Makani mabotu aakalembwa aaMateyo

27 Nibwakacha, bapati babapayizi boonse abaalu babantu boonse, bakaambuuzyania kuti babone mbubakonzya kumujaya Jesu. 2 Nibakamusunga, bakayinkaawe baakumusiya kuli Pilato mweendelezi.

3 Mpawo Judasi sikumuuzya, naakabona kuti Jesu wapegwa mulandu wakuti ajayigwe, wakalisola loko alubo wakabweedezya masiliva aali 30 kubapati babapayizi abaalu, 4 kati: “Ndakabisya nindakawuzya ganzi lyamuntu uutakwe mulandu.” Bakati: “Iswe tunjilaali kumakani aayo? Nzizyako eezyo!” 5 Nkinkaako, wakasowa masiliva aayo mutempele wazwa. Mpawo wakayinka waakulyaangilila. 6 Pesi bapati babapayizi bakabweza masiliva aayo mpawo bakati: “Mulawu tawuzumini pe kuti mali eeyi ibikkwe aandawu iisalala iibambilwa mali, nkaambo nimali yaganzi.” 7 Nibakaambuuzyania, bakabelesya mali eeyo kuula muunda wamubumbi, kuti ube ndawu yakuzikka beenzu. 8 Nkinkaako, muunda ooyo uchitegwa Muunda waGanzi kusikila sunu. 9 Mpawo eezyo zyakaambwa kwiinda muli Jeremiya mupolofita zyakazuzikizigwa zyakuti: “Bakabweza masiliva aali 30, muulo ngubakabikkide aamuntu, muulo wakabikkwa aabamwi babana ba-Israyeli, 10 alubo mali eeyo bakayibelesya kuula muunda wamubumbi kweendelana anzyaakandilayilila Jehova.”*

11 Jesu wakayimikila kunembo lyamweendelezi, mpawo mweendelezi wakamubuzya mubuzyo wakuti: “Uli Mwaami wamaJuda na?” Mpawo Jesu wakasandula kuti: “Iwe nduwe waamba oobo.” 12 Pesi chiindi bapati babapayizi abaalu nibakali kumupa mulandu, taakwe naakasandula pe. 13 Mpawo Pilato wakati kulinguwe: “Tuzimvwide na zintu zyoonse eezi nzibalikukutamikizya?” 14 Pesi Jesu taakamusandula pe, niliba jwi limwi, zyakuti mweendelezi wakagamba loko.

15 Chiindi choonse nikwakali kuchitwa pobwe eeli, mweendelezi wakazibide kwaangunwida bantu kufumbwa musungwa ngubakali kuyanda. 16 Aachiindi eecho, bakali aamusungwa wakali aampuwo mbi, uutegwa Bbarabbasi. 17 Nkinkaako, nibakabungenaamwi, Pilato wakati kulimbabo: “Ngwani ngumuyanda kuti ndimwaangunwide, Bbarabbasi na, naakuti Jesu, ooyo wiitwa kuti Kkristu?” 18 Nkaambo Pilato wakalizi kuti bakamweetede kulinguwe akaambo kamunyono. 19 Mukuyungizya, Pilato naakakkede aachuuno chakubetekela, mwanakazi wakwe wakatuma mulayizyo wakuti: “Siyana aamwaalumi ooyo uululeme, nkaambo ndakataazikana loko sunu mansiku muchiloto akaambo kanguwe.” 20 Pesi bapati babapayizi abaalu, bakakombelezya bantu kuti bakumbile kwaangunwidwa Bbarabbasi, pesi kuti Jesu ajayigwe. 21 Mpawo mweendelezi wakati kulimbabo: “Aakati kababa babili, ngwani ngumuyanda kuti ndimwaangunwide?” Bakati: “NguBbarabbasi.” 22 Pilato wakati kulimbabo: “Ani mpo ndimuchite biyeni Jesu, ooyo wiitwa kuti Kkristu?” Boonse bakati: “Agankaminwe aachisamu!” 23 Wakati: “Nkamboonzi? Ani wakabisyaanzi?” Pesi bantu bakayungizya koompolola kabati: “Agankaminwe aachisamu!”

