Chiyubunuzyo chaJohane
7 Nizyakayinda zintu eezi, ndakabona ngilozi zine kazyiimvwi kumabazu aane aanyika, kaziijisi changuzu myuuwo iine yanyika, kuchitila kuti kutabi moya uunga aanyika naakuti mulwizi naakuti kumunsamu woonse. 2 Alubo ndakabona imwi ngilozi yakali kutanta kayizwa kubuzwezuba, yakali aachitondeezyo chaLeza uupona, alubo yakoompolola ajwi pati kungilozi zine, eezyo zyakapedwe manguzu aakuti zinyonyoone nyika alwizi, 3 kayiti: “Mutayinyonyooni pe nyika naakuti lwizi naakuti minsamu, kusikila tubikke bazike baLeza wesu zitondeezyo aankumu zyabo.”
4 Alubo ndakamvwa mweelwe wabaabo bakabikkwa chitondeezyo, bakali 144 000, aabo bakabikkwa chitondeezyo kuzwa kumisyobo yoonse yabana ba-Israyeli:
5 Kumusyobo waJuda, bali 12 000 bakabikkwa chitondeezyo;
kumusyobo waRubbeni, bali 12 000;
kumusyobo waGadi, bali 12 000;
6 kumusyobo wa-Asha, bali 12 000;
kumusyobo waNafutali, bali 12 000;
kumusyobo waManase, bali 12 000;
7 kumusyobo waSimiyoni, bali 12 000;
kumusyobo waLevi, bali 12 000;
kumusyobo wa-Isakkara, bali 12 000;
8 kumusyobo waZebbuloni, bali 12 000;
kumusyobo waJosefa, bali 12 000,
kumusyobo waBbenjamini, bali 12 000 bakabikkwa chitondeezyo.
9 Nizyakayinda zintu eezi, ndakalanga mpawo ndakabona nkamu mpati yabantu bakatali kukonzya kubalwa aamuntu, bakali kuzwa kuzisi zyoonse akumisyobo yoonse akubantu boonse akumilaka yoonse, bakayimvwi kunembo lyachuuno chabwaami akunembo lyaMwanaambelele, kabazweete zigogo zilamfu zituba, alubo bakajisi malala mumaboko aabo. 10 Alubo bayinkilila kunembo koompolola ajwi pati, kabati: “Lufutuko luzwa kuli Leza wesu, ooyo uukkede aachuuno chabwaami, akuMwanaambelele.”
11 Ngilozi zyoonse zyakaliimvwi kazizyungulukide chuuno chabwaami abaalu, azilenge zyuumi zine, alubo zyakawida kunembo lyachuuno chabwaami alubo zyakakomba Leza, 12 kaziti: “Ameni! Ntembawuzyo abulemu abusongo akulumba alulemeko abweendelezi amanguzu, azibe kuli Leza wesu kusikila kukabe kutamani. Ameni.”
13 Mpawo umwi wabaalu wakati kulindime: “Aaba bazweete zigogo zilamfu zituba mbaani alubo bakazwa kuli?” 14 Ndakabuka aakumubuzya kuti: “Mwaami wangu, nduwe uuzi.” Mpawo wakati kulindime: “Aaba mbimbabo bazwa mumapenzi mapati, alubo bakawacha zigogo zyabo zilamfu akuzitubya muganzi lyaMwanaambelele. 15 Nzizyo zipede kuti kabali kunembo lyachuuno chabwaami chaLeza, alubo balikumubelekela mulimu uusalala sikati amansiku mutempele lyakwe, alubo Ooyo uukkede aachuuno chabwaami uzooyala tente lyakwe aalimbabo. 16 Tabachizoofwi nzala lubo pe nikuba kufwa nyota, alubo tabazoopyi aazuba naakuti kutentwa aakupya koonse, 17 nkaambo Mwanaambelele, ooyo uuli aakati kachuuno chabwaami, uzoobeembela alubo uzoobazulwida kutusawu twamaanzi aabuumi. Alubo Leza uzoosinda misozi yoonse kumeso aabo.”