Chiyubunuzyo chaJohane

15 Alubo ndakabona chimwi chitondeezyo kujulu, chipati alubo chigambya changilozi zili musanu azibili zyakali aazipenzyo zili musanu azibili. Eezi nziizyamamanino, nkaambo kwiinda mulinzizyo, kunyema kwaLeza kulamaninsigwa.

2 Alubo ndakabona chimwi chintu chili mbuli lwizi lwagilazi luswaanizidwe aamulilo, alubo aabo bakazunda munyama achifanikisyo chawo anamba yazina lyawo, bakaliimvwi kumbali aalwizi lwagilazi, kabajisi tuntimbwa twaLeza. 3 Bakali kwiimba lwiimbo lwaMozesi muzike waLeza alwiimbo lwaMwanaambelele, kabati:

“Milimu yako mipati alubo ilagambya, O Jehova* Leza, Singuzuzyoonse. Nzila zyako zililuleme alubo nzyakasimpe, Mwaami uuliwo kusikila kukabe kutamani. 4 O Jehova,* ngwani uutaleke kukuyoowa akuleka kulemeka zina lyako, nkaambo nduwe awulikke uusyomeka? Nkaambo zisi zyoonse zizoosika kunembo lyako kuti zikukombe akaambo kamilawu yako iiluleme yayubununwa.”

5 Nizyakayinda zintu eezi ndakabona, alubo ndawu iisalala yatente lyabukamboni yakajulwa kujulu, 6 mpawo ngilozi zili musanu azibili zyakali aazipenzyo zili musanu azibili, zyakazwa mundawu iisalala kazizweete zigogo zibotu zing’ayima, zitakwe doti alubo zyakalyaangide milembo yangolida kutwaango. 7 Chimwi chazilenge zyuumi zine chakapa ngilozi zili musanu azibili ndido zyangolida zili musanu azibili zyakazwide kunyema kwaLeza, ooyo uupona kusikila kukabe kutamani. 8 Mpawo ndawu iisalala yakazula busi akaambo kabulemu bwaLeza alubo akaambo kamanguzu aakwe, alubo taakwe wakakonzya kunjila mundawu iisalala kusikila nizyakamana zipenzyo zili musanu azibili zyangilozi zili musanu azibili.