni nitwakanyonyoona myuunzi yoonse. 7 Twakabweza zivuubwa zyoonse azimwi zintu zyakali mumyuunzi eeyo.
8 Aachiindi eecho, twakabweza nyika yabaami babili bama-Amori bakali kukkala muchilawu chaJodani, kuzwa kuKalonga ka-Anoni kuyoosika kuChilundu chaHemoni 9 (maSidoni nchibakali kwiita kuti Siriyoni mpawo ma-Amori nchibakali kwiita kuti Seniri), 10 amyuunzi yoonse iili muntandabale, Giliyadi yoonse, aBbashani yoonse kuyoosika kuSalekka a-Edireyi, myuunzi yamubwaami yakali ya-Ogi muBbashani. 11 Nkaambo Mwaami Ogi waBbashani nguwe alikke muRefayimu wakali wasyaala. Malo aakwe* akali aansimbi alubo mpaachili kuRabba yama-Amoni. Alampa makkiyubbiti* aali musanu aane abusasa bwamakkiyubbiti aane. 12 Aachiindi eecho, twakabweza nyika eeyi kuzwa ku-Arowa iili kumbali aaKalonga ka-Anoni ahafu yachilawu chili aazilundu chakuGiliyadi alubo myuunzi yayo ndakayipa bamusyobo waRubbeni awaGadi. 13 Mpawo imwi nyika yoonse yaGiliyadi yakasyaala, aBbashani yoonse yabwaami bwa-Ogi ndakazipa kuhafu yamusyobo waManase. Chilawu choonse cha-Agobbi chakali chaBbashani chakazibikene kuti ninyika yamaRefayimu.
14 Jayiri mwana waManase wakabweza chilawu choonse cha-Agobbi kuyoosika kumugaano wamaGeshuri awamaMaakkati mpawo myuunzi eeyo yaBbashani wakayuuzika zina lyakwe lyakuti Havoti-jayiri* alubo yiitwa mbuboobu kusikila sunu. 15 Makkiri ndamupa Giliyadi. 16 Musyobo waRubbeni awaGadi ndawupa nyika iizwa kuGiliyadi kuyoosika kuKalonga ka-Anoni alubo mugaano wabo usaangunina aakati aakalonga aako kuyoosika kuJabbokku, kalonga ngumugaano wama-Amoni, 17 a-Arabba aJodani amugaano wawo, kuzwa kuKkinereti kuyoosika kuLwizi lwa-Arabba, nkukwaamba Lwizi lwaMunyo* aansi aaminkunu yaPisiga nkwiili kubuzwezuba.
18 “Mpawo ndakamupa mulawu ooyu wakuti: ‘Jehova Leza wanu wamupa nyika eeyi kuti muyibweze kuti ibe yanu. Baalumi boonse basinguzu ababweze zilwanisyo bazubuke kunembo lyama-Israyelinyina. 19 Banakazi banu, bana banu azivuubwa zyanu (ndilizi kuti muli aazivuubwa zyiingi loko) nzizyo kupela zitasyaale mumyuunzi njindakamupa, 20 kusikila Jehova ape kuti babbululu banu bapumune mbuli mbaakamuchitila, kusikila babweze nyika Jehova Leza wanu njayoobapa mutala aaJodani. Mpawo umwi awumwi wanu uzooboola kulukono lwakwe ndundakamupa.’
21 “Aachiindi eecho, ndakabuzya Joshuwa kuti: ‘Walibonena ameso aako nzyaakachita Jehova Leza wanu kubaami aaba babili. Jehova uyoochita chikozyenie kubaami boonse bali mutala. 22 Tamweelede kubayoowa pe nkaambo Jehova Leza wanu nguwe uumulwanina.
23 “Aachiindi eecho, ndakakombelezya Jehova kanditi, 24 ‘Ikaka Mwaami Singuzuzyoonse Jehova, ime ndimuzike wako wasaanguna kunditondeezya bupati akuboko kwako kuli aamanguzu, kuli umwi na Leza kujulu naakuti aanyika uuchita milimu yanguzu mbuli nduwe? 25 Ndikumbila undizumizye kuti ndizubuke ndikabone nyika mbotu mutala aaJodani, chilawu eechi chibotu chili aazilundu aLebbanoni.’ 26 Pesi Jehova wakachilindinyemenede akaambo kandinywe, alubo taakandiswiilila pe. Jehova wakandibuzya kuti, ‘Kwakkwana! Utazoondibuzyi lubo nkani eeyi. 27 Tanta aajulu aaPisiga ulange kububbila, kunyika, kumusanza akubuzwezuba ubone nyika eeyo ameso aako, nkaambo tukamuzubuki pe Jodani ooyu. 28 Bikka Joshuwa kuti abe muzulwidi alubo umusungwaazye akumusimya nkaambo nguwe uutazubuke kunembo lyabantu aaba alubo nguwe uutape kuti bakone nyika njutabone.’ 29 Zyoonse eezi zyakachitika nitwakakkede mukkuti,* kunembo lyaBbeti-peyori.