24 Pilato naakabona kuti nzyaakali kuchita tazilikugwasya pe, pesi zilikupa kuti kube lupyopyongano, wakabweza maanzi wasamba kumaboko kunembo lyabantu mpawo wakati: “Tandikwe mulandu waganzi lyamwaalumi ooyu. Amulibonene amulikke.” 25 Mpawo bantu boonse bakasandula kuti: “Ganzi lyamuntu ooyu alibe aalindiswe akubana besu.” 26 Mpawo Pilato wakabaangunwida Bbarabbasi pesi wakapa kuti Jesu awumwe loko, mpawo wakamutola kuti akajayigwe aachisamu.

27 Mpawo masoja aamweendelezi akayinka aaJesu kung’anda yamweendelezi, alubo akabunganizya nkamu yoonse yamasoja mpaakabede. 28 Mpawo bakamugwisya zigogo, bamuzwaatika chigogo chisalala, 29 alubo bakaluka ngowani yamaamvwa akumuzwaatika mumutwe, mpawo bakamujatisya tete mukuboko kwakwe kwachilisyo. Alubo bakalikufugama kunembo lyakwe kabalikumufubaazya kabati: “Mbiyeni, yooMwaami wamaJuda!” 30 Bakamuswida mate, bamunyanga tete mpawo bakasaanguna kumuumyaalyo kumutwe. 31 Kumamanino, nibakamaninsya kumufubaazya, bakamuzwaatununa chigogo nchibakamuzwaatikide, bamuzwaatika zigogo zyakwe zyaajulu, mpawo bakamutola kuti akagankaminwe aachisamu.

32 Nibakalikuzwa, bakajana umwi mwaalumi wakuKkurene uutegwa Simoni. Mpawo mwaalumi ooyu, bakamusungilizya kuti anyampule chisamu chaJesu chakupenzezya.* 33 Alubo nibakasika aandawu iitegwa Gologota, nkukwaamba, Ndawu yaChipompo, 34 bakamupa wayini iiswaanizidwe aamusamu uulula* kuti anywe pesi naakayilabila, wakakaka kwiinywa. 35 Nibakamugankamina aachisamu, bakaabana zigogo zyakwe zyaajulu kwiinda mukuuma chisale,* 36 mpawo bakakkala mpawaawo kabali kumulinda. 37 Alubo aajulu aamutwe wakwe bakabikka chibbaakani chakali aamulandu ngubakamupede, chakalembedwe kuti: “Ooyu nguJesu, Mwaami wamaJuda.”

38 Mpawo zigwebenga zibili zyakabikkwa aazisamu aamwi anguwe, chimwi chakali kuchilisyo mpawo chimwi chakali kuchimweensi. 39 Bantu bakali kwiinda, bakali kwaambuula majwi mabi atala anguwe kabatikinia mitwe, 40 kabati: “Iwe nwaakali kuti uladilisya tempele akuliyakulula mumazuba aatatu, lifutule. Kuti kuli Mwana waLeza, seluka aachisamu chakupenzezya!”* 41 Munzila iikozyenie, bapati babapayizi abalembi abaalu, bakasaanguna kumufubaazya kabati: 42 “Bamwi wakabafutula, we takonzyi pe kulifutula. We Mwaami wa-Israyeli, aseluke aachisamu chakupenzezya,* mpawo tulamusyoma. 43 Kabi usyoma Leza. Amuvune Leza wakwe kuti kamuyanda, nkaambo wakati, ‘Ndili Mwana waLeza.’” 44 Munzila iikozyenie, niziba zigwebenga zyakali aazisamu aamwi anguwe, zyakali kwaambuula majwi mabi atala anguwe.

45 Kuzwa kuma 12 sikati,* kusika kuma 3 sikati,* mudima wakavumba chisi choonse. 46 Kuma 3 sikati,* Jesu wakoompolola ajwi pati, kati: “Eli, Eli, lama sabbakkitani?” nkukwaamba kuti, “Leza wangu, Leza wangu, nkamboonzi nwaandilekelezya?” 47 Bamwi bakayimvwi mpawaawo nibakamvwa oobo, bakasaanguna kwaamba kuti: “Mwaalumi ooyu ulikwiita Elija.” 48 Aachiindi nchicheecho, umwi wabo wakachijaana waakubweza chiponchi, wachinika muwayini iilula, wachidyunga aatete, mpawo wakamupa kuti anywe. 49 Pesi bamwi boonse bakati: “Muleke! Tuyanda kubona kuti Elija ulasika na kuzoomufutula.” 50 Jesu wakoompolola lubo ajwi pati, mpawo wakaleka kuyoya.*

51 Lino bona, kketeni lyamundawu iisalala lyakadeluka, kuzwa aajulu kusika aansi akuba zipanzi zibili, alubo nyika yakazungaana alubo mabwe akapanduka. 52 Tubanda* twakajulika alubo mibili myiingi yabasalali bakali boona mulufu, yakazwa aanze 53 (alubo bantu bakali kuzwa kutubanda Jesu kali wabusigwa, bakanjila mumuunzi uusalala) mpawo yakabonwa aabantu biingi. 54 Pesi mupati wamasoja abantu mbaakali aabo bakali kulinda Jesu, nibakabona muzuzumo wanyika azintu zyakali kuchitika, bakayoowa loko mpawo bakati: “Kwaamba choonzyo, ooyu wali Mwana waLeza.”

55 Alubo kwakali banakazi biingi bakali kulanga zyakali kuchitika kabali kule-kule, aabo bakasindikide Jesu kuzwa kuGalili kuti bamubelekele. 56 Aakati kabo, kwakali Mariya Magadalina, aMariya banyina aaJakkobo aJosesi, abanyina babana baZebbediya.

57 Nilyakaba goko, kwakasika umwi mwaalumi wakanotede, wakali kutegwa Josefa waku-Arimateya, ooyo wakali waba sikwiiya waJesu. 58 Mwaalumi ooyu wakasika kuli Pilato mpawo wakakumbila mubili waJesu. Mpawo Pilato wakalayilila kuti awupegwe. 59 Josefa wakabweza mubili waJesu wawulambila aamulembo mubotu uutakwe doti, 60 mpawo wakawulazika mukabanda* kapya, nkaakali wafokola mumwaala. Naakakunkulisya bbwe pati kuti ajale mulyango wakabanda,* wakeenda. 61 Pesi Mariya Magadalina awumwi Mariya bakasyaala mpawaawo kabakkede kunembo aakabanda.

62 Buzuba bwakatobela Buzuba Bwakulibambila, bapati babapayizi abaFarisi bakaakubunganaamwi kunembo lyaPilato, 63 kabati: “Mwaami, tuchiziyeeyede nzyaakaamba silweeno uulya kachipona, wakati: ‘Aakwiinda mazuba aatatu, ndizoobusigwa.’ 64 Nkinkaako, layilila kuti kabanda kalindwe kusikila mubuzuba bwachitatu, kuchitila kuti basikwiiya bakwe batasiki kuti bazoomubbe mpawo bazoobuzye bantu kuti, ‘Wakabusigwa kuzwa kubafu!’ Mpawo lweeno oolu lwamamanino luzoobija loko kwiinda lwakusaanguna.” 65 Pilato wakati kulimbabo: “Amubweze balindi. Amukakakwabilile mbuli mbumuzi.” 66 Nkinkaako, bakayinka baakukwabilila kabanda kwiinda mukusinka bbwe akubikka balindi.