Samiyele Wachibili
18 Davida wakabala baalumi mbaakalaabo mpawo wakabikka bazulwidi bazyuulu abazulwidi bamyaanda kuti babazulwide. 2 Davida wakatuma baalumi mbaakalaabo kabali mutubunga tutatu. Kakusaanguna, kakali kuzulwidwa aaJowabbu, kachibili kakali kuzulwidwa aamwanike waJowabbu, Abbishayi mwana waZeruya mpawo kachitatu kakali kuzulwidwa aa-Itayi wakuGati. Mwaami wakabuzya baalumi aaba kuti: “Andime ndilayinka aandinywe.” 3 Pesi bakati: “Toyelede kwiinka aandiswe pe, nkaambo kuti twachija, tabakooba aandaba andiswe. Alubo kuti hafu yesu yafwa tabakooba aandaba andiswe, nkaambo iwe ulayandikana zyakuti weelene aandiswe katuli 10 000. Nkinkaako, zilikabotu kuti utugwasye kuli mumuunzi.” 4 Mwaami wakati kulimbabo: “Kufumbwa nzimubona kuti zilikabotu, ndilazichita.” Mwaami wakayimikila aafwiifwi ageedi lyamuunzi mpawo baalumi boonse bakayinka kabali myaanda alubo kabali zyuulu. 5 Mwaami wakalayilila Jowabbu a-Abbishayi a-Itayi kuti: “Mutamuchitili lunya pe mwanaangu Abbisalomu akaambo kandime.” Baalumi boonse bakalimvwide mwaami naakalayilila bazulwidi boonse atala a-Abbisalomu.
6 Baalumi aabo bakayinka musokwe kuti bakaswaanane aama-Israyeli mpawo bakaakulwanina mulusaka lwa-Efremu. 7 Ma-Israyeli bakazundwa aababelesi baDavida nkukooko alubo kwakajayigwa bantu biingi mubuzuba oobo, baalumi bali 20 000. 8 Nkondo yakazula muchilawu choonse. Mukuyungizya, bantu bakajayigwa mulusaka mubuzuba oobo, bakali biingi kwiinda bakajayigwa aapanga.
9 Abbisalomu wakazoolibona kalangene aababelesi baDavida. Abbisalomu wakatantide myuulu* mpawo myuulu eeyo yakayinda aansi aamitabi iivwevweene yamunsamu mupati. Mutwe wakwe wakajatwa mumunsamu ooyo mupati zyakuti wakasyaala kalengelede mumoya,* pesi myuulu njaakatantide yakayindilila. 10 Umwi muntu wakamubona, waakubuzya Jowabbu kuti: “Bona, ndabona Abbisalomu kalengelede mumunsamu mupati.” 11 Jowabbu wakasandula mwaalumi ooyo kati: “Kuti kakuli wamubona, nkamboonzi nwaatamuyasa mpawaawo kawidaansi? Ndalikunookupa nsiliva zili kkumi abbanti kandibotelwa.” 12 Pesi mwaalumi ooyo wakati kuli Jowabbu: “Nikuba kuti ndapegwa* nsiliva zili 1 000, teendalikunoomujaya kale pe mwana wamwaami, nkaambo twakamumvwa mwaami kalikukulayilila iwe a-Abbishayi a-Itayi kuti, ‘Amumulange mwanaangu Abbisalomu kuti kutabi muntu uumuchisa.’ 13 Kaansinga teendaswiilila mpawo ndamujaya, mwaami walikunoozimvwa kupela mpawo iwe teewalikunoondikwabilila pe.” 14 Jowabbu wakati: “Tandikoomaninsya chiindi changu kandili kwaambuula aanduwe!” Nkinkaako, wakabweza nsimbi zitatu zibosya* nzyaakajisi mukuboko kwakwe, wayasa Abbisalomu aamoyo kachipona, kachilengelede mumunsamu mupati. 15 Mpawo babelesi bali kkumi bakali basikunyampula zilwanisyo zyaJowabbu bakasika bakonkobezya Abbisalomu mpawo wakafwa. 16 Kuzwa waawo, Jowabbu wakalizya mweembo mpawo bantu bakaboola kuzwa kukwaandilila ma-Israyeli. Jowabbu wakababuzya kuti baleke kulwana. 17 Bakabweza Abbisalomu, bamuwaalila mudindi pati lyakali mulusaka mpawo bakalundika dwi pati lyamabwe aalinguwe. Ma-Israyeli boonse bakachija baya kumyuunzi yabo.
18 Abbisalomu naakachili muumi, wakali wabweza pila walyiimikizya muKkuti lyaMwaami,* nkaambo wakaamba kuti: “Tandikwe mwana mulombe pe uutazoope kuti zina lyangu liyeeyegwe.” Nkinkaako, wakawuzika pila eelyo zina lyakwe alubo lichiitwa kuti ndiPila lya-Abbisalomu kusika sunu.
19 Ahimazi mwana waZadokki wakati: “Leka ndichijaane ndikabuzye mwaami makani aaya. Jehova wabeteka munzila iiluleme kwiinda mukwaangununa mwaami kuli basinkondonyina.” 20 Pesi Jowabbu wakati kulinguwe: “Teenduwe pe nweelede kutola mulumbe ooyu sunu. Ulakonzya kuzoowutola limwi zuba mulumbe ooyu, pesi toyelede kuutola sunu pe, nkaambo mwana wamwaami wafwa.” 21 Mpawo Jowabbu wakati kumwaalumi muKkushi: “Yinka ukabuzye mwaami nzwaabona.” Mpawo muKkushi ooyo wakavuntama kunembo lyaJowabbu wachijaana weenda. 22 Ahimazi mwana waZadokki wakamubuzya lubo Jowabbu kuti: “Kufumbwa zitachitike, ndileke andime ndichijaane musule lyamuKkushi ooyu.” Pesi Jowabbu wakati: “Ani ulachijaaninaanzi mwanaangu kakuli tukwe mulumbe wakuyoowamba pe.” 23 Nikuba oobo, Ahimazi wakati: “Tazikwe ndaba pe, ndileke ndichijaane.” Nkinkaako, Jowabbu wakati kulinguwe: “Chijaana!” Ahimazi wakachijaana kabelesya mugwagwa wiinda mubbooma lyaJodani* alubo kumamanino wakamwiinda muKkushi.
24 Davida wakalikkede aakati kamageedi aabili aamuunzi mpawo mulindi wakatanta aakaluli kageedi lyakali aamuduli. Naakalanga, wakabona mwaalumi wakali kuchijaana kali aalikke. 25 Nkinkaako, mulindi wakoompolola kali kubuzya mwaami. Mwaami wakati: “Kuti kali aalikke, ulaamakani ngayanda kwaamba.” Naakali kuswena aafwiifwi, 26 mulindi wakabona umwi mwaalumi kali kuchijaana mpawo mulindi wakoompolola kali kubuzya mulindi wageedi kuti: “Bona! Kuli umwi mwaalumi ulikuchijaana kali aalikke!” Mwaami wakati: “Anguwe ooyo ulikweeta mulumbe.” 27 Mulindi wakati: “Mwaalumi wakusaanguna ngundilikubona ulikuchijaanaanga ngu-Ahimazi mwana waZadokki.” Mwaami wakati: “Mwaalumi uulikabotu, ulikuza aamakani mabotu.” 28 Mpawo Ahimazi wakabuzya mwaami kuti: “Zyoonse zilikabotu!” Kuzwa waawo, wakavuntama kunembo lyamwaami busyu kabulangide aansi mpawo wakati: “Jehova Leza wako atembawulwe, ooyo wababikka mumaboko aako baalumi bakabukila mwaami simalelaangu!”
29 Nikuba oobo, mwaami wakati: “Zyoonse zilikabotu na kumwanaangu Abbisalomu?” Mpawo Ahimazi wakati: “Ndabona bantu biingi kabali kuchita musindo chiindi Jowabbu naatuma mubelesi wamwaami andime ndimubelesi wako, pesi tandizi pe kuti niinzi zyalikuchitika.” 30 Mwaami wakati: “Yimikila aambali aawa.” Mpawo wakayimikila aambali.
31 Kuzwa waawo, muKkushi wakasika mpawo wakati: “Mwaami simalelaangu atambule makani aaya: Sunu Jehova wachita bululami kwiinda mukukwaangununa mumaboko aabantu bakakubukila.” 32 Pesi mwaami wakati kumuKkushi: “Zyoonse zilikabotu na kumwanaangu Abbisalomu?” Pesi muKkushi wakati: “Basinkondonyina boonse bamwaami simalelaangu abantu boonse bakakubukila kuti bakuchise, ababe mbuli mulombe!”
33 Makani aaya akamukataazya mwaami mpawo wakatanta waya mung’anda yamujulu yakali aajulu aamulyango mpawo wakalila. Wakali kuti naakali kuyoobutanta: “Mwanaangu Abbisalomu, mwanaangu, mwanaangu Abbisalomu! Kaansinga kwafwa ndime kutali nduwe, Abbisalomu, mwanaangu, mwanaangu!”