Detoronomi

22 “Kuti wabona ng’ombe naakuti mbelele yamweenzinyokwe kayili kusweeka, utayileki achaali. Weelede kwiitola kulinguwe. 2 Pesi kuti mweenzinyokwe katakkali aafwiifwi anduwe naakuti kutamuzi pe, weelede kutola chivuubwa eecho kung’anda yako. Uyookkala aacho kusikila achiyanduule munaacho mpawo weelede kuchibweedezya kulinguwe. 3 Eezi nzizyo nzweelede kuchita kudonki lyakwe, kuzigogo zyakwe naakuti kuli chimwi chintu mweenzinyokwe nchaakasowa mpawo wachijana. Toyelede kuchisiya kupela pe.

4 “Kuti wabona donki naakuti ng’ombe yamweenzinyokwe kayiwide mumugwagwa, toyelede kwiinda kupela. Weelede kumugwasya kuti abusye munyama ooyo.

5 “Mwanakazi tayelede kuzwaata chigogo chamwaalumi pe, anguwe mwaalumi tayelede kuzwaata chigogo chamwanakazi pe. Kufumbwa muntu uuchita zintu eezi ulasesemya kuli Jehova Leza wanu.

6 “Kuti munzila wabona chitendele chakayuni chili aamayi naakuti twana, kufumbwa kuti chili mumunsamu naakuti chili aansi alubo banyina kabafukatide twana ooto naakuti mayi, toyelede kubweza banyina aamwi atwana. 7 Weelede kuleka bayina kuti beende, pesi twana ulakonzya kubweza. Eezi nzizyo nzweelede kuchita kuti zikweendele kabotu akuti upone mazuba miingi.

8 “Kuti wayaka ng’anda, weelede kuyaka chitabililo aachiluli chang’anda eeyo, kuchitila kuti uteeti mulandu waganzi kung’anda yako nkaambo umwi muntu ulakonzya kuwa kazwa aajulu aang’anda.

9 “Utabyali misyobo iibili yambuto mumuunda wako wamisaansa. Nkaambo butebuzi buzwa kumbuto eeyo njutabyale aamwi amasaansa zilaba zyakundawu iisalala.

10 “Utalimyi ng’ombe aamwi adonki.

11 “Utazwaati chigogo chakapangwa aaboya bwambelele buvweleene aabusumyo bubotu.

12 “Weelede kupanga mayaayila kumabazu aane aazigogo nzuzwaata.

13 “Kuti mwaalumi wakwata mwanakazi, woonaawe mpawo wazoomuzonda* 14 akumutamikizya kuti taakali kulijata pe akumupa zina bbi kwiinda mukwaamba kuti: ‘Ndakakwata mwanakazi ooyu, pesi nindakoonaawe teendakajana bukamboni pe bwakuti ngunakalindu’* 15 wisi abanyina bamusimbi beelede kweeta bukamboni bwakuti musimbi wakali nakalindu kubaalu bali kugeedi lyamuunzi. 16 Mpawo wisi aamusimbi weelede kubuzya baalu kuti, ‘Mwaalumi ooyu ndakamupa mwanaangu kuti akwate pesi ulamuzonda* 17 alubo ulikumutamikizya kuti taakali kulijata kwiinda mukwaamba kuti: “Ndakajana kuti mwanaanu teenakalindu pe.” Pesi Mbobu bukamboni butondeezya kuti mwanaangu wakali nakalindu.’ Mpawo beelede kuyala mulembo ooyo kunembo lyabaalu bamuunzi. 18 Baalu bamuunzi bayoomubweza mwaalumi ooyo bamuume. 19 Beelede kumubbadalisya mashekeli* aansiliva aali 100 mpawo baape wisi aamusimbi nkaambo wakabisya zina lyanakalindu wa-Israyeli, mpawo musimbi ooyo unooli mwanakazi wakwe. Tazumizigwi pe kumuleka kufumbwa kachipona.

20 “Pesi kuti kwajanika kuti zyaambwa nzyachoonzyo alubo kakutakwe bukamboni bwakuti musimbi ooyo wakali nakalindu, 21 beelede kutola musimbi ooyo kumulyango wang’anda yawisi mpawo bantu bamumuunzi wakwe beelede kumuuma aamabwe kuti afwe nkaambo wakachita chintu chifwisya bweeme mu-Israyeli kwiinda mukuchita bwaamu mung’anda yawisi. Nkinkaako, mweelede kugwisya chintu chibi aakati kanu.

22 “Kuti mwaalumi wajanikizigwa amwanakazi wamuntu, boonse kabali babili beelede kujayigwa, nkukwaamba mwaalumi ooyo wali koona aamwanakazi wamuntu amwanakazi ooyo. Mweelede kugwisya chintu chibi aakati ka-Israyeli.

23 “Kuti kakuli nakalindu uutuminidwe, mpawo umwi mwaalumi wamuswaana mumuunzi woonaawe, 24 mweelede kubagwisya aanze aageedi lyamuunzi boonse kabali babili mpawo mubawume aamabwe kuti bafwe. Musimbi weelede kufwa nkaambo taakakwiila pe mumuunzi alubo mwaalumi weelede kufwa nkaambo wakawubula mwanakazi wamweenzinyina. Mweelede kugwisya chintu chibi aakati kanu.

25 “Pesi kuti mwaalumi waswaana musimbi uutuminidwe musokwe, mpawo wamuzunda akoonaawe, mwaalumi ooyo wakoonaawe weelede kujayigwa alikke, 26 mutamuchiti chintu musimbi ooyo. Musimbi taakachita chintu chipa kuti ayelele kujayigwa. Makani aaya akozyenie aamuntu uulwana mweenzinyina akumujaya. 27 Nkaambo wakamuswaana musokwe mpawo musimbi ooyo uutuminidwe wakakwiila, pesi wakabula uumuvuna.

28 “Kuti mwaalumi waswaana nakalindu uutatuminidwe mpawo wamujata akoonaawe mpawo bajatwa, 29 mwaalumi ooyo wakoonaawe weelede kupa wisi wamusimbi mashekeli aansiliva aali 50 mpawo musimbi ooyo ulaba mwanakazi wakwe. Tazumizigwi pe kumuleka kufumbwa kachipona nkaambo wakamuubula.

30 “Taakwe mwaalumi weelede kubweza mwanakazi wawisi, kuchitila kuti atawubuli wisi.