KuBagalatiya
3 Inywe nibaGalatiya bafuba-fuba! Ngwani wamweena kuti mube aamuzeezo ooyu mubi, inywe nimwakatondeezegwa aantanganana kuti Jesu Kkristu wakagankaminwa aachisamu? 2 Ndili aamubuzyo uumwi ngundiyanda kumubuzya: Mwakatambula muuya kwiinda mukuchita milimu yamulawu na, naakuti akaambo kakuba aalusyomo muzintu nzimwakamvwa? 3 Nkamboonzi nimuli bafuba-fuba? Muyanda kumaninsizya lweendo lwanu munzila yanyama na, kakuli mwakalusaanguna munzila yamuuya? 4 Mapenzi miingi ngimwakaswaana, mwakali kubelekela zitawo na? Tandiboni pe kuti mwakali kubelekela zitawo. 5 Nkinkaako, ooyo uumupa muuya uusalala alubo uuchita milimu mipati aakati kanu, uzichita akaambo kakuti muchita milimu yamulawu na, naakuti muli aalusyomo muzintu nzimwakamvwa? 6 Amuyeeye Abbrahamu, “wakaba aalusyomo muli Jehova* alubo wakabonwa kuti uliluleme.”
7 Kwaamba choonzyo, mulizi kuti aabo bakakatila kulusyomo, mbimbabo bana ba-Abbrahamu. 8 Lugwalo nilwakabuka aakubona kuti Leza wakali kuzoowamba bantu bazisi kuti baliluleme kwiinda mulusyomo, lwakaambilizya makani mabotu kakuchili chiindi kuli Abbrahamu aakuti: “Zisi zyoonse zizoolongezegwa kwiinda mulinduwe.” 9 Nkinkaako, aabo bakakatila kulusyomo balikulongezegwaamwi a-Abbrahamu, ooyo wakali aalusyomo.
10 Aabo boonse basyoma milimu yamulawu, balitukidwe nkaambo kulilembedwe kuti: “Ulitukidwe muntu woonse uutayinkilili kunembo kuchita zintu zyoonse zilembedwe mubbuku lyaMulawu.” 11 Mukuyungizya, zili aantanganana kuti taakwe muntu uunga waambwa aaLeza kuti uliluleme kwiinda mukutobela mulawu, nkaambo “mululami uzoopona akaambo kalusyomo.” 12 Mulawu tuyeeme aalusyomo pe. Nikuba oobo, “muntu uuchita zintu eezi, uzoopona akaambo kanzizyo.” 13 Kkristu wakatuula akutwaangununa kuzwa kulutuko lwaMulawu kwiinda mukuba lutuko muchibaka chesu, nkaambo kulilembedwe kuti: “Ulitukidwe muntu woonse waanzikidwe aachisamu.” 14 Eezi zyakaba oobo, kuti chilongezyo cha-Abbrahamu chisike kuzisi kwiinda muli Kkristu Jesu, kuchitila kuti tutambule muuya ngutwakasyomezegwa kwiinda mulusyomo lwesu.
15 Bakombima, amuteedi ndibelesye chikozyano chazintu nzibazi bantu: Kuti chizuminano chachitwa kuti chibeleke, nikuba amuntu, taakwe muntu uukonzya kuchimwaya naakuti kuyungizya zimwi aalinchicho. 16 Zisyomezyo zyakaambwa kuli Abbrahamu akumwanaakwe. Lugwalo talwaambi kuti “akubana bako” mbuli kuti mbiingi, pesi lwaamba kuti “akumwanaako” mukuti ngumwi, nkukwaamba Kkristu. 17 Mukuyungizya, ndiyanda kwaamba kuti: Mulawu wakazoobawo nikwakayinda minyaka iili 430, tawupi kuti chizuminano Leza nchaakapangide chileke kubeleka, kuchitila kuti umwaye chisyomezyo. 18 Nkaambo kuti lukono kaluyeeme aamulawu, taluchiyeeme aachisyomezyo pe, pesi Leza wakalupa Abbrahamu kwiinda muchisyomezyo.
19 Ani nkamboonzi Mulawu nwaakapegwa? Mulawu wakayungizigwa kuchitila kuti kusotoka mulawu kube aantanganana kusikila akasike mwana, ooyo wakasyomezegwa chisyomezyo eecho. Alubo wakapegwa kwiinda mungilozi kakubelesegwa kuboko kwasimwiimaakati. 20 Takuyandikani simwiimaakati kuti kakuli muntu uumwi biyo, pesi Leza ngumwi biyo. 21 Nkinkaako, Mulawu ukazyania aazisyomezyo zyaLeza na? Teembubo pe. Nkaambo kaansinga mulawu wakapedwe wakali kukonzya kupa buumi, bululami bwakali kuzoobawo kwiinda mumulawu. 22 Pesi Lugwalo lwakatola zintu zyoonse kuti zikasungwe aachibi, kuchitila kuti chisyomezyo cheetwa akaambo kakusyoma muli Jesu Kkristu, chipegwe aabo batondeezya lusyomo.
23 Nikuba oobo, lusyomo kalutanasika, twakali kukwabililwa aamulawu, katusungidwe aachibi, katuli kulangilila lusyomo lwakali lwaba aafwiifwi kuyubununwa. 24 Nkinkaako, Mulawu wakaba muzulwidi* wesu, uututola kuli Kkristu kuchitila kuti tukonzye kwaambwa kuti tuliluleme kwiinda mulusyomo. 25 Mbukunga lino lusyomo lwasika, tatuchili aansi aamuzulwidi* pe.
26 Kwaamba choonzyo, moonse muli bana baLeza akaambo kalusyomo lwanu muli Kkristu Jesu. 27 Nkaambo moonse nimwakabbabbatizigwa muli Kkristu, muzweete Kkristu. 28 Taakwe muJuda naakuti muGrikki, taakwe muzike naakuti muntu waangunukide, taakwe mwaalumi naakuti mwanakazi nkaambo moonse mujisini aaKkristu Jesu. 29 Mukuyungizya, kuti kamuli baKkristu, nkukwaamba kuti muli bana ba-Abbrahamu choonzyo, muli basikukona kweendelana achisyomezyo.