Makani Aakalembwa aaLukka
10 Nizyakayinda zintu eezi, Mwaami wakasala bamwi bali 70 mpawo wakabatuma kabali babili-babili kunembo lyakwe kuti baye mumyuunzi yoonse amundawu zyoonse nzyaakali kuyanda kwiinka. 2 Mpawo wakati kulimbabo: “Kwaamba choonzyo, mulimu wakutebula mupati pesi babelesi mbache. Nkinkaako, amukombelezye Simalelo wakutebula kuti atume babelesi mumulimu wakwe wakutebula.” 3 Kamuya! Pesi amuchenjele! Ndilikumutuma mbuli bana bambelele aakati kabawumpe. 4 Mutabwezi chikwama chamali nichiba chikwama chakubikkila chakulya naaba manyatela alubo mutajuzyi muntu munzila.* 5 Kufumbwa ng’anda njimunjila, amusaangune kwaamba kuti: ‘Ng’anda eeyi ayibe aaluumuno.’ 6 Kuti mung’anda oomo kakuli muntu uuyanda luumuno, luumuno lwanu alube aalinguwe. Pesi kuti kamutakwe, luumuno lwanu luyoobweeda kulindinywe. 7 Nkinkaako, amukkale mung’anda eeyo, mulye alubo munywe zintu nzibamupa nkaambo kuleelela kuti mubelesi abbadalwe. Mutanoolongi-longi kamuzwa kuli imwi ng’anda kamuya kuli imbi.
8 “Alubo kufumbwa muunzi ngumunjila mpawo bamutambula, amulye nzibamupa 9 musilike bachiswa bali mumo alubo mubabuzye kuti: ‘Bwaami bwaLeza bwaswena aafwiifwi andinywe.’ 10 Pesi kufumbwa muunzi ngumunjila mpawo baleka kumutambula, amwiinke mumigwagwa yawo mipati mwaambe kuti: 11 ‘Tulikumukunkumwida lusuko lwamuunzi wanu lunamatide kumawulu eesu. Pesi amuzibe kuti, Bwaami bwaLeza bwaswena aafwiifwi.’ 12 Ndimubuzya kuti, mubuzuba oobo, chisubulo chamuunzi ooyo chinooli chipati kwiinda chaSodoma.
13 “Ulaapenzi Kkorazini! Ulaapenzi Bbetisayida! Nkaambo kaansinga milimu iigambya yakachitwa mulinduwe yakachitilwa muTire aSidoni, nikuli bakasanduka chiindi loko akuzwaata zigogo zyamasaka akukkala mudyota. 14 Nkinkaako, mubuzuba bwakubetekwa, chisubulo chanu chinooli chipati kwiinda chaTire aSidoni. 15 Anduwe Kkapenawume, ubonaanga uzoosumpwidwa kujulu na? Peepe! Uzooselusigwa aansi muKabanda.*
16 “Kufumbwa uumuswiilila ulandiswiilila andime. Alubo kufumbwa uutamulemeki, tandilemeki pe andime. Alubo kufumbwa uutandilemeki, tamulemeki pe aYooyo wakandituma.”
17 Mpawo bali 70 bakaboola kabali kukondwa, kabati: “Mwaami, naaba madimoni alibombya nitwabelesya zina lyako.” 18 Mpawo wakati kulimbabo: “Ndibwene Saatani kawide kale mbuli kalabi kuzwa kujulu. 19 Amubone, ndamupa manguzu aakulyata nzoka atubanze, amanguzu aayinda manguzu woonse aasinkondonyokwe alubo taakwe chintu chitazoomuchise pe. 20 Nikuba oobo, mutabotelwi akaambo kakuti myuuya yalibombya kulindinywe pesi amubotelwe nkaambo mazina aanu alembwa kujulu.” 21 Ku-awa njiyeeyo, wakabotelwa mumuuya uusalala, mpawo wakati: “Ndilakutembawula aantanganana Taata, Mwaami wajulu anyika, nkaambo zintu eezi wazisisila basongo abayiide mpawo waziyubunwida bana baniini. Iiyi Taata, nkaambo mbubo mbwaayanda kuti kube. 22 Taata wabikka zintu zyoonse mumaboko aangu, alubo taakwe uuzi Mwana kunze kwaTaata, alubo taakwe uuzi Taata kunze kwaMwana, ayooyo Mwana ngwayanda kuyubunwida.”
23 Mpawo wakaambuula aabasikwiiya bakwe kabali aabalikke, kuti: “Balabotelwa aabo bali aameso aabona zintu nzimulikubona. 24 Nkaambo ndimubuzya kuti, bapolofita biingi abaami, bakali aachiyandisyo chakubona zintu nzimulikubona pesi teebakazibona pe, akumvwa zintu nzimulikumvwa pesi teebakazimvwa pe.”
25 Umwi mwaalumi wakazi Mulawu wakanyampuka kuti amusunke, mpawo wakati: “Muyiisi, ndeelede kuchitaanzi kuti ndikakone buumi butamani?” 26 Wakati kulinguwe: “MuMulawu mulembedwe kutyeni? Nga wamvwaanzi nwaabala?” 27 Mwaalumi ooyo wakasandula kati: “‘Weelede kuyanda Jehova* Leza wako amoyo wako woonse, abuumi bwako boonse, amanguzu aako woonse, amizeezo yako yoonse,’ akuti ‘weelede kuyanda simayakilane wako mbuli mbuliyanda.’” 28 Wakati kulinguwe: “Wasandula kabotu. Yinkilila kunembo kuchita oobo mpawo uzoojana buumi.”
29 Pesi mwaalumi ooyo kayanda kulitondeezya kuti uliluleme, wakati kuli Jesu: “Simayakilane wangu ngwani loko?” 30 Jesu wakamusandula kuti: “Umwi mwaalumi wakali kukunuka kazwa kuJerusalema kaya kuJerikko, mpawo wakajatwa aazigwebenga. Zigwebenga eezyo zyakamugwisya zigogo, zyamuuma loko mpawo zyakamusiya kali waamba kufwa. 31 Umwi mupayizi wakali kukunuka aanzila njiyeeyo kayabulyeendela, naakamubona, wakamweenguluka wayinka. 32 Anguwe muLevi naakasika aandawu eeyo akumubona, wakamweenguluka wayinka. 33 Pesi umwi muSamariya wakali kweenda aanzila njiyeeyo, naakasika aakali mwaalumi ooyo akumubona, wakamweetelela. 34 Nkinkaako, wakaswena aalinguwe mpawo wakatila mafuta awayini aazilonda zyakwe akuzisunga. Mpawo wakamutansika aadonki lyakwe alubo wakamutola kung’anda yabeenzu kuti akamubambe kabotu. 35 Mubuzuba bwakatobela, wakabweza madinari aabili, waapa sikubamba ng’anda yabeenzu mpawo wakati: ‘Langa muntu ooyu, kufumbwa mali njutabelesye yiinda yeeyi njindakupa, ndizookubbadala nindaboola.’ 36 Aakati kabaalumi aaba batatu, ubonaanga nguuli wakaba simayakilane wamwaalumi ooyu wakawumwa aazigwebenga?” 37 Mwaalumi ooyo wakati: “Nguulya wakamufwida luzyalo.” Mpawo Jesu wakati kulinguwe: “Anduwe yinka ukachite oobo.”
38 Nibakali kuyabweenda, wakanjila muli umwi muunzi. Mumuunzi ooyo, mwakali umwi mwanakazi uutegwa Marta iwakamutambula kung’anda yakwe. 39 Mwanakazi ooyu wakali aamwanikaakwe wakali kutegwa Mariya, ooyo wakakkala kumawulu aaMwaami kalikuswiilila nzyaakali kwaamba.* 40 Pesi Marta wakachelezeka akaambo kamilimu myiingi. Nkinkaako, wakasika kuli Jesu, wati: “Mwaami, tukwe ndaba pe kuti mwanikaangu wandisiya andilikke kuti ndichite zintu zyoonse? Mubuzye aze azoondigwasye.” 41 Mpawo Mwaami wakamusandula kuti: “Marta, Marta, ulikukataazikana akuchelezegwa aazintu zyiingi. 42 Kuyandikana zintu ziche naakuti chimwi biyo. Mariya wasala chintu chibotu loko, alubo tazoochinyangwi pe.”