Amosi
9 Ndakabona Jehova kayimvwi aajulu aachipayililo mpawo wakati: “Wuma mutwe wapila mpawo ng’anda ilazungaana. Dyunkula mitwe yawo mpawo wakumamanino wabo ndizoomunyonyoona aapanga. Taakwe uuchija uutazoofutuke alubo taakwe weezya kufutuka uutazoozwidilile.
2 Kuti basya kabayanda kuyuba muKabanda,*
Ndizoobagwisya mumoomo akuboko kwangu,
Kuti bayinka kujulu,
Ndizoobaselusya nkukooko.
3 Kuti bayuba aajulu aachilundu chaKkameli,
Ndizoobayanduula nkukooko ndibabweze.
Kuti bandiyuba kunsi aalwizi,
Ndizoolayilila nzoka kuti ibalume nkukooko.
4 Kuti batolwa mubuzike abasinkondonyina,
Ndizoolayilila panga nkukooko, mpawo lizoobajaya,
Ndizoolanzya meso aangu aalimbabo kuti ndibeetele zibi kutali zibotu.
5 Nkaambo Mwaami Singuzuzyoonse, Jehova wamakamu, nguwe uuguma nyika,
Zyakuti ilayaaya, alubo bantu boonse bakkala mumo bazoolila,
Anyika yoonse izoofuta mbuli Mulonga waNayile,
Akuyosa mbuli Mulonga waNayile waku-Ijipita.
6 ‘Ooyo uuyaka matantilo aakwe kujulu
Akukkazikizya chiyako chakwe aajulu aanyika,
Ooyo wiita maanzi aamulwizi,
Kuti aatile aajulu aanyika,
Jehova ndiizina lyakwe.’
7 ‘Tamuli mbuli bana balombe baKkushi na kulindime, inywe nibantu bamu-Israyeli?’ mbaamba Jehova.
‘Teendakagwisya Israyeli na munyika ya-Ijipita,
AmaFilisiti muKkrete, amaSiriya mu-Kkiri?’
8 ‘Bona! Meso aaMwaami Singuzuzyoonse Jehova alangide bwaami bubisya,
Alubo uzoobunyonyoona aanyika.
Pesi tazooyinyonyooni chakumaninina pe ng’anda yaJakkobo,’ mbaamba Jehova.
9 ‘Nkaambo bona! Ndilikupa mulawu,
Alubo ndizoozungaania ng’anda ya-Israyeli aakati kazisi zyoonse,
Mbuli muntu mbasefa aansefa,
Zyakuti taakwe kabwe nikaba kamwi kawidaansi.
10 Basizibi boonse bali aakati kabantu bangu bazoojayigwa aapanga,
Aabo baamba kuti, “Mapenzi taazoosiki aafwiifwi andiswe naakuti kutusikila.”
11 Mubuzuba oobo, ndizoobusya chivututu chaDavida chakawa,*
Ndizoosinka mpako* zili aamuduli,
Alubo ndizoobusilizya matongo aacho,
Ndizoochiyakulula kuti chibe mbuli mumazuba aachiindi,
12 Kuchitila kuti babweze zyakasyaala zya-Edomu,
Azisi zyoonse zilikwiitwa aazina lyangu,’ mbaamba Jehova, ooyo uulikuchita zintu eezi.
13 ‘Bona! Mazuba alikuza,’ mbaamba Jehova,
‘Chiindi sikulima natazooyenzye sikutebula,
Asikukanda masaansa natazooyenzye ooyo uunyampwide mbuto,
Azilundu nizitazoolosye wayini iinona,
Atulundu toonse nitutazookunke aanjiyo.*
14 Ndizooboozya bazike bangu ma-Israyeli,
Alubo bazooyakulula myuunzi iitachikkalwi pe mpawo bakkale mulinjiyo,
Bazoolima myuunda yamisaansa akunywa wayini yayo,
Alubo bazoolima myuunda akulya michelo yayo.’
15 ‘Ndizoobabyala aanyika yabo,
Alubo tabachizoonyukulwi lubo pe
Aanyika yabo njindakabapa,’ mbaamba Jehova Leza wako.